നൈറ്റ് ഡ്യൂട്ടിക്ക് ശേഷമുള്ള ഹാജർ: പൊലീസ് ഉദ്യോഗസ്ഥർക്കുള്ള ഉത്തരവ് പിൻവലിച്ചു
പൊലീസ് ജീപ്പ്
കോഴിക്കോട്: രാത്രികാല ജോലിയിൽ ഏർപ്പെടുന്ന പൊലീസുകാർ പിറ്റേദിവസം രാവിലെ പതിനൊന്ന് മണിക്ക് തന്നെ ഓഫീസിൽ ഹാജരാകണമെന്ന കോഴിക്കോട് ഡിസിപിയുടെ വിവാദമായ ഉത്തരവ് അധികൃതർ പിൻവലിച്ചു. രാത്രി ഷിഫ്റ്റ് കഴിഞ്ഞ് മതിയായ വിശ്രമം ലഭിക്കാതെ രാവിലെ പതിനൊന്നോടെ തന്നെ ജോലിക്കെത്തണമെന്ന ഡിസിപി പദംസിംഗിന്റെ നിർദേശം വലിയ വിമർശനങ്ങൾക്ക് വഴിവെച്ചിരുന്നു. ഇതേത്തുടർന്നാണ് തീരുമാനം തിരുത്തിക്കൊണ്ട് പുതിയ ഉത്തരവിറക്കിയത്. ഇതനുസരിച്ച് രാത്രി ഡ്യൂട്ടി ചെയ്യുന്നവർക്ക് തൊട്ടടുത്ത ദിവസം വൈകിട്ട് നാല് മണിക്ക് ജോലിയിൽ പ്രവേശിച്ചാൽ മതിയാകും.
രാവിലെ പതിനൊന്നിന് ഡ്യൂട്ടിക്ക് ഹാജരായില്ലെങ്കിൽ കർശനമായ വകുപ്പുതല നടപടികൾ സ്വീകരിക്കുമെന്നായിരുന്നു മുൻ ഉത്തരവിൽ വ്യക്തമാക്കിയിരുന്നത്. സാധാരണയായി പുലർച്ചെ ആറ് മണി വരെയാണ് രാത്രി ഡ്യൂട്ടി സമയം. വിശ്രമത്തിന് പോലും സമയം നൽകാതെ പതിനൊന്നുമണിക്ക് തന്നെ വീണ്ടും ജോലിക്ക് വരണമെന്ന കർശന നിർദേശം പൊലീസുകാർക്കിടയിൽ വലിയ മാനസികവും ശാരീരികവുമായ പ്രയാസങ്ങൾക്ക് കാരണമായിരുന്നു. സേനയ്ക്കുള്ളിൽ ഉയർന്ന പ്രതിഷേധങ്ങളെ തുടർന്നാണ് ഉത്തരവിൽ ഭേദഗതി വരുത്തിയത്. അതേസമയം, അടിയന്തര സാഹചര്യങ്ങൾ ഉണ്ടായാൽ ഈ ഇളവ് ബാധകമല്ലെന്നും അത്തരം അവസരങ്ങളിൽ ആവശ്യാനുസരണം ജോലിക്കെത്താൻ തയ്യാറായിരിക്കണമെന്നും പുതിയ ഉത്തരവിൽ മുന്നറിയിപ്പും നൽകിയിട്ടുണ്ട്.
