വാഹനാപകടത്തിൽപ്പെടുന്നവർക്ക് 1.5 ലക്ഷം രൂപ വരെ സൗജന്യ ചികിത്സ: കേന്ദ്രത്തിന്റെ പിഎം റാഹത്ത് പദ്ധതി
വാഹനാപകടങ്ങളില്‍പ്പെടുന്നവരുടെ ജീവന്‍ സംരക്ഷിക്കുന്നതിനായി, ചികിത്സാച്ചെലവിനുള്ള പണം കൈവശമില്ലാത്തതിന്റെ പേരില്‍ ആര്‍ക്കും ആശുപത്രികളില്‍ നിന്ന് മടങ്ങിപ്പോകേണ്ടി വരില്ല. കേന്ദ്ര സര്‍ക്കാര്‍ ആവിഷ്കരിച്ച പി.എം റാഹത്ത് (PM RAHAT) പദ്ധതിയിലൂടെ 1.5 ലക്ഷം രൂപ വരെയുള്ള കാഷ്‌ലെസ്സ് ചികിത്സാ സൗകര്യം ഇപ്പോള്‍ ലഭ്യമാണ്. അപകടം നടന്നതുമുതല്‍ തുടർച്ചയായ 7 ദിവസത്തേക്ക് നിശ്ചിത സർക്കാർ-സ്വകാര്യ ആശുപത്രികളിൽ സൗജന്യ ചികിത്സ ഉറപ്പുവരുത്തുന്നതിനൊപ്പം, പരിക്കേറ്റവരെ ആശുപത്രിയിൽ എത്തിക്കുന്നവർക്ക് സമ്പൂർണ്ണ നിയമസുരക്ഷയും ഈ പദ്ധതി നൽകുന്നു.
പിഎം റാഹത്ത് പദ്ധതി: ഒരു ലഘുവിവരണം
റോഡപകടങ്ങളില്‍ അകപ്പെടുന്നവർക്ക് കൃത്യസമയത്ത് വൈദ്യസഹായം ലഭ്യമാക്കുക എന്ന ലക്ഷ്യത്തോടെ കേന്ദ്ര സര്‍ക്കാര്‍ ആവിഷ്കരിച്ചതാണ് റോഡ് ആക്സിഡന്റ് വിക്ടിംസ് ഹോസ്പിറ്റലൈസേഷന്‍ ആന്‍ഡ് അഷ്വേർഡ് ട്രീറ്റ്‌മെന്റ് സ്‌കീം (PM RAHAT). പണം കെട്ടിവെക്കാനില്ലാത്തതിന്റെ പേരില്‍ ചികിത്സ നിഷേധിക്കപ്പെടുന്ന ദൗർഭാഗ്യകരമായ സാഹചര്യങ്ങൾ പൂർണ്ണമായും ഒഴിവാക്കുകയാണ് ഇതിന്റെ പ്രാഥമിക ലക്ഷ്യം.
പദ്ധതിയുടെ പ്രധാന പ്രത്യേകതകൾ
അപകടത്തിൽ പെടുന്നവർക്ക് ചികിത്സയ്ക്കായി പണം ചെലവാക്കേണ്ടതില്ല എന്നതാണ് ഇതിലെ ഏറ്റവും വലിയ ആശ്വാസം. ഒരാൾക്ക് ഒന്നര ലക്ഷം രൂപ വരെയുള്ള ചികിത്സാ ചെലവ് സർക്കാർ ഏറ്റെടുക്കും. അപകടം നടന്ന തീയതി മുതൽ ഏഴ് ദിവസത്തേക്കാണ് ഈ ആനുകൂല്യം ലഭിക്കുക. സർക്കാർ ആശുപത്രികൾക്ക് പുറമെ, പദ്ധതിയുടെ ഭാഗമായ തിരഞ്ഞെടുക്കപ്പെട്ട സ്വകാര്യ ആശുപത്രികളിലും ഈ സേവനം ലഭ്യമാണ്. ചികിത്സ തുടങ്ങുന്നതിനായി പരിക്കേറ്റവരോ അവരുടെ ബന്ധുക്കളോ യാതൊരുവിധ അഡ്വാൻസ് തുകയും നൽകേണ്ടതില്ല.
എന്താണ് ചെയ്യേണ്ടത്?
അപകടം ശ്രദ്ധയിൽപ്പെട്ടാൽ ഉടൻതന്നെ 112 എന്ന ദേശീയ എമർജൻസി നമ്പറിലേക്ക് വിളിക്കുക. വിവരം ലഭിച്ചാലുടൻ തന്നെ ആംബുലൻസ് സ്ഥലത്തെത്തുകയും പരിക്കേറ്റവരെ ഏറ്റവും അടുത്തുള്ള അംഗീകൃത ആശുപത്രിയിൽ എത്തിക്കുകയും ചെയ്യും. ആശുപത്രി അധികൃതർ യാതൊരു നിബന്ധനകളുമില്ലാതെ ചികിത്സ നടപടികൾ ഉടൻ ആരംഭിക്കേണ്ടതാണ്.
പദ്ധതി നൽകുന്ന സുരക്ഷ
സാമ്പത്തിക ബാധ്യത ഭയന്ന് ചികിത്സ മുടങ്ങുന്ന അവസ്ഥ ഇതോടെ ചരിത്രമാവുകയാണ്. ചികിത്സാ ചെലവുകളെക്കുറിച്ചുള്ള ആശങ്കകൾ നീക്കി, പരിക്കേറ്റവരെ ആശുപത്രിയിൽ എത്തിക്കാൻ പൊതുജനങ്ങൾക്ക് കൂടുതൽ ആത്മവിശ്വാസം നൽകാൻ ഈ പദ്ധതി സഹായിക്കുന്നു.
സഹായിക്കുന്നവർക്കുള്ള നിയമപരിരക്ഷ
പരിക്കേറ്റവരെ ആശുപത്രിയിൽ എത്തിക്കുന്നവരെ സഹായിക്കാൻ ഇന്ത്യയിൽ ഗുഡ് സമരിറ്റൻ നിയമം (Good Samaritan Law) നിലവിലുണ്ട്. ഇവരെ സാക്ഷികളാക്കാൻ നിർബന്ധിക്കാനോ, ക്രിമിനൽ അല്ലെങ്കിൽ സിവിൽ കേസുകളിൽ പ്രതികളാക്കാനോ നിയമം അനുവദിക്കുന്നില്ല. സഹായിക്കുന്നവരോട് വ്യക്തിഗത വിവരങ്ങൾ ചോദിക്കാനോ ആശുപത്രി ചെലവുകൾക്കായി പണം ആവശ്യപ്പെടാനോ ആശുപത്രി അധികൃതർക്ക് അധികാരമില്ല.
ശ്രദ്ധിക്കുക
ജീവനെ രക്ഷിക്കാൻ നിർണ്ണായകമായ ‘ഗോൾഡൻ അവർ’ (Golden Hour) പരമാവധി പ്രയോജനപ്പെടുത്താൻ ശ്രമിക്കുക. അടിയന്തര സാഹചര്യത്തിൽ എന്ത് ചെയ്യണമെന്ന് അറിയാൻ 112 എന്ന ഹെൽപ്പ്‌ലൈൻ നമ്പറിൽ ബന്ധപ്പെടാം. എന്നാൽ, 1.5 ലക്ഷം രൂപയോ 7 ദിവസത്തെ ചികിത്സയോ കഴിഞ്ഞുള്ള തുടർചികിത്സകൾക്ക് ഈ ആനുകൂല്യം ലഭ്യമായിരിക്കില്ല എന്ന കാര്യം പ്രത്യേകം ഓർക്കുക.
