ഇറാൻ മിസൈൽ കരുത്ത് പുറത്തുവിടാൻ ഒരുങ്ങുന്നു; ആണവ വിവരങ്ങൾ നൽകുന്നവർക്ക് 2 കോടി പാരിതോഷികം പ്രഖ്യാപിച്ച് യുഎസ്
ദുബായ് ∙ അമേരിക്കൻ ഭീഷണി ശക്തമാകുന്ന സാഹചര്യത്തിൽ ഏതുവിധത്തിലുള്ള യുദ്ധത്തെയും നേരിടാൻ രാജ്യം പൂർണ്ണ സജ്ജമാണെന്ന് ഇറാൻ വ്യക്തമാക്കി. വരും ആഴ്ചയിൽ തങ്ങളുടെ പുതിയ മിസൈൽ ശേഖരം ലോകത്തിന് മുന്നിൽ പ്രദർശിപ്പിക്കുമെന്ന് ഇറാനിയൻ സൈനിക നേതൃത്വം അറിയിച്ചു. അത്യാധുനിക മിസൈലുകൾ സൂക്ഷിച്ചിരിക്കുന്ന പുതിയ ‘മിസൈൽ നഗരത്തിന്റെ’ വിവരങ്ങളാണ് അധികൃതർ പുറത്തുവിട്ടത്. ഇറാൻ വികസിപ്പിച്ചെടുക്കുന്ന മിസൈൽ സാങ്കേതികവിദ്യയാണ് യുഎസുമായുള്ള തർക്കങ്ങളിൽ പ്രധാനമായും ഉയർത്തിക്കാട്ടപ്പെടുന്നത്.
ഇതിനിടെ, ഇറാന്റെ ആണവ പദ്ധതിയുമായി ബന്ധപ്പെട്ട നിർണ്ണായക വിവരങ്ങൾ കൈമാറുന്നവർക്ക് രണ്ട് കോടി ഡോളർ പാരിതോഷികം നൽകുമെന്ന് യുഎസ് പ്രഖ്യാപിക്കുകയുണ്ടായി. അതേസമയം, പശ്ചിമേഷ്യയിൽ സമാധാന ചർച്ചകൾ പരാജയപ്പെട്ടുവെന്ന രീതിയിൽ പ്രചരിക്കുന്ന വാർത്തകളെ മധ്യസ്ഥത വഹിക്കുന്ന ഖത്തർ തള്ളിക്കളഞ്ഞു. ചർച്ചകൾ ക്രിയാത്മകമായി മുന്നോട്ട് പോകുന്നുണ്ടെന്നും എത്രയും വേഗത്തിൽ മേഖലയിൽ സമാധാനം തിരികെ കൊണ്ടുവരാൻ സാധിക്കുമെന്നും ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൽ റഹ്മാൻ അൽ താനി പ്രത്യാശ പ്രകടിപ്പിച്ചു.
