ശ്വാസകോശത്തിൽ വെള്ളം കെട്ടിക്കിടക്കുന്ന അവസ്ഥ: പൾമനറി എഡീമയും ആരോഗ്യ ഭീഷണികളും
ശ്വാസം കിട്ടാതെ ബുദ്ധിമുട്ടുന്ന അവസ്ഥ തിരിച്ചറിയുമ്പോഴേക്കും പലപ്പോഴും കാര്യങ്ങൾ കൈവിട്ടുപോയിട്ടുണ്ടാകും. ശ്വാസകോശത്തെ ബാധിക്കുന്ന പല രോഗാവസ്ഥകളും പെട്ടെന്ന് അതീവ ഗുരുതരമായി മാറാൻ സാധ്യതയുണ്ട്. അത്തരത്തിൽ ഒന്നാണ് പൾമനറി എഡീമ. ശ്വാസകോശത്തിൽ അമിതമായി ദ്രാവകം നിറയുന്ന ഈ അവസ്ഥ ചിലരിൽ പതിയെയും മറ്റു ചിലരിൽ വളരെ പെട്ടെന്നുമാണ് കണ്ടുവരുന്നത്. ശരിയായ സമയത്ത് വിദഗ്ധ ചികിത്സ ലഭിച്ചില്ലെങ്കിൽ ഇത് ജീവന് തന്നെ ഭീഷണിയാകാം.
ശ്വാസകോശത്തിലെ കുഞ്ഞൻ വായുസഞ്ചികളെയാണ് ആൽവിയോളികൾ എന്ന് പറയുന്നത്. നാം ശ്വാസം ഉള്ളിലേക്ക് എടുക്കുമ്പോൾ രക്തത്തിലേക്ക് ഓക്സിജൻ എത്തിക്കുന്നതും, തിരിച്ചുള്ള പ്രക്രിയയിൽ രക്തത്തിലെ കാർബൺ ഡൈഓക്സൈഡ് പുറന്തള്ളുന്നതും ഈ ആൽവിയോളികളിലൂടെയാണ്. എന്നാൽ, ഇവിടെ അസാധാരണമായി ദ്രാവകം കെട്ടിക്കിടന്നാൽ ഓക്സിജൻ രക്തത്തിലേക്ക് കലരുന്ന സ്വാഭാവിക പ്രക്രിയ തടസ്സപ്പെടുന്നു. ഇതാണ് പൾമനറി എഡീമയുടെ കാതൽ. ശ്വസനപ്രയാസവും ശരീരത്തിന് ആവശ്യമായ ഓക്സിജൻ ലഭിക്കാത്തതുമാണ് ഇതിന്റെ പ്രധാന പ്രത്യാഘാതങ്ങൾ.
ഹൃദയത്തിന്റെ പ്രവർത്തനത്തിലുണ്ടാകുന്ന താളപ്പിഴകളാണ് പൾമനറി എഡീമയുടെ പ്രധാന കാരണങ്ങളിലൊന്ന്. ഹൃദയത്തിന് രക്തം കാര്യക്ഷമമായി പമ്പ് ചെയ്യാൻ കഴിയാതെ വരുമ്പോൾ, ശ്വാസകോശത്തിലെ രക്തക്കുഴലുകളിൽ സമ്മർദം കൂടുകയും അതിൽനിന്ന് ദ്രാവകം വായുസഞ്ചികളിലേക്ക് ചോർന്നൊലിക്കുകയും ചെയ്യുന്നു. ഹൃദയാഘാതം, ഹൃദയപേശികളുടെ ബലക്ഷയം, വാൽവ് തകരാറുകൾ, ക്രമാതീതമായ രക്തസമ്മർദം എന്നിവ ഈ അവസ്ഥയിലേക്ക് നയിക്കാം. എന്നാൽ ഹൃദയസംബന്ധമായ പ്രശ്നങ്ങൾ ഇല്ലാത്തവരിലും ഇത് കണ്ടുവരാറുണ്ട്. ഗുരുതരമായ ശ്വാസകോശ അണുബാധ, വിഷവാതക ശ്വസനം, ചില മരുന്നുകളുടെ പാർശ്വഫലങ്ങൾ, വൃക്കരോഗങ്ങൾ, ഉയർന്ന മലനിരകളിലേക്കുള്ള യാത്ര തുടങ്ങിയവയും ഇതിന് കാരണമാകാറുണ്ട്. അതിനാൽ ശ്വാസകോശത്തിൽ ദ്രാവകം അടിയാനുള്ള യഥാർത്ഥ കാരണം കണ്ടെത്തുക എന്നതാണ് ചികിത്സയിലെ ഏറ്റവും വലിയ വെല്ലുവിളി.
രോഗം ശരീരം നൽകുന്ന സൂചനകൾ: പൾമനറി എഡീമ പെട്ടെന്ന് സംഭവിക്കുന്നതാണെങ്കിൽ ലക്ഷണങ്ങൾ വളരെ വേഗത്തിൽ വഷളാകാം. ചിലരിൽ ആഴ്ചകളോ മാസങ്ങളോ എടുത്തായിരിക്കും ലക്ഷണങ്ങൾ പ്രകടമാകുന്നത്. ശ്രദ്ധിക്കേണ്ട പ്രധാന കാര്യങ്ങൾ:
- പെട്ടെന്നുണ്ടാകുന്ന ശ്വാസംമുട്ടൽ.
- കിടക്കുമ്പോൾ ബുദ്ധിമുട്ട് വർധിക്കുകയും ഇരിക്കുമ്പോൾ അൽപ്പം ആശ്വാസം ലഭിക്കുകയും ചെയ്യുന്ന അവസ്ഥ.
- തുടർച്ചയായ ചുമ.
- പതഞ്ഞതും പിങ്ക് നിറത്തിലുള്ളതോ രക്തം കലർന്നതോ ആയ കഫം പുറത്തുവരിക.
- നെഞ്ചിലെ അസ്വസ്ഥതയും ഭാരവും.
- ശ്വാസമെടുക്കുമ്പോൾ കേൾക്കുന്ന ചൂളംവിളി പോലുള്ള ശബ്ദം.
- അമിത വിയർപ്പ്, നെഞ്ചിടിപ്പ്, പെട്ടെന്നുള്ള പരിഭ്രാന്തി.
- ദീർഘകാലമായി തുടരുന്ന രോഗമാണെങ്കിൽ ശാരീരിക അധ്വാനത്തിനിടെയുള്ള കിതപ്പും രാത്രിയിൽ ശ്വാസം കിട്ടാതെ ഉണരുന്നതും കാലുകളിലെ നീരും ലക്ഷണങ്ങളാകാം.
സാധാരണ ക്ഷീണമോ ശ്വാസതടസ്സമോ ആണെന്ന് കരുതി ഇതിനെ അവഗണിക്കുന്നത് വലിയ തെറ്റാണ്. സംസാരശേഷിയെ ബാധിക്കുന്ന തരത്തിലുള്ള ശ്വാസതടസ്സമോ, പിങ്ക് നിറത്തിലുള്ള കഫമോ കണ്ടാൽ ഉടൻ തന്നെ അടിയന്തര വൈദ്യസഹായം തേടേണ്ടതാണ്.
ചികിത്സാ രീതികൾ: രോഗിയുടെ അവസ്ഥയ്ക്കും ദ്രാവകം അടിയാൻ കാരണമായ ഘടകങ്ങൾക്കും അനുസരിച്ചാണ് ചികിത്സ ക്രമീകരിക്കുന്നത്. രക്തത്തിലെ ഓക്സിജൻ അളവ് പരിശോധിച്ചശേഷം ആവശ്യമായവർക്ക് ഓക്സിജൻ നൽകുന്നു. സ്ഥിതി ഗുരുതരമാണെങ്കിൽ വെന്റിലേറ്റർ ഉൾപ്പെടെയുള്ള സഹായങ്ങൾ വേണ്ടിവന്നേക്കാം. ശരീരത്തിലെ അധിക ജലാംശം ഒഴിവാക്കാനുള്ള മരുന്നുകൾ, രക്തസമ്മർദം നിയന്ത്രിക്കാനുള്ള മരുന്നുകൾ, ഹൃദയപ്രവർത്തനം മെച്ചപ്പെടുത്താനുള്ള ചികിത്സകൾ എന്നിവ നൽകുന്നു. രോഗതീവ്രത അനുസരിച്ച് തീവ്രപരിചരണ വിഭാഗത്തിൽ പ്രവേശിപ്പിക്കേണ്ടി വന്നേക്കാം.
പൾമനറി എഡീമയെ പ്രതിരോധിക്കാൻ അതിലേക്ക് നയിക്കുന്ന അടിസ്ഥാന രോഗങ്ങളെ നിയന്ത്രിക്കുക മാത്രമാണ് ഏക പോംവഴി. ഹൃദ്രോഗികൾ, ഉയർന്ന രക്തസമ്മർദമുള്ളവർ, വൃക്ക സംബന്ധമായ അസുഖമുള്ളവർ എന്നിവർ കൃത്യമായി ഡോക്ടറുടെ നിർദേശങ്ങൾ പാലിക്കണം. സമയബന്ധിതമായ ചികിത്സയിലൂടെ പലപ്പോഴും ഈ അവസ്ഥയെ മറി കടക്കാനാകും. അതിനാൽ ലക്ഷണങ്ങൾ തിരിച്ചറിയാനും വൈദ്യസഹായം വൈകിപ്പിക്കാതിരിക്കാനും ശ്രദ്ധിക്കുക.
നിരാകരണം: ഈ വിവരങ്ങൾ പൊതുവായ അവബോധത്തിന് വേണ്ടി മാത്രമുള്ളതാണ്. ലക്ഷണങ്ങൾ കണ്ടതുകൊണ്ട് മാത്രം പൾമനറി എഡീമയാണെന്ന് ഉറപ്പിക്കരുത്. കൃത്യമായ രോഗനിർണയത്തിനായി ഡോക്ടറുടെ സേവനം തേടുക.
