NEWS
ഷെയ്ഖ് ഹസീനയുടെ പാസ്‌പോർട്ട് അപേക്ഷ തള്ളി ബംഗ്ലാദേശ് സർക്കാർ
ന്യൂഡൽഹി ∙ അടുത്ത മാസം സ്വന്തം നാട്ടിലേക്ക് തിരികെ പോകാൻ തയാറെടുക്കുന്ന ബംഗ്ലദേശ് മുൻ പ്രധാനമന്ത്രി ഷെയ്ഖ് ഹസീനയുടെ പാസ്‌പോർട്ട്, ദേശീയ തിരിച്ചറിയൽ കാർഡ് എന്നിവയ്ക്കായുള്ള അപേക്ഷകൾ തള്ളിക്കളഞ്ഞു. ലണ്ടനിലെ ഒരു നിയമസഹായ സ്ഥാപനം വഴി ഡൽഹിയിലെ ബംഗ്ലദേശ് ഹൈക്കമ്മിഷനിൽ സമർപ്പിച്ച അപേക്ഷയാണ് നിരസിക്കപ്പെട്ടത്. 2024 ഓഗസ്റ്റ് മാസത്തിൽ രാജ്യത്ത് നടന്ന ശക്തമായ വിദ്യാർഥി പ്രക്ഷോഭത്തിനൊടുവിൽ അധികാരം ഒഴിഞ്ഞ എഴുപത്തിയൊമ്പതുകാരിയായ ഹസീന നിലവിൽ ഇന്ത്യയിലാണ് താമസം.
ഹസീനയുടെ ഈ നടപടിക്കെതിരെ ബംഗ്ലദേശ് വിദേശകാര്യ സഹമന്ത്രി ഹുമയൂൺ കബിർ ഉൾപ്പെടെയുള്ളവർ രൂക്ഷമായ ഭാഷയിലാണ് പ്രതികരിച്ചത്. വധശിക്ഷയ്ക്കു വിധിക്കപ്പെട്ട ഒരാൾക്ക് പാസ്‌പോർട്ട് നൽകാൻ കഴിയില്ലെന്നും, ഭീകരവാദ ആരോപണങ്ങൾ നേരിടുന്നവർക്ക് ഇത്തരമൊരു സൗകര്യം അനുവദിക്കാനാവില്ലെന്നുമാണ് അദ്ദേഹം വ്യക്തമാക്കിയത്.
