പോളിഹൗസ് കൃഷിയിലൂടെ കാർഷിക മേഖലയിൽ വിപ്ലവം സൃഷ്ടിച്ച് ഹൈടെക് കർഷകൻ
ഒ.രാജേഷ് കൊല്ലം
കൃഷിയോട് ആത്മാർത്ഥമായ താൽപര്യവും പുതിയ സാങ്കേതികവിദ്യകളെ സ്വീകരിക്കാനുള്ള മനസ്സും ഉണ്ടെങ്കിൽ കാർഷിക മേഖലയിൽ വലിയ മാറ്റങ്ങൾ സൃഷ്ടിക്കാനാകുമെന്ന് തെളിയിക്കുകയാണ് കർഷകൻ പുഷ്പഹാസ്.
സാങ്കേതികവിദ്യയെ കൂട്ടുപിടിച്ച് കാർഷിക രംഗത്ത് സ്വന്തം ഇടം കണ്ടെത്തിയ കർഷകനാണ് കൊല്ലം കടക്കൽ ചിതറ പാപ്‌സ് ഫാം ഉടമ പുഷ്പഹാസ്.
45-ാം വയസ്സിൽ ആധുനിക സാങ്കേതികവിദ്യയും ശാസ്ത്രീയ കൃഷിരീതികളും സമന്വയിപ്പിച്ച് പോളിഹൗസ് കൃഷിയിലൂടെ ശ്രദ്ധേയമായ നേട്ടമാണ് പുഷ്പഹാസ് കൈവരിച്ചിരിക്കുന്നത്. 2025-ലെ സംസ്ഥാന സർക്കാരിന്റെ മികച്ച ഹൈടെക് കർഷക പുരസ്കാരം ലഭിച്ചതും അദ്ദേഹത്തിന്റെ കാർഷിക യാത്രയിലെ ശ്രദ്ധേയമായ അംഗീകാരമാണ്.
“2014-ൽ തുടക്കം..”പാപ്‌സ് ഫാം” ഇന്ന് 4200 ചതുരശ്ര മീറ്റർ”
പോളിഹൗസ് കൃഷിയിലേക്ക് പുഷ്പഹാസ് കടന്നത് 2014-ലാണ്. തുടക്കത്തിൽ 400 ചതുരശ്ര മീറ്റർ പോളിഹൗസിൽ സാലഡ് വെള്ളരിയും പയറും കൃഷി ചെയ്താണ് പുതിയ രീതിയുടെ സാധ്യതകൾ പരീക്ഷിച്ചത്.
ആദ്യഘട്ടത്തിലെ അനുഭവങ്ങളും മികച്ച വരുമാനവും കൂടുതൽ ആത്മവിശ്വാസം നൽകി. തുടർന്ന് പോളിഹൗസുകളുടെ എണ്ണം വർധിപ്പിച്ച് കൃഷി വ്യാപിപ്പിച്ചു.
ഇന്ന് 4200 ചതുരശ്ര മീറ്റർ വിസ്തൃതിയിലാണ് പുഷ്പഹാസ് പോളിഹൗസ് കൃഷി നടത്തുന്നത്.
നിലവിൽ ആറേക്കർ സ്ഥലത്തെ ഫാമിൽ വാഴയടക്കം മറ്റു കൃഷികളുമുണ്ട്.
പരമ്പരാഗത കൃഷിരീതികൾക്കൊപ്പം ആധുനിക സാങ്കേതികവിദ്യയും ശാസ്ത്രീയ സമീപനവും കൂട്ടിച്ചേർത്തതാണ് പുഷ്പഹാസിന്റെ കാർഷിക വിജയത്തിന്റെ പ്രത്യേകത.
കൃഷിയെ കൂടുതൽ കാര്യക്ഷമമാക്കുന്നതിനൊപ്പം ഉൽപ്പാദനവും ഗുണമേന്മയും മെച്ചപ്പെടുത്താൻ കഴിയുന്ന രീതിയിലാണ് പോളിഹൗസ് കൃഷിയെ അദ്ദേഹം സമീപിക്കുന്നത്.
“പുതിയ തലമുറയ്ക്ക് പ്രചോദനമാകുന്ന കർഷകൻ”
കൃഷി എന്നത് വെറും അധ്വാനം മാത്രമല്ലെന്നും, അറിവും സാങ്കേതികവിദ്യയും കൃത്യമായ ആസൂത്രണവും ചേർന്നാൽ അതൊരു മികച്ച സംരംഭമായി വളർത്തിയെടുക്കാമെന്നും പുഷ്പഹാസിന്റെ കാർഷിക യാത്ര തെളിയിക്കുന്നു.
ഡ്രിപ്പ് ഇറിഗേഷൻ, ഫെർട്ടിഗേഷൻ, നിയന്ത്രിത അന്തരീക്ഷം തുടങ്ങിയ ആധുനിക സംവിധാനങ്ങൾ ഉപയോഗപ്പെടുത്തി കൃഷിയെ കൂടുതൽ കാര്യക്ഷമമാക്കാൻ കഴിയും. ഇതിലൂടെ വെള്ളത്തിന്റെയും വളത്തിന്റെയും ഉപയോഗം കാര്യക്ഷമമായി കൈകാര്യം ചെയ്യാനും സാധിക്കും
താപനില, ഈർപ്പം, ജലസേചനം, വളപ്രയോഗം തുടങ്ങിയ ഘടകങ്ങൾ ശാസ്ത്രീയമായി നിയന്ത്രിച്ച് മികച്ച വിളവിലേക്ക് എത്തുകയാണ് ഹൈടെക് കൃഷിയുടെ ലക്ഷ്യം.
പ്രതികൂല കാലാവസ്ഥയിലും നിയന്ത്രിത കൃഷി
മഴ, ചൂട്, കീടബാധ തുടങ്ങിയ പല വെല്ലുവിളികളും കർഷകർ നേരിടുന്നുണ്ട്. എന്നാൽ പോളിഹൗസ് സംവിധാനത്തിലൂടെ ചെടികൾക്ക് ആവശ്യമായ വളർച്ചാ സാഹചര്യം ഒരു പരിധിവരെ നിയന്ത്രിക്കാൻ സാധിക്കുന്നു
കൃഷിയിലേക്ക് കടക്കാൻ ആഗ്രഹിക്കുന്നവർക്ക് പലപ്പോഴും പ്രധാന വെല്ലുവിളി ശരിയായ രീതിയും സാങ്കേതികവിദ്യയും കണ്ടെത്തുക എന്നതാണ്. പുഷ്പഹാസിന്റെ അനുഭവം അതിന് ഒരു പ്രായോഗിക മാതൃകയാണ്.
ചെറിയ തോതിൽ ആരംഭിച്ച് അനുഭവത്തിൽ നിന്ന് പഠിച്ച് കൃഷി വിപുലീകരിച്ച അദ്ദേഹത്തിന്റെ യാത്ര പുതുതലമുറയിലെ കർഷകർക്കും കാർഷിക സംരംഭകർക്കും പ്രചോദനമാകുന്നതാണ്.കൃഷി വകുപ്പ് എല്ലാവിധ സാമ്പത്തിക സഹായവും പിന്തുണയും നൽകുന്നുണ്ടെങ്കിലും പ്രധാനമായും വേണ്ടത് സാങ്കേതിക പരിജ്ഞാനമാണെന്ന് പുഷ്പഹാസ് പറയുന്നു.വ്യക്തമായ സാങ്കേതിക പരിജ്ഞാനം കർഷകരിലേക്കെത്തിച്ചാൽ മാത്രമേ ഹൈടെക് കൃഷി പരമാവധി വിജയിപ്പിച്ചെടുക്കാൻ കഴിയുകയുള്ളു എന്നും സർക്കാരിൽ നിന്നും ഇതിനൊരു പരിഹാരം കാണണമെന്നും അദ്ദേഹം അഭിപ്രായപ്പെടുന്നു.
“ചെറിയ തുടക്കത്തിൽ നിന്ന് വലിയ കാർഷിക സ്വപ്നങ്ങളിലേക്ക്”
400 ചതുരശ്ര മീറ്ററിൽ നിന്ന് 4200 ചതുരശ്ര മീറ്ററിലേക്കുള്ള വളർച്ചയും സംസ്ഥാനതല പുരസ്കാരത്തിലേക്കുള്ള യാത്രയും പുഷ്പഹാസിന്റെ കഠിനാധ്വാനത്തിന്റെയും കാർഷിക മേഖലയോടുള്ള പ്രതിബദ്ധതയുടെയും നേർക്കാഴ്ചയാണ്.
ഇപ്പോൾ ഹൈടെക് കൃഷി രീതികൾ പഠിക്കാനെത്തുന്നവരുടെ പരിശീലന കേന്ദ്രം കൂടിയായി പുഷ്പഹാസിന്റെ പാപ്‌സ് ഫാം.
സ്കൂൾ അധ്യാപികയായ ഭാര്യ അനുജിയും,പ്ലസ് വൺ വിദ്യാർത്ഥിയായ മകൻ പാർത്ഥിവും പൂർണ്ണ പിന്തുണയുമായി പുഷ്പഹാസിനൊപ്പമുണ്ട്.
കൃഷിയെ സ്നേഹിച്ച് തുടങ്ങി…
സാങ്കേതികവിദ്യയെ കൂട്ടുപിടിച്ച് മുന്നേറി…
ഇന്ന് ഹൈടെക് കർഷകനെന്ന അംഗീകാരത്തിലേക്ക്.
പുഷ്പഹാസ് ഒരു കർഷകൻ മാത്രമല്ല, ആധുനിക കൃഷിയുടെ സാധ്യതകൾ കാണിച്ചുതരുന്ന ഒരു മാതൃക കൂടിയാണ്.”
പുഷ്പഹാസിന്റെ ഫോൺ നമ്പർ : +91 93834 30276
