ബാധ ഒഴിപ്പിക്കലിന്റെ മറവിൽ പീഡനം: യുട്യൂബർക്കെതിരെ നടപടി, സ്ഥാപനം പൂട്ടിയിട്ടു
ഓച്ചിറ ∙ മുത്തശ്ശിയുടെ ശരീരത്തിലുള്ള ബാധയൊഴിപ്പിക്കാം എന്ന വ്യാജേന പതിനാറുകാരിയെ ലൈംഗികമായി ചൂഷണം ചെയ്ത സംഭവത്തിൽ, പ്രതിയായ മതപാഠശാലാ ഡയറക്ടറുടെ മേമനയിലുള്ള സ്ഥാപനം അധികൃതർ പൂട്ടിപ്പിച്ചു. ഐസിഡിഎസ് സൂപ്പർവൈസർ, വാർഡ് തല ജാഗ്രതാ സമിതി അംഗങ്ങൾ, ഒപ്പം ഓച്ചിറ പോലീസ് എന്നിവർ സംയുക്തമായി നടത്തിയ പരിശോധനയ്ക്ക് ശേഷമാണ് സ്ഥാപനം താൽക്കാലികമായി അടച്ചുപൂട്ടാൻ നടപടിയെടുത്തത്. സ്ഥാപനത്തിന്റെ മറവിൽ നടന്നുവന്ന സാമ്പത്തിക ഇടപാടുകൾ, ഭൂമി വാങ്ങൽ തുടങ്ങിയ വിഷയങ്ങളിൽ പോലീസ് വിശദമായ അന്വേഷണം ആരംഭിച്ചിട്ടുണ്ട്.
കായംകുളം പുതുപ്പള്ളി കൊച്ചയ്യത്ത് പടീറ്റതിൽ മുഹമ്മദ് നിയാസ് (34) എന്ന വ്യക്തിയാണ് ഈ സ്ഥാപനം നടത്തിയിരുന്നത്. യുട്യൂബർ കൂടിയായ ഇയാളുടെ കീഴിലുള്ള ഈ കേന്ദ്രത്തിൽ നാൽപതോളം വിദ്യാർത്ഥികളാണ് താമസിച്ച് പഠനം നടത്തുന്നത്. തിരുവനന്തപുരത്തുനിന്നും മുത്തശ്ശിയോടൊപ്പം എത്തിയ പതിനാറുകാരിയെ മുഹമ്മദ് നിയാസ് ലൈംഗികമായി പീഡനത്തിനിരയാക്കിയെന്നാണ് പോലീസിന്റെ കണ്ടെത്തൽ.
