വിനോദ കാഴ്ചകളുടെ വിരുന്ന്: സിനിമ റിവ്യൂ
രോമാഞ്ചം, ആവേശം എന്നീ ശ്രദ്ധേയമായ ചിത്രങ്ങൾക്ക് ശേഷം ജിത്തു മാധവൻ സംവിധാനം ചെയ്യുന്ന പുതിയ ചിത്രമാണ് സീൻ. തമിഴിലെ തന്റെ ആദ്യ സംവിധാന സംരംഭത്തിൽ സൂപ്പർതാരം സൂര്യയെ നായകനാക്കിയ ജിത്തു, മുൻകാല സൂര്യ ചിത്രങ്ങളിലെ പ്രശസ്തമായ സംഭാഷണങ്ങളും സന്ദർഭങ്ങളും കോർത്തിണക്കാൻ പ്രത്യേകം ശ്രദ്ധിച്ചിട്ടുണ്ട്. നസ്രിയ നായികയായും നസ്‌ലെൻ വില്ലൻ വേഷത്തിലുമാണ് ചിത്രത്തിൽ പ്രത്യക്ഷപ്പെടുന്നത്.
തന്റെ മുൻ ചിത്രങ്ങളായ ആവേശവും രോമാഞ്ചവും നൽകിയ അതേ തനിമയും ആവേശവും തന്നെയാണ് ജിത്തു മാധവൻ സീനിലും നിലനിർത്തിയിരിക്കുന്നത്. ‘സീൻ’ എന്ന പേര് എന്തുകൊണ്ട് തിരഞ്ഞെടുത്തു എന്നത് ചിത്രം കണ്ടു കഴിയുമ്പോൾ മാത്രമെ പ്രേക്ഷകർക്ക് പൂർണ്ണമായി ബോധ്യമാകൂ. ചിത്രത്തിന്റെ പ്രമേയത്തോട് നൂറു ശതമാനം നീതി പുലർത്തുന്നതാണ് ഈ നാമകരണം.
ചില പ്രത്യേക സാഹചര്യങ്ങളാൽ ഔദ്യോഗിക കൃത്യനിർവ്വഹണത്തിൽ നിന്ന് വിട്ടുനിൽക്കുന്ന ഡിഎസ്പി ഇൻപരാജ്, ഒരു കേസിന്റെ പുനരന്വേഷണത്തിനായി തിരിച്ചെത്തുന്നതും, തുടർന്ന് ഒരു സീരിയൽ കില്ലറെ പിടികൂടാനുള്ള അദ്ദേഹത്തിന്റെ ശ്രമങ്ങളുമാണ് രണ്ടര മണിക്കൂർ നീളുന്ന ഈ സിനിമയുടെ ഇതിവൃത്തം. സാധാരണ ക്രൈം ത്രില്ലറുകളിൽ നിന്നും സീരിയൽ കില്ലർ ചിത്രങ്ങളിൽ നിന്നും വേറിട്ടൊരു ശൈലിയാണ് ചിത്രം പിന്തുടരുന്നത്. ആദ്യ പകുതിയിൽ നർമ്മത്തിന് മുൻഗണന നൽകുന്ന ചിത്രം, രണ്ടാം പകുതിയിലേക്ക് കടക്കുമ്പോൾ കൂടുതൽ ത്രില്ലിംഗും ആകർഷകവുമായി മാറുന്നു. എങ്കിലും, ആ വേഗത ഉടനീളം നിലനിർത്താൻ ചിത്രത്തിന് സാധിക്കുന്നില്ല. സീരിയൽ കില്ലറെ തുടക്കത്തിലേ തന്നെ വെളിപ്പെടുത്തുന്നതുകൊണ്ട്, മറ്റ് പല ഘടകങ്ങളെ ആശ്രയിച്ചാണ് സിനിമ മുന്നോട്ട് നീങ്ങുന്നത്. ചിത്രത്തിന്റെ ക്ലൈമാക്സ് ഭാഗങ്ങൾ മുൻകൂട്ടി പ്രവചിക്കാവുന്നവയും തീവ്രത കുറഞ്ഞതുമായി അനുഭവപ്പെട്ടു.
ഇൻപരാജ് എന്തിനാണ് ജോലിയിൽ നിന്ന് മാറിനിൽക്കുന്നത് എന്നത് ചിത്രത്തിലെ പ്രധാന സസ്പെൻസുകളിൽ ഒന്നാണ്. ഈശ്വരൻ എന്ന സീരിയൽ കില്ലറായി നസ്‌ലെൻ എത്തുമ്പോൾ, ഇൻപരാജിന്റെ സഹായിയായ മായയെ നസ്രിയ അവതരിപ്പിക്കുന്നു. ചിരിച്ചു കൊണ്ട് ക്രൂരതകൾ ചെയ്യുന്ന വില്ലനായി തമിഴിലെ തന്റെ അരങ്ങേറ്റത്തിൽ നസ്‌ലെൻ മികച്ച പ്രകടനമാണ് കാഴ്ചവെച്ചത്. ഈശ്വരൻ എന്ന കഥാപാത്രത്തിനായി നസ്‌ലെൻ നടത്തിയ സംഭാഷണ ശൈലിയും ശാരീരിക ചലനങ്ങളും ഏറെ വ്യത്യസ്തമായിരുന്നു. സൂര്യയ്ക്ക് ഒപ്പത്തിനൊപ്പം നിൽക്കുന്ന പ്രകടനമാണ് നസ്രിയ കാഴ്ചവെച്ചത്; പ്രത്യേകിച്ച് ആക്ഷൻ രംഗങ്ങളിൽ നസ്രിയ തകർപ്പൻ പ്രകടനം പുറത്തെടുത്തു.
പ്രേക്ഷകർ ഇഷ്ടപ്പെടുന്ന സൂര്യയുടെ ലുക്കിലും അവതരണത്തിലുമാണ് സംവിധായകൻ ഇൻപരാജിനെ ഒരുക്കിയിരിക്കുന്നത്. ലാൽ, ആനന്ദരാജ്, രാജ് പ്രിയൻ എന്നിവർക്കൊപ്പം മലയാളത്തിലെ പ്രമുഖ യുവതാരത്തിന്റെ അതിഥി വേഷവും എടുത്തു പറയേണ്ട ഒന്നാണ്. സുഷിൻ ശ്യാമിന്റെ സംഗീതവും പശ്ചാത്തല സംഗീതവും തമിഴകത്തും മാന്ത്രികത നിറയ്ക്കുന്നു. ചിത്രത്തിന്റെ ആസ്വാദ്യത വർദ്ധിപ്പിക്കുന്നതിൽ സുഷിന്റെ സംഗീതം വലിയ പങ്കുവഹിക്കുന്നുണ്ട്. തിയേറ്ററിലെത്തി സീൻ കണ്ടു ആസ്വദിക്കാൻ പ്രേക്ഷകർക്ക് ധൈര്യമായി ടിക്കറ്റെടുക്കാവുന്നതാണ്.
