ജയിലിൽ പോകുമ്പോൾ അസുഖം, പുറത്തിറങ്ങിയാൽ വിദേശയാത്ര: തച്ചങ്കരിക്കെതിരെ കോടതിയുടെ രൂക്ഷവിമർശനം
ടോമിൻ ജെ തച്ചങ്കരിയെ കോട്ടയം വിജിലൻസ് കോടതിയിൽ നിന്നും പോലീസ് സെൻട്രൽ ജയിലിലേക്ക് കൊണ്ടുപോയപ്പോൾ (ഫോട്ടോ: സെബിൻ ജോർജ്)
കൊച്ചി: വിദേശത്തു ജോലിയിൽ പ്രവേശിക്കാൻ അനുമതി തേടിക്കൊണ്ട് മുൻ ഡിജിപി ടോമിൻ ജെ തച്ചങ്കരി സമർപ്പിച്ച ഹർജി പരിഗണിക്കവെ ഹൈക്കോടതിയുടെ രൂക്ഷ വിമർശനം. താൻ ഒരു ദിവസം പോലും ജയിൽവാസമനുഭവിച്ചിട്ടില്ലെന്ന് തച്ചങ്കരിയുടെ അഭിഭാഷകൻ സൂചിപ്പിച്ചപ്പോൾ, ഗുരുതരമായ രോഗാവസ്ഥയിലാണെന്ന് അവകാശപ്പെട്ട വ്യക്തി എങ്ങനെ വിദേശത്ത് പോയി ജോലി ചെയ്യുമെന്ന മറുചോദ്യമാണ് കോടതി ഉന്നയിച്ചത്. തെറ്റായ വിവരങ്ങൾ കോടതിയെ ബോധിപ്പിച്ചാൽ ജാമ്യം റദ്ദാക്കേണ്ടി വരുമെന്ന് ജസ്റ്റിസ് എ ബദറുദ്ദീൻ മുന്നറിയിപ്പ് നൽകി.
‘ശിക്ഷാവിധി വന്ന ശേഷം അസുഖമുണ്ടെന്ന് പറഞ്ഞ് ആശുപത്രിയിൽ കഴിഞ്ഞ ആളാണ് ഇദ്ദേഹം. അസുഖബാധിതനായ ഒരാൾക്ക് എങ്ങനെയാണ് വിദേശത്ത് പോയി ജോലി ചെയ്യാൻ സാധിക്കുന്നത്? ജയിലിൽ പോകേണ്ടി വരുമ്പോൾ അസുഖം വരികയും പുറത്തിറങ്ങിയാൽ വിദേശത്ത് പോയി ജോലിക്ക് ശ്രമിക്കുകയും ചെയ്യുന്ന സ്ഥിതിവിശേഷം അംഗീകരിക്കാനാവില്ല. കോടതിയെ തെറ്റിദ്ധരിപ്പിക്കാൻ ശ്രമിക്കരുതെന്ന് തച്ചങ്കരി ഓർക്കണമായിരുന്നു,’ – ജസ്റ്റിസ് എ ബദറുദ്ദീൻ വിമർശനത്തിൽ വ്യക്തമാക്കി.
ഔദ്യോഗിക പദവിയിലിരുന്നുകൊണ്ട് 2003 മുതൽ 2007 വരെയുള്ള കാലയളവിൽ വരുമാനത്തിൽ കവിഞ്ഞ സ്വത്ത് സമ്പാദിച്ചു എന്ന കേസിലാണ് മുൻ ഡിജിപിയായ തച്ചങ്കരിയെ കഴിഞ്ഞ സെപ്‌തംബർ 17-ന് കോട്ടയം വിജിലൻസ് കോടതി കുറ്റക്കാരനെന്ന് കണ്ടെത്തി ശിക്ഷിച്ചത്. നാല് വർഷം കഠിന തടവും 30.84 ലക്ഷം രൂപ പിഴയുമാണ് കോടതി അന്ന് വിധിച്ചിരുന്നത്.
പിന്നീട് ഒക്‌ടോബർ 15-ന് ഹൈക്കോടതി ഈ ശിക്ഷാവിധി മരവിപ്പിച്ചുകൊണ്ട് അദ്ദേഹത്തിന് ജാമ്യം അനുവദിക്കുകയായിരുന്നു. അപ്പീൽ തീർപ്പാക്കുന്നത് വരെ കീഴ്ക്കോടതിയുടെ ശിക്ഷാ നടപടികൾ താൽക്കാലികമായി നിർത്തിവെക്കണമെന്ന ഹർജിയിലായിരുന്നു ഹൈക്കോടതിയുടെ ഈ ഇടപെടൽ. ഈ ജാമ്യ വ്യവസ്ഥയിൽ ഇളവ് ആവശ്യപ്പെട്ടുകൊണ്ടാണ് വിദേശത്ത് ജോലിക്ക് പോകാനുള്ള അനുമതി തേടി അദ്ദേഹം വീണ്ടും കോടതിയെ സമീപിച്ചത്.
