രാമായണം: യഷിന്റെ ഏഴ് കിലോ സ്വർണ്ണാഭരണങ്ങളും സിംഹാസനത്തിലെ കോടികളുടെ പണിയും
ചിത്രത്തിൽ രാവണനായെത്തിയ യഷ് സിംഹാസനത്തിൽ ഇരിക്കുന്നു
നിതീഷ് തിവാരിയുടെ സംവിധാനത്തിൽ നമിത് മൽഹോത്ര നിർമ്മാണം നിർവഹിച്ച് രൺബീർ കപൂർ മുഖ്യവേഷത്തിലെത്തുന്ന ബ്രഹ്മാണ്ഡ ചിത്രം ‘രാമായണം’ പ്രേക്ഷകർക്കിടയിൽ വലിയ തരംഗമാണ് സൃഷ്ടിച്ചുകൊണ്ടിരിക്കുന്നത്. ലങ്കാധിപതി രാവണനായി വെള്ളിത്തിരയിലെത്തുന്നത് റോക്കിംഗ് സ്റ്റാർ യഷ് ആണ്. അഭിനേതാക്കളുടെ പ്രകടനത്തിനപ്പുറം ചിത്രത്തിന്റെ ദൃശ്യവിസ്മയമൊരുക്കുന്നതിൽ അണിയറപ്രവർത്തകരുടെ അധ്വാനം ചെറുതല്ല. രാവണന്റെ ആഢ്യത്വം വിളിച്ചോതുന്ന സിംഹാസനത്തിന്റെ നിർമ്മാണ രഹസ്യങ്ങളാണ് ഇപ്പോൾ ചർച്ചയാകുന്നത്. ആർട്ട് ഡയറക്ടർ രമേശ്, ഹൗസ് ഓഫ് അമ്രപാലിയുടെ ക്രിയേറ്റീവ് ഹെഡ് തരംഗ് അറോറ എന്നിവരാണ് ഇതിന്റെ പിന്നാമ്പുറ കഥകൾ പങ്കുവെച്ചത്.
മൺകട്ടയിൽ രൂപകൽപ്പന ചെയ്ത മാതൃകയിൽ നിന്നാണ് രാവണന്റെ സിംഹാസനം യാഥാർത്ഥ്യമാക്കിയത്. ഇതിൽ നിന്ന് അച്ചുകൾ (മോൾഡ്) നിർമിച്ച് ഫൈബർ ഉപയോഗിച്ച് കടുപ്പമേറിയ ഘടന തയ്യാറാക്കി. രാജകീയമായ പ്രൗഢി നൽകാനായി 24 കാരറ്റ് സ്വർണ്ണത്തിന്റെ നേർത്ത പാളികളാണ് ഇതിൽ പതിച്ചിരിക്കുന്നത്. ഏകദേശം ഒരു കോടി രൂപയോളം ചെലവഴിച്ചാണ് ഈ സിംഹാസനം ഒരുക്കിയെടുത്തത്.
രാവണന്റെ ഗാംഭീര്യം വർദ്ധിപ്പിക്കാനായി 13 വ്യത്യസ്ത വേഷവിധാനങ്ങളിലായി 104 മുതൽ 130 വരെ ആഭരണങ്ങളാണ് ഡിസൈൻ ചെയ്തിരിക്കുന്നത്. പരമശിവ ഭക്തനായ രാവണന്റെ സ്വഭാവത്തിനനുസൃതമായി ആഭരണങ്ങളിൽ സർപ്പചിഹ്നങ്ങൾ ഉൾപ്പെടുത്തിയിട്ടുണ്ട്. കടും നീല, കറുപ്പ്, പച്ച നിറങ്ങളാണ് ഡിസൈനുകളിൽ പ്രധാനമായും ഉപയോഗിച്ചത്. വിദഗ്ധരായ കരകൗശലത്തൊഴിലാളികൾ കൈകൊണ്ട് നിർമ്മിച്ച ചെസ്റ്റ് പ്ലേറ്റ് ആണ് ഇതിൽ ഏറ്റവും സങ്കീർണ്ണമായ സൃഷ്ടി. മണിക്കൂറുകളോളം ധരിക്കുമ്പോൾ നടന് അസ്വസ്ഥതയുണ്ടാകാതിരിക്കാൻ പ്രത്യേക ലൈനിംഗുകൾ ഇതിൽ നൽകിയിട്ടുണ്ട്. യഷ് അണിഞ്ഞ ഓരോ ആഭരണങ്ങൾക്കും ആറ് മുതൽ ഏഴ് കിലോ വരെ ഭാരമുണ്ടായിരുന്നു എന്നത് ശ്രദ്ധേയമാണ്.
