NEWS
ഇടുക്കി കലക്ടറേറ്റിൽ യുവതിയുടെ ആത്മഹത്യാ ഭീഷണി: പരിഭ്രാന്തിയിൽ ജീവനക്കാർ
ചെറുതോണി ∙ തന്നെ ഭൂമി കയ്യേറിയവളായി മുദ്രകുത്തിയതിൽ മനംനൊന്ത്, ഇടുക്കി കലക്ടറേറ്റിലെത്തി ജീവനൊടുക്കുമെന്ന് ആദിവാസി യുവതി ഭീഷണി മുഴക്കിയത് അധികൃതരെയും പൊലീസിനെയും ഒരുപോലെ പ്രതിസന്ധിയിലാക്കി. ചിന്നക്കനാൽ സിങ്കുകണ്ടം 301 കോളനിയിൽ രണ്ട് പതിറ്റാണ്ടായി താമസിച്ചുവരുന്ന ഓമന മേഴ്സിയാണ് ഇത്തരമൊരു വെല്ലുവിളിയുമായി രംഗത്തെത്തിയത്.
കൈവശമുള്ള ഒരേക്കർ സ്ഥലത്ത് ഏലം കൃഷി ചെയ്ത് ഉപജീവനം നടത്തിവരികയാണ് ഓമന. എന്നാൽ, സർക്കാർ ഭൂമിയായ അഞ്ചേക്കർ സ്ഥലം ഇവർ അനധികൃതമായി കൈവശപ്പെടുത്തിയിട്ടുണ്ടെന്ന് ഉദ്യോഗസ്ഥർ ആരോപിച്ചതാണ് യുവതിയെ കടുത്ത മാനസിക സംഘർഷത്തിലാക്കിയത്. വനംവകുപ്പ് അധികൃതർ തനിക്കെതിരെ തെറ്റായ റിപ്പോർട്ട് നൽകി കയ്യേറ്റക്കാരിയായി ചിത്രീകരിച്ചുവെന്നാണ് ഓമനയുടെ പ്രധാന പരാതി.
