പ്രതിപക്ഷത്താണെങ്കിൽ വാഗ്ദാനങ്ങളുടെ പെരുമഴ, അധികാരത്തിലെത്തിയാലോ കൈമലർത്തുന്ന ക്രൂരത; ഭരണകൂടത്തെ തുറന്നുകാട്ടി രൂക്ഷ വിമർശനം
പിഎസ്‌സി എൽപി സ്കൂൾ ടീച്ചർ റാങ്ക് ലിസ്റ്റിൽ ഉൾപ്പെട്ട ഉദ്യോഗാർഥികൾക്ക് നിയമന ഉത്തരവ് ലഭിക്കാൻ വൈകുന്നതിൽ പ്രതിഷേധിച്ച്, സെക്രട്ടേറിയറ്റിനു മുന്നിൽ തല മുണ്ഡനം ചെയ്ത് സമരം ചെയ്ത എൽപിഎസ്ടി റാങ്ക് ഹോൾഡേഴ്സ് അസോസിയേഷൻ സംസ്ഥാന സെക്രട്ടറി, പാലക്കാട് എലപ്പുള്ളി വേങ്ങോടി സ്വദേശി എസ്. വളർമതി തങ്ങളുടെ സമരവീഥികളെക്കുറിച്ച് മനസ്സ് തുറക്കുന്നു.
ചോദ്യം: നിയമനം നീളുന്നതിൽ പ്രതിഷേധിച്ച് തീവ്രമായ സമരമുറയായ തല മുണ്ഡനം ചെയ്യൽ നിങ്ങൾ തിരഞ്ഞെടുത്തു. പുതിയ സർക്കാരിന് ഇക്കാര്യത്തിൽ ഇടപെടാൻ കുറച്ചുകൂടി സാവകാശം നൽകാമായിരുന്നില്ലേ?
ഉത്തരം: പ്രതിപക്ഷത്തിരിക്കുമ്പോൾ വാഗ്ദാനങ്ങളുടെ പെരുമഴ തീർക്കുകയും, അധികാരത്തിൽ എത്തുമ്പോൾ ഒന്നുമറിയില്ലെന്ന ഭാവത്തിൽ ഒഴിഞ്ഞുമാറുകയും ചെയ്യുന്നത് തികച്ചും ക്രൂരമാണ്. ഞങ്ങളുടെ വേദനയും നിസ്സഹായാവസ്ഥയും കൃത്യമായി അറിയാവുന്നവരാണ് മുഖ്യമന്ത്രിയും ബന്ധപ്പെട്ട മന്ത്രിമാരും. എന്നിട്ടും ഇത്രയധികം കാലതാമസം വരുത്തുന്നത് അംഗീകരിക്കാനാവില്ല.
ചോദ്യം: ഈ പ്രതിസന്ധിക്ക് പരിഹാരമായി സർക്കാർ തലത്തിൽ എന്താണ് നടപ്പിലാക്കേണ്ടത്?
ഉത്തരം: വളരെ വ്യക്തമായൊരു നിർദ്ദേശമാണ് ഞങ്ങൾ സർക്കാരിന് നൽകിയിട്ടുള്ളത്. സ്കൂളുകളിലെ അധ്യാപക-വിദ്യാർഥി അനുപാതം 1:25 എന്ന നിലയിലേക്ക് ക്രമീകരിക്കുകയാണ് ഇതിനുള്ള ഏക പോംവഴി. ഈ അനുപാതം പരിഷ്കരിച്ചില്ലെങ്കിൽ ലിസ്റ്റിൽ ഒന്നാം റാങ്ക് നേടിയവർക്ക് പോലും ജോലി ലഭിക്കാത്ത സാഹചര്യമാണ് നിലവിലുള്ളത്. തിരഞ്ഞെടുപ്പ് കാലത്ത് നൽകിയ ഉറപ്പുകൾ സർക്കാർ അടിയന്തരമായി പാലിക്കാൻ തയ്യാറാകണം.
