പ്ലേയിങ് ഇലവനിൽ ഇഷാൻ കിഷനെ ഉൾപ്പെടുത്തണമെന്ന് മുൻ താരം: അഭിപ്രായവ്യത്യാസവുമായി സഹതാരം
ഹാമിൽട്ടൻ ∙ ന്യൂസീലൻഡിനെതിരായ ഏകദിന പരമ്പരയിൽ ഇന്ത്യയുടെ പ്ലേയിങ് ഇലവനിൽ ആരൊക്കെ വേണമെന്ന കാര്യത്തിൽ മുൻ ഇന്ത്യൻ താരങ്ങളായ അമ്പാട്ടി റായിഡുവും മുരളി കാർത്തിക്കും വ്യത്യസ്ത നിലപാടുകളുമായി രംഗത്ത്. പരമ്പരയിലെ ആദ്യ രണ്ട് മത്സരങ്ങളും ജയിച്ച് ഇന്ത്യ ഇതിനകം തന്നെ മേധാവിത്വം ഉറപ്പിച്ചു കഴിഞ്ഞു. ആദ്യ കളി അഞ്ച് വിക്കറ്റിനും, രണ്ടാമത്തേത് ഡിഎൽഎസ് നിയമപ്രകാരം നാല് റൺസിനുമാണ് ഇന്ത്യ സ്വന്തമാക്കിയത്. എങ്കിലും, പ്രതികൂല സാഹചര്യങ്ങളിൽ ചെറിയ ലക്ഷ്യങ്ങൾ പിന്തുടരുമ്പോൾപ്പോലും ടീം വലിയ പ്രതിസന്ധികളെ നേരിട്ടിരുന്നു. ഈ പശ്ചാത്തലത്തിലാണ് ടീമിലെ മാറ്റങ്ങളെക്കുറിച്ച് റായിഡു തന്റെ അഭിപ്രായം പങ്കുവെച്ചത്. പരമ്പരയിലെ മൂന്നാം മത്സരം നാളെ ഹാമിൽട്ടനിൽ നടക്കും.
പരമ്പരയിൽ അക്ഷർ പട്ടേലിന്റെ ഫോം വലിയൊരു ചോദ്യചിഹ്നമാണ്. ആദ്യ മത്സരത്തിൽ നേരിട്ട രണ്ടാം പന്തിൽ തന്നെ താരം പുറത്തായി. രണ്ടാമത്തെ കളിയിൽ 17 പന്തുകൾ നേരിട്ടിട്ടും ഏഴ് റൺസ് മാത്രമാണ് അക്ഷറിന് നേടാനായത്. അഞ്ചാം നമ്പറിൽ അക്ഷർ പട്ടേലിനെ ഇറക്കുന്നതിനോട് റായിഡുവിന് യോജിപ്പില്ല. ‘‘നിലവിലെ സാഹചര്യങ്ങൾ പരിഗണിക്കുമ്പോൾ, അഞ്ചാം നമ്പറിൽ ബാറ്റ് ചെയ്യാൻ അക്ഷർ ഇനിയും വളരേണ്ടതുണ്ട്. ആറാം നമ്പറിലോ ഏഴാം നമ്പറിലോ ആയാൽ ഒരുപക്ഷേ അദ്ദേഹത്തിന് മികച്ച സംഭാവന നൽകാൻ കഴിഞ്ഞേക്കും. എന്നാൽ അഞ്ചാം നമ്പറിലേക്ക് വരുന്നത് സമ്മർദ്ദങ്ങളെ അതിജീവിക്കാൻ കെൽപ്പുള്ള കൂടുതൽ കരുത്തനായ ബാറ്ററാണ്,’’ റായിഡു അഭിപ്രായപ്പെട്ടു.
അതേസമയം, റായിഡുവിന്റെ നിരീക്ഷണങ്ങളോട് മുരളി കാർത്തിക് വിയോജിപ്പ് പ്രകടിപ്പിച്ചു. നമൻ ധീറിന്റെ ബാറ്റിങ് മികവിനെ ഉയർത്തിക്കാട്ടാനാണ് അദ്ദേഹം ശ്രമിച്ചത്. താരത്തിന്റെ ഷോട്ടുകളിലെ കൃത്യമായ ടൈമിങ് ഏറെ ശ്രദ്ധേയമാണെന്ന് കാർത്തിക് പറഞ്ഞു. ടീമിലെ ബാറ്റിങ് സ്ഥാനങ്ങളെക്കുറിച്ചും അദ്ദേഹം തന്റെ കാഴ്ചപ്പാട് വ്യക്തമാക്കി: ‘‘ഇഷാൻ കിഷനെ സംബന്ധിച്ച് സ്വാഭാവികമായ ബാറ്റിങ് പൊസിഷൻ മൂന്നാം നമ്പറാണ്. നിലവിൽ വിരാട് കോലിയാണ് ആ സ്ഥാനത്ത് കളിക്കുന്നത്. ശ്രേയസ് അയ്യർ നാലാം നമ്പറിലും കെ.എൽ. രാഹുൽ അഞ്ചാം നമ്പറിലുമാണ് ഇറങ്ങാറുള്ളത്. ഇങ്ങനെയുള്ളപ്പോൾ ഇഷാനെ ആറാം നമ്പറിലേക്ക് മാറ്റി കളിപ്പിക്കുന്നത് കൊണ്ട് പ്രയോജനമൊന്നുമില്ല. ഒന്നുകിൽ ഇഷാനെ ഓപ്പണറാക്കണം, അല്ലെങ്കിൽ മൂന്നാം നമ്പറിൽ അവസരം നൽകണം. ബാറ്റിങ് നിരയിൽ താഴേക്ക് ഇറക്കി കളിപ്പിക്കേണ്ട താരമല്ല ഇഷാൻ കിഷൻ,’’ കാർത്തിക് ഉറപ്പിച്ചു പറഞ്ഞു.
