വിദേശത്ത് നിന്ന് മൊബൈൽഫോൺ കൊണ്ടുവരുമ്പോൾ ശ്രദ്ധിക്കേണ്ട നികുതി നിയമങ്ങളും പരിധികളും
കൊച്ചി വിമാനത്താവളത്തിൽ പുതിയ ഐഫോണുമായി എത്തിയ യാത്രക്കാരൻ കസ്റ്റംസ് തീരുവ അടയ്ക്കുന്നതുമായി ബന്ധപ്പെട്ട് നടത്തിയ പ്രതിഷേധം വലിയ ചർച്ചയായിരുന്നു. ഈ സംഭവത്തിന്റെ പശ്ചാത്തലത്തിൽ വിദേശത്തുനിന്ന് ഫോൺ കൊണ്ടുവരുമ്പോൾ പാലിക്കേണ്ട നിയമങ്ങളെക്കുറിച്ച് എയർപോർട്ട് കസ്റ്റംസ് നൽകുന്ന വിശദീകരണങ്ങൾ താഴെ നൽകുന്നു:
∙ നികുതിയില്ലാതെ വിദേശത്തുനിന്ന് എത്ര ഫോണുകൾ കൊണ്ടുവരാം?
യാത്രക്കാരന് 75,000 രൂപ വരെ വിലയുള്ള സാധനങ്ങൾ കസ്റ്റംസ് ഡ്യൂട്ടിയില്ലാതെ കൊണ്ടുവരാൻ അനുവാദമുണ്ട്. സ്വർണം, മദ്യം, ലാപ്ടോപ് എന്നിവയ്ക്കുള്ള പ്രത്യേക ഇളവുകൾ ഇതിൽ ഉൾപ്പെടുന്നില്ല.
∙ ഫോണിന്റെ വില 75,000 രൂപയിൽ കൂടുതലാണെങ്കിൽ എന്ത് ചെയ്യണം?
യാത്രക്കാരൻ സ്ഥിരമായി ഉപയോഗിക്കുന്ന ഫോണാണെങ്കിൽ സാധാരണയായി തടസ്സങ്ങൾ ഉണ്ടാകാറില്ല.
∙ ഉപയോഗത്തിലുള്ളതാണെങ്കിൽ ഒന്നിലധികം ഫോണുകൾ കൊണ്ടുവരാൻ സാധിക്കുമോ?
അതിനുള്ള അനുവാദമുണ്ട്. എന്നാൽ, കൈവശമുള്ള ഫോണുകൾ എല്ലാം തന്നെ യാത്രക്കാരൻ നിത്യേന ഉപയോഗിക്കുന്നതാണെന്ന് അധികൃതർക്ക് ബോധ്യപ്പെടണം.
∙ ഫോണിൽ സിം കാർഡ് നിർബന്ധമാണോ?
ബാഗേജ് നിയമങ്ങളിൽ ഫോണിനെക്കുറിച്ച് പ്രത്യേകം പരാമർശങ്ങളില്ല. എന്നിരുന്നാലും, അത് വ്യക്തിപരമായ ആവശ്യത്തിന് സ്ഥിരമായി ഉപയോഗിക്കുന്നതാണെന്ന് കൃത്യമായി ബോധ്യപ്പെടുത്താൻ സാധിച്ചാൽ മാത്രമേ തീരുവയിൽ നിന്ന് ഒഴിവാക്കുകയുള്ളൂ.
∙ 75,000 രൂപയ്ക്ക് മുകളിൽ വിലയുള്ള സാധനങ്ങൾ കൊണ്ടുവന്നാൽ എത്ര രൂപ നികുതി നൽകണം?
അത്തരം സാധനങ്ങൾ കൈവശമുണ്ടെങ്കിൽ ‘അതിഥി’ (Atithya) ആപ്പ് വഴി മുൻകൂട്ടി വിവരങ്ങൾ രേഖപ്പെടുത്തണം. വിമാനത്താവളത്തിലെ കസ്റ്റംസ് കൗണ്ടറിലെത്തി ഇക്കാര്യം വെളിപ്പെടുത്തുകയും വേണം. നിശ്ചിത പരിധി കഴിഞ്ഞുള്ള തുകയുടെ 35 ശതമാനം കസ്റ്റംസ് ഡ്യൂട്ടിയായി അടയ്ക്കേണ്ടി വരും.
∙ 75,000 രൂപയിൽ കൂടുതൽ വിലയുള്ള ഫോൺ മാത്രം കൊണ്ടുവന്നാൽ മുഴുവൻ തുകയ്ക്കും നികുതി അടയ്ക്കണോ?
വേണ്ട. 75,000 രൂപയ്ക്ക് മുകളിലുള്ള അധിക തുകയ്ക്ക് മാത്രം 35 ശതമാനം ഡ്യൂട്ടി അടച്ചാൽ മതി. ഉദാഹരണത്തിന്, ഒരു ലക്ഷം രൂപ വിലയുള്ള ഫോണിന്, ബാക്കി വരുന്ന 25,000 രൂപയ്ക്ക് മാത്രം നികുതി നൽകിയാൽ മതിയാകും.
∙ നിയമവിരുദ്ധമായി ഫോണുകൾ കൊണ്ടുവന്നാൽ എന്ത് സംഭവിക്കും?
അവ കള്ളക്കടത്തായി കണക്കാക്കി കർശന നിയമനടപടികൾ സ്വീകരിക്കും. ഫോൺ പിടിച്ചെടുക്കുന്നതിനൊപ്പം, 35 ശതമാനം നികുതിയും പിഴയും അടയ്ക്കാൻ നിർദ്ദേശിച്ചുകൊണ്ട് യാത്രക്കാരന് നോട്ടിസ് നൽകും.
∙ ഐഫോണിന് മാത്രമായി പ്രത്യേക നിബന്ധനകൾ ഉണ്ടോ?
ഇല്ല, ഐഫോണിന് മാത്രമായി പ്രത്യേക നിയന്ത്രണങ്ങളൊന്നും നിലവിലില്ല.
