‘അഞ്ചാം തീയതിക്ക് 24 മണിക്കൂറുണ്ട്!’; രാത്രി 11:58-ന് വാടക നൽകി ജെൻ–സീ യുവാവ്; ഇത് പ്രതിഷേധമോ അതോ പരിഹാസമോ?

‘അഞ്ചാം തീയതിക്കുള്ളിൽ വാടക നൽകണം’—വീടുകൾ വാടകയ്ക്ക് നൽകുമ്പോൾ ഉടമസ്ഥർ സാധാരണയായി മുന്നോട്ടുവയ്ക്കുന്ന പ്രധാന നിബന്ധനകളിലൊന്നാണിത്. എന്നാൽ ഈ ‘അഞ്ചാം തീയതി’ യഥാർഥത്തിൽ എപ്പോൾ അവസാനിക്കും? അഞ്ചാം തീയതി രാവിലെ എട്ടു മണിക്ക് ഫോൺ വിളിച്ച് വാടക ചോദിച്ച വീട്ടുടമസ്ഥനോട് ‘ഈ ദിവസത്തിന് 24 മണിക്കൂറുണ്ട്’ എന്ന് ഓർമിപ്പിക്കുകയും, ഒടുവിൽ അർദ്ധരാത്രി 11:58-ന് വാടക അയച്ചു കൊടുക്കുകയും ചെയ്ത ഒരു ജെൻ–സീ യുവാവിന്റെ അനുഭവമാണ് ഇപ്പോൾ സമൂഹമാധ്യമത്തിൽ തർക്കങ്ങൾക്കും ചർച്ചകൾക്കും വഴിവച്ചിരിക്കുന്നത്.രാവിലെ 8 മണിയുടെ കോളും 11:58-ലെ പേയ്‌മെന്റും ‘എക്സ്’ പ്ലാറ്റ്‌ഫോമിൽ വൈറലായ ഒരു പോസ്റ്റിലൂടെയാണ് ഈ സംഭവം പുറത്തുവരുന്നത്. മാസത്തിലെ അഞ്ചാം തീയതിയാണ് വാടക നൽകേണ്ടതെന്ന് വീട്ടുടമസ്ഥൻ വാടകക്കാരനെ നേരത്തെ തന്നെ അറിയിച്ചിരുന്നു. വാടകക്കാരൻ അത് സമ്മതിക്കുകയും ചെയ്തതാണ്. എന്നാൽ അഞ്ചാം തീയതി രാവിലെ 8 മണിക്ക് തന്നെ വീട്ടുടമസ്ഥൻ വാടക ആവശ്യപ്പെട്ട് ഫോൺ വിളിച്ചതോടെയാണ് പ്രശ്നങ്ങൾക്ക് തുടക്കം കുറിക്കുന്നത്.തീയതി അഞ്ചാണെന്നും ആ ദിവസം അവസാനിക്കാൻ ഇനിയും സമയം ബാക്കിയുണ്ടെന്നും ഓർമിപ്പിച്ച വാടകക്കാരൻ, ആ ദിവസത്തിന്റെ പൂർണ സമയം ഉപയോഗപ്പെടുത്തി. ഒടുവിൽ ആ തീയതി തീരാൻ വെറും രണ്ട് മിനിറ്റ് മാത്രം ശേഷിക്കെ, രാത്രി 11:58-നാണ് അദ്ദേഹം ഓൺലൈനായി വാടക അയച്ചു നൽകിയത്.സമൂഹമാധ്യമത്തിലെ വാദപ്രതിവാദങ്ങൾ ഈ സംഭവം പുറത്തുവന്നതോടെ ഇന്റർനെറ്റ് ലോകം രണ്ടു തട്ടിലാണ്. ഒരു വിഭാഗം ആളുകൾ വാടകക്കാരന്റെ സാങ്കേതിക കൃത്യതയെ പിന്തുണച്ചപ്പോൾ, മറുവിഭാഗം അത് മര്യാദകേടാണെന്ന് രൂക്ഷമായി വിമർശിച്ചു.ഒരു നിശ്ചിത സമയത്ത് (ഉദാഹരണത്തിന് ബാങ്കിങ് സമയത്തിനുള്ളിൽ അല്ലെങ്കിൽ വൈകുന്നേരത്തിന് മുൻപ്) വാടക ലഭിക്കണമെന്ന് വീട്ടുടമസ്ഥന് ആഗ്രഹമുണ്ടെങ്കിൽ, വാടക കരാറിൽ തീയതിയോടൊപ്പം കൃത്യമായ സമയവും രേഖപ്പെടുത്തണമായിരുന്നുവെന്ന് ഒരു കൂട്ടർ വാദിച്ചു. എന്നാൽ പ്രായോഗിക കാഴ്ചപ്പാട് സ്വീകരിച്ചവർ മറ്റൊരു സാങ്കേതിക വിഷയം ഉയർത്തിക്കാട്ടി. അർദ്ധരാത്രിയോടടുത്ത് പേയ്‌മെന്റ് നടത്തുമ്പോൾ നെറ്റ്‌വർക്ക് തകരാറോ ബാങ്കിങ് സേവനങ്ങളിലെ തടസ്സങ്ങളോ നേരിട്ടാൽ എന്ത് സംഭവിക്കും? സാങ്കേതിക വീഴ്ച കാരണം തീയതി മാറിയാൽ അതിന്റെ ഉത്തരവാദിത്തം ആര് ഏറ്റെടുക്കും എന്നതായിരുന്നു അവരുടെ ചോദ്യം.ഈ വിഷയം പിന്നീട് തലമുറകൾ തമ്മിലുള്ള സ്വഭാവ-സംസ്കാര വ്യത്യാസങ്ങളെക്കുറിച്ചുള്ള അഭിപ്രായങ്ങളിലേക്കും വഴിമാറി. ‘ജെൻ-സീ മറ്റൊരു ഗ്രഹത്തിൽ നിന്നുള്ളവരാണെന്ന് ഇത് തെളിയിക്കുന്നു’, എന്നിങ്ങനെയുള്ള അഭിപ്രായങ്ങൾ പോസ്റ്റിനു താഴെ നിറഞ്ഞു.


Cinema ⏭️