പശ്ചിമ ബംഗാളിൽ വ്യാജ ഡോക്ടർമാർക്കെതിരെ നടപടി: 1.10 ലക്ഷം രേഖകൾ പരിശോധനയിൽ
കൊൽക്കത്ത: സംസ്ഥാനത്ത് വ്യാജ ഡോക്ടർമാരുടെ സാന്നിധ്യം വർധിച്ചുവരുന്ന സാഹചര്യത്തിൽ, മുഴുവൻ ഡോക്ടർമാരുടെയും യോഗ്യതാ രേഖകൾ പുനഃപരിശോധിക്കാൻ ബംഗാൾ ആരോഗ്യ വകുപ്പ് തീരുമാനിച്ചു. വെസ്റ്റ് ബംഗാൾ മെഡിക്കൽ കൗൺസിലിന്റെ കീഴിൽ രജിസ്റ്റർ ചെയ്തിട്ടുള്ള ഏകദേശം 1.10 ലക്ഷം ഡോക്ടർമാരെയാണ് ഈ പരിശോധനാ നടപടിക്ക് വിധേയരാക്കുന്നത്. സംസ്ഥാന ആരോഗ്യമന്ത്രി ശരദ്വത് മുഖർജിയാണ് ഔദ്യോഗികമായി ഇക്കാര്യം അറിയിച്ചത്.
രജിസ്ട്രേഷൻ ഇല്ലാതെ ചികിത്സാ രംഗത്ത് പ്രവർത്തിക്കുന്നവരുടെ എണ്ണം കുത്തനെ കൂടിയെന്ന പരാതികൾ ഗൗരവമായി കണ്ടാണ് സർക്കാർ ഇത്തരം കർശന നടപടികളിലേക്ക് കടക്കുന്നത്. വ്യാജ ബിരുദങ്ങളും കൃത്രിമമായി നിർമിച്ച സർട്ടിഫിക്കറ്റുകളും ഉപയോഗിച്ച് വൈദ്യപരിശീലനം നടത്തുന്നവരെ കണ്ടെത്തുക എന്നത് രോഗികളുടെ സുരക്ഷയ്ക്കും ആരോഗ്യമേഖലയിലെ ജനങ്ങളുടെ വിശ്വാസം നിലനിർത്താനും അത്യന്താപേക്ഷിതമാണെന്ന് അധികൃതർ വിലയിരുത്തുന്നു.
സ്റ്റേറ്റ് ഇൻസ്പെക്ഷൻ ആൻഡ് റീവാലിഡേഷൻ (എസ്.ഐ.ആർ) സംവിധാനത്തിലൂടെയായിരിക്കും നടപടികൾ പുരോഗമിക്കുക. 1996 മുതൽ രജിസ്റ്റർ ചെയ്ത എല്ലാ ഡോക്ടർമാരും തങ്ങളുടെ ബിരുദ സർട്ടിഫിക്കറ്റുകളും സർവകലാശാല നൽകിയ രേഖകളും രജിസ്ട്രേഷൻ വിവരങ്ങളും വീണ്ടും ഹാജരാക്കണം. ഇതിനൊപ്പം ‘നോ യുവർ ഡോക്ടർ’ (കെ.വൈ.ഡി) എന്ന പുതിയ പരിശോധനയും നടപ്പിലാക്കും. ആധികാരിക രേഖകളുള്ളവർക്ക് യാതൊരു വിധത്തിലുള്ള ആശങ്കയും വേണ്ടെന്ന് മന്ത്രി ഉറപ്പുനൽകി.
പരിശോധന സുഗമമാക്കാൻ രണ്ട് മാർഗങ്ങളാണ് ഉള്ളത്. നേരിട്ട് ഹാജരായി രേഖകൾ സമർപ്പിക്കാം, അല്ലെങ്കിൽ ദൂരസ്ഥലങ്ങളിൽ ഉള്ളവർക്കും, പ്രായമേറിയവർക്കും, വിദേശത്തുള്ളവർക്കും സൗകര്യപ്രദമായ രീതിയിൽ വീഡിയോ കോൺഫറൻസിംഗ് വഴി വെർച്വൽ ആയി രേഖകൾ പരിശോധിക്കാം. ഈ പ്രക്രിയ തികച്ചും സുതാര്യമാക്കാൻ ഒരു സ്വകാര്യ ഏജൻസിയെ നിയോഗിക്കാനും സർക്കാർ ആലോചിക്കുന്നുണ്ട്.
പരിശോധനയിൽ രേഖകളിൽ അസ്വാഭാവികത കണ്ടെത്തിയാൽ കർശനമായ തുടർനടപടികൾ സ്വീകരിക്കും. വ്യാജരേഖകളാണെന്ന് ഉറപ്പുവരുത്തിയാൽ രജിസ്ട്രേഷൻ റദ്ദാക്കുന്നത് ഉൾപ്പെടെയുള്ള കടുത്ത ശിക്ഷാ നടപടികൾ നേരിടേണ്ടി വരും. എന്നാൽ, രേഖകളിൽ ചെറിയ സാങ്കേതിക പിഴവുകൾ മാത്രമുള്ളവർക്ക് അവ തിരുത്താൻ സർക്കാർ അവസരം നൽകും. യഥാർത്ഥ ഡോക്ടർമാരെ ദ്രോഹിക്കുകയല്ല, മറിച്ച് വ്യാജന്മാരെ ചികിത്സാ മേഖലയിൽ നിന്ന് പുറത്താക്കുകയാണ് ഈ നടപടിയുടെ ലക്ഷ്യമെന്നും മന്ത്രി കൂട്ടിച്ചേർത്തു.
ഇതോടൊപ്പം തന്നെ കൗൺസിലിന്റെ നിലവിലുള്ള പട്ടിക പരിഷ്കരിക്കാനും സർക്കാർ ഉദ്ദേശിക്കുന്നുണ്ട്. മരണപ്പെട്ടവർ, വിദേശത്തേക്ക് കുടിയേറിയവർ, ഇപ്പോൾ ചികിത്സാ രംഗത്ത് ഇല്ലാത്തവർ എന്നിവരുടെ പേരുകൾ പട്ടികയിൽ നിന്ന് ഒഴിവാക്കും. സർട്ടിഫിക്കറ്റുകളുടെ കാലാവധി സംബന്ധിച്ച സംശയങ്ങൾക്കും മന്ത്രി മറുപടി നൽകി; പുതിയ മാർഗനിർദേശങ്ങൾ നിലവിൽ വരുന്നത് വരെ നിലവിലുള്ള എല്ലാ രജിസ്ട്രേഷനുകളും നിയമപരമായി സാധുവായിരിക്കും.
ആരോഗ്യരംഗത്ത് പൂർണമായ സുതാര്യത ഉറപ്പാക്കാനും രജിസ്റ്റർ ചെയ്യാത്തവരുടെ അനധികൃത ചികിത്സ പൂർണമായും അവസാനിപ്പിക്കാനുമാണ് ഈ നടപടി. ഈ പ്രക്രിയ പൂർത്തിയാകുമ്പോൾ ബംഗാളിലെ യഥാർത്ഥ ഡോക്ടർമാരുടെ കൃത്യമായ കണക്ക് സർക്കാരിന് ലഭ്യമാകും. ഇത് ഭാവിയിൽ രോഗികൾക്ക് തങ്ങളുടെ ഡോക്ടറെ കുറിച്ച് കൃത്യമായി മനസിലാക്കാനും ആരോഗ്യ സംവിധാനത്തെ കൂടുതൽ വിശ്വാസത്തിലെടുക്കാനും സഹായിക്കുമെന്ന് അധികൃതർ വ്യക്തമാക്കി.
