പ്ലോട്ട് സബ്‌ഡിവിഷൻ പെർമിറ്റ് ലഭിച്ച ഭൂമി ഉടൻ വിൽക്കുന്നതിൽ നിയമതടസ്സങ്ങളുണ്ടോ?
ഭൂമി വിഭജിക്കുന്നതിനായി പെർമിറ്റ് കരസ്ഥമാക്കുകയും, നിബന്ധനകൾ പാലിച്ച് സബ്ഡിവൈഡ് ചെയ്യുകയും ചെയ്ത ശേഷം ആ പ്ലോട്ടുകൾ ഉടൻ തന്നെ വില്‍പ്പന നടത്താൻ സാധിക്കുമോ? കെട്ടിടനിർമാണ ചട്ടങ്ങൾ പ്രകാരം, ഏതൊരു ഭൂവികസന പ്രക്രിയയിലും പ്ലോട്ട് വിഭജനം ഉൾപ്പെടുന്നുണ്ടെങ്കിൽ ചട്ടം 5 (1) (a) അനുസരിച്ച് കൃത്യമായ ഫോമിൽ അപേക്ഷ സമർപ്പിക്കേണ്ടതുണ്ട്. ലൈസൻസി സാക്ഷ്യപ്പെടുത്തിയ പ്ലാനുകളും ചട്ടത്തിൽ അനുശാസിക്കുന്ന അനുബന്ധ രേഖകളും ഇതിനൊപ്പം സെക്രട്ടറിയുടെ മുമ്പാകെ സമർപ്പിക്കണം. എന്നാൽ 0.5 ഹെക്ടറിൽ താഴെ വിസ്തീർണമുള്ള ഭൂമി പത്തോ അതിൽ കുറവോ പ്ലോട്ടുകളായി തിരിക്കുകയാണെങ്കിൽ ഇതിൽ ഇളവുണ്ട്. ഇതൊഴികെയുള്ള എല്ലാ തരം വിഭജനങ്ങൾക്കും ലേഔട്ട് അനുമതി നിർബന്ധമാണ്, കൂടാതെ പ്ലാനുകൾ ചട്ടം 31-ലെ വ്യവസ്ഥകൾക്ക് അനുസൃതമായിരിക്കുകയും വേണം.
ഡെവലപ്‌മെന്റ് പെർമിറ്റ് കരസ്ഥമാക്കി നിശ്ചിത മാനദണ്ഡങ്ങൾ പാലിച്ച് ഭൂമി വികസിപ്പിച്ച ശേഷം, സ്ഥലമുടമകൾ കംപ്ലീഷൻ റിപ്പോർട്ട് സെക്രട്ടറിക്ക് നൽകേണ്ടതുണ്ട്. സെക്രട്ടറി ഈ റിപ്പോർട്ട് പരിശോധിച്ച് ബോധ്യപ്പെട്ടാൽ ഡെവലപ്‌മെന്റ് സർട്ടിഫിക്കറ്റ് അനുവദിക്കും. ഇതിനുശേഷം മാത്രമേ പ്ലോട്ടുകൾ വിൽക്കാൻ നിയമപരമായ അനുവാദമുള്ളൂ. ചട്ടം 3 (1) (d) പ്രകാരം, നിയമവിരുദ്ധമായി സബ്ഡിവൈഡ് ചെയ്ത പ്ലോട്ടുകളിൽ കെട്ടിടം പണിയാൻ അപേക്ഷ നൽകിയാൽ സെക്രട്ടറിക്ക് അനുമതി നൽകാൻ സാധിക്കില്ല. അനധികൃതമായി വിഭജിച്ച ഭൂമിയിൽ നിർമാണപ്രവർത്തനങ്ങൾ നടത്താൻ അനുവാദം നൽകാൻ പാടുള്ളതല്ല.
റസിഡൻഷ്യൽ പ്ലോട്ട് വിഭജന വേളയിൽ എപ്പോഴാണ് റിക്രിയേഷണൽ ഓപ്പൺ സ്‌പേസ് (Recreational Open Space) നീക്കിവെക്കേണ്ടത് എന്നതിനെക്കുറിച്ച് പലർക്കും സംശയമുണ്ട്. ചട്ടം 31 (1) പ്രകാരം, പ്ലോട്ടിന്റെ വിസ്തീർണം നിശ്ചിത പരിധിയിൽ കൂടുതലാവുകയും, ഒപ്പം പ്രസ്തുത സ്ഥലം പത്തിൽ കൂടുതൽ പ്ലോട്ടുകളായി വിഭജിക്കുകയും ചെയ്യുമ്പോഴാണ് റിക്രിയേഷണൽ ഓപ്പൺ സ്‌പേസ് നിർബന്ധമായും നൽകേണ്ടത്. ഈ രണ്ട് നിബന്ധനകളും ഒരുമിച്ച് പാലിക്കപ്പെടുന്ന സന്ദർഭങ്ങളിൽ മാത്രമേ ഈ നിയമം ബാധകമാകൂ.
വിവരങ്ങൾക്ക് കടപ്പാട്: KMBR-2019, KPBR-2019 ബിൽഡിങ് റൂൾസ്.
