കേരളത്തിൽ ബിസിനസ് വിപ്ലവത്തിന് എഐ കരുത്ത്; മാറ്റത്തിനായി മുറവിളി കൂട്ടി മാത്യു മുത്തൂറ്റ്
സമകാലിക സാമ്പത്തിക പ്രതിസന്ധികളെയും മാറിക്കൊണ്ടിരിക്കുന്ന ആഗോള സാഹചര്യങ്ങളെയും അതിജീവിക്കാൻ ആർട്ടിഫിഷ്യൽ ഇന്റലിജൻസും (എഐ) മെച്ചപ്പെട്ട ബിസിനസ് സൗഹൃദ അന്തരീക്ഷവും അനിവാര്യമാണെന്ന് മുത്തൂറ്റ് എംക്രെഡ് എംഡി മാത്യു മുത്തൂറ്റ് അഭിപ്രായപ്പെട്ടു. മനോരമ സമ്പാദ്യം ബിസിനസ് സമ്മിറ്റ് 2026-ൽ സംസാരിക്കുകയായിരുന്നു അദ്ദേഹം. കേരളത്തിന്റെ സാമ്പത്തിക വളർച്ചാ സാധ്യതകളെക്കുറിച്ചും സംരംഭകത്വ മേഖലയെക്കുറിച്ചുമുള്ള തന്റെ കാഴ്ചപ്പാടുകൾ അദ്ദേഹം സദസ്സുമായി പങ്കുവെച്ചു. ഇന്നത്തെ കാലഘട്ടത്തിൽ ആധുനിക സമ്പദ്‌വ്യവസ്ഥയിൽ വലിയ സ്വാധീനം ചെലുത്താൻ എഐയ്ക്ക് സാധിക്കുമെന്ന് അദ്ദേഹം ചൂണ്ടിക്കാട്ടി. വലിയ തോതിലുള്ള ഡേറ്റ കൈകാര്യം ചെയ്യുന്ന എംഎസ്എംഇകൾക്ക് എഐ സാങ്കേതികവിദ്യയുടെ സഹായത്തോടെ വലിയ കുതിച്ചുചാട്ടം നടത്താൻ കഴിയും. വിപണിയിലെ ചെറിയ പ്രവർത്തനങ്ങളാണ് പലപ്പോഴും വൻ സാമ്പത്തിക വളർച്ചയ്ക്ക് തുടക്കം കുറിക്കുന്നത്. അതിനാൽ, പുതിയ സംരംഭങ്ങൾ എഐയെക്കൂടി ഉൾപ്പെടുത്തി വേണം മുന്നേറാൻ എന്ന് അദ്ദേഹം വ്യക്തമാക്കി.
∙ കേരളത്തിന്റെ സാധ്യതകളും തൊഴിലവസരങ്ങളും
സംസ്ഥാനത്തിന്റെ യഥാർത്ഥ വികസന സാധ്യതകൾ പൂർണ്ണമായി പ്രയോജനപ്പെടുത്തുന്നതിൽ നാം ഇനിയും ഏറെ മുന്നേറാനുണ്ട്. മികച്ച അവസരങ്ങൾ തേടി നമ്മുടെ യുവതലമുറ കേരളത്തിന് പുറത്തേക്കും വിദേശ രാജ്യങ്ങളിലേക്കും ചേക്കേറുന്നതിന്റെ കാരണങ്ങൾ നാം ഗൗരവമായി പരിശോധിക്കണം. ഇവിടെത്തന്നെ കഴിവുള്ളവർക്ക് മികച്ച തൊഴിലവസരങ്ങൾ സൃഷ്ടിക്കാൻ നമുക്ക് സാധിക്കണം. വിഴിഞ്ഞം അന്താരാഷ്ട്ര തുറമുഖം പോലുള്ള വമ്പൻ പദ്ധതികൾ യാഥാർത്ഥ്യമാകുന്നതോടെ, ബിസിനസ് മേഖലയെ നോക്കിക്കാണുന്ന രീതിയിൽ സമൂലമായ മാറ്റങ്ങൾ അനിവാര്യമാണെന്ന് അദ്ദേഹം ഓർമ്മിപ്പിച്ചു.
∙‘ഈസ് ഓഫ് ഡൂയിങ് ബിസിനസ്’ അനിവാര്യം
കേരളത്തിലെ ബിസിനസ് സാഹചര്യം കൂടുതൽ അനുകൂലവും സംരംഭക സൗഹൃദവുമാക്കേണ്ടതുണ്ട്. ഇവിടെ സംരംഭങ്ങൾ തുടങ്ങാൻ ആഗ്രഹിക്കുന്നവർക്ക് തടസ്സങ്ങളില്ലാതെ അത് നടപ്പിലാക്കാൻ കഴിയണം. സർക്കാർ നിയന്ത്രണങ്ങൾ ബിസിനസുകാർക്ക് പ്രതിസന്ധിയാകരുത്, മറിച്ച് സംരംഭങ്ങളെ വളർത്താൻ സഹായിക്കുന്ന രീതിയിലാവണം ഭരണകൂട ഇടപെടലുകൾ എന്ന് മാത്യു മുത്തൂറ്റ് അഭിപ്രായപ്പെട്ടു. വിഴിഞ്ഞം തുറമുഖം നൽകുന്ന അവസരങ്ങൾ മുതലെടുത്ത് പുതിയ പരീക്ഷണങ്ങൾക്കും ബിസിനസ് വിപുലീകരണത്തിനും സംരംഭകർ തയ്യാറാകണം. നാം ഉൽപ്പാദിപ്പിക്കുന്ന സേവനങ്ങളും ഉൽപ്പന്നങ്ങളും ജപ്പാൻ, കൊറിയ, യൂറോപ്യൻ രാജ്യങ്ങൾ എന്നിവയുമായി കിടപിടിക്കുന്ന രാജ്യാന്തര നിലവാരമുള്ളതാകണം. വെല്ലുവിളികളെ ധീരമായി നേരിടാനും ആഗോള നിലവാരത്തിലുള്ള ചിന്താഗതിയിലേക്ക് മാറാനും സംരംഭകർ മുന്നിട്ടിറങ്ങണമെന്ന് അദ്ദേഹം കൂട്ടിച്ചേർത്തു.
സമ്മിറ്റിന്റെ ഉദ്ഘാടനം കല്യാൺ ജ്വല്ലേഴ്സ് എംഡി ടി.എസ്. കല്യാണരാമൻ നിർവഹിച്ചു. ഭാവിയിൽ മികച്ച വളർച്ച കൈവരിക്കാൻ സാധ്യതയുള്ള മേഖലകളെക്കുറിച്ച് മാർസിലസ് ഇൻവെസ്റ്റ്മെന്റ് മാനേജേഴ്സ് സ്ഥാപകനും ചീഫ് ഇൻവെസ്റ്റിങ് ഓഫിസറുമായ സൗരഭ് മുഖർജി മുഖ്യപ്രഭാഷണം നടത്തി. നബാർഡ് ചെയർമാൻ ഡോ. ഷാജി കൃഷ്ണൻ, അഗാപ്പെ ഡയഗ്നോസ്റ്റിക്സ് എംഡി തോമസ് ജോൺ, വിഎസ്ടി ടില്ലേഴ്സ് സിഇഒ ആന്റണി ചെറുകര, മുത്തൂറ്റ് എംക്രെഡ് സിഇഒ പി.ഇ. മത്തായി, സുപ്ര പസിഫിക് ഫിനാൻഷ്യൽ സർവീസസ് സിഇഒ മനോജ് രവി, ഹോംസ് ഇക്വിറ്റീസ് പ്രിൻസിപ്പൽ ഓഫിസർ സജി മാത്യൂസ് തുടങ്ങിയവർ വിവിധ സെഷനുകളിൽ തങ്ങളുടെ അനുഭവങ്ങൾ പങ്കുവെക്കും. സമാപന സമ്മേളനത്തിൽ ‘കേരളത്തിന്റെ അടിസ്ഥാനസൗകര്യ വികസനം– വളർച്ചയും വെല്ലുവിളികളും’ എന്ന വിഷയത്തിൽ ഫെഡറൽ ബാങ്ക് ചെയർമാൻ ഏലിയാസ് ജോർജ് സംസാരിക്കും.
പുത്തൻ തലമുറയിലെ മലയാളി സംരംഭകരുടെ സാന്നിധ്യമാണ് ഈ വർഷത്തെ സമ്മിറ്റിന്റെ പ്രധാന പ്രത്യേകത. ഇ–സ്കൂട്ടർ നിർമ്മാതാക്കളായ റിവർ മൊബിലിറ്റിയുടെ സഹസ്ഥാപകൻ അരവിന്ദ് മണി, പ്രിവലന്റ് എഐ സഹസ്ഥാപകൻ അരുൺ രാജ്, എൽ സോൾ പവർ സൊല്യൂഷൻസ് മാനേജിങ് ഡയറക്ടർ ടിൻസു മാത്യു എന്നിവർ വിവിധ സെഷനുകളിൽ സംസാരിക്കും. കൂടാതെ ജോർഡൻ (കിങ്സ് മറീൻ പ്രോഡക്ട്സ്), നീന റോബി (ഫൈബർവേൾഡ്), രാഹുൽ മാമൻ ഏബ്രഹാം (കേരളാ ഏയ്ഞ്ചൽ നെറ്റ്‌വർക്), നൗറീൻ ഐഷ (ഫെമിസേഫ്), റമീസ് അലി (ക്രാവ്) തുടങ്ങിയ യുവസംരംഭകരും ചർച്ചകളിൽ പങ്കാളികളാകും. മുത്തൂറ്റ് എംക്രെഡ് ആണ് സമ്മിറ്റിന്റെ ടൈറ്റിൽ സ്പോൺസർ. സുപ്ര പസിഫിക് ഫിനാൻഷ്യൽ സർവീസസ് പവേഡ് ബൈ സ്പോൺസറായും, നബാർഡ്, ഹോംസ് ഇക്വിറ്റീസ് എന്നിവർ അസോഷ്യേറ്റ് സ്പോൺസർമാരായും സഹകരിക്കുന്നു.
