കൊച്ചിയിൽ ട്രാഫിക് പൊലീസുകാരനെ ഇടിച്ചിട്ട സ്വകാര്യബസ്: ഡ്രൈവർ കസ്റ്റഡിയിൽ
കൊച്ചി നഗരമധ്യത്തിൽ അമിതവേഗതയിലെത്തിയ സ്വകാര്യ ബസ് ഇടിച്ചതിനെത്തുടർന്ന് ട്രാഫിക് പൊലീസുദ്യോഗസ്ഥന് ഗുരുതരമായി പരിക്കേറ്റു. ഡ്യൂട്ടിയിലുണ്ടായിരുന്ന സിവിൽ പോലീസ് ഓഫീസർ (സിപിഒ) ശ്രീദത്തിനെയാണ് ബസ് ഇടിച്ചുവീഴ്ത്തിയത്. ഇന്നലെ വൈകിട്ട് ഏഴരയോടെ ഹൈക്കോടതിക്ക് സമീപത്തായിരുന്നു സംഭവം അരങ്ങേറിയത്.
മേനക ഭാഗത്തുനിന്ന് അമിതവേഗത്തിലും അതീവ അശ്രദ്ധമായും പാഞ്ഞെത്തിയ ബസ്, ബാനർജി റോഡിലേക്ക് തിരിയുന്നതിനിടെ ട്രാഫിക് നിയന്ത്രണത്തിലുണ്ടായിരുന്ന ശ്രീദത്തിനെ ഇടിക്കുകയായിരുന്നു. പരിക്കേറ്റ ഉദ്യോഗസ്ഥൻ നിലവിൽ ചികിത്സയിലാണ്. അപകടത്തിന് കാരണമായ മഹാത്മ ബസും, വാഹനം ഓടിച്ചിരുന്ന കാക്കനാട് സ്വദേശി അനീഷും പോലീസ് പിടിയിലായിട്ടുണ്ട്.
കാക്കനാട് ഐഎംജി ജംഗ്ഷനിൽ വെച്ച് സ്വകാര്യ ബസ് ഇടിച്ച് ഇൻഫോപാർക്ക് ജീവനക്കാരി അക്ഷര മരണപ്പെട്ട സംഭവത്തിന്റെ നടുക്കം മാറും മുൻപേയാണ് വീണ്ടും സമാനമായ അപകടം നടക്കുന്നത്. സ്വകാര്യ ബസുകളുടെ മരണപ്പാച്ചിലിനെതിരെ വ്യാപകമായ പ്രതിഷേധങ്ങൾ ഉയരുന്നതിനിടെയാണ് കൊച്ചിയിൽ പുതിയ സംഭവം റിപ്പോർട്ട് ചെയ്തിരിക്കുന്നത്.
റോഡുകളിലെ സ്വകാര്യ ബസുകളുടെ അമിതവേഗതയ്‌ക്കെതിരെ കേരള ഹൈക്കോടതി തന്നെ രൂക്ഷമായ ഭാഷയിൽ വിമർശനം ഉന്നയിക്കുകയും, കർശന നടപടികൾ സ്വീകരിക്കാൻ കൊച്ചി കോർപ്പറേഷന് നിർദ്ദേശം നൽകുകയും ചെയ്തിരുന്നു. കോടതി ഉത്തരവിനും നിർദ്ദേശങ്ങൾക്കും പിന്നാലെ, ഹൈക്കോടതി പരിസരത്ത് വെച്ചുതന്നെ വീണ്ടും ഇത്തരമൊരു അപകടം സംഭവിച്ചത് അതീവ ഗൗരവമായാണ് അധികൃതർ നോക്കിക്കാണുന്നത്.
