പാമ്പുകളെ ആകർഷിക്കുന്ന ഗന്ധങ്ങൾ തിരിച്ചറിയാം, ഇവ വീടിനു ചുറ്റും ഒഴിവാക്കാം
പാമ്പ്
കേരളത്തിൽ കാലവർഷം കനക്കുന്നതോടെ വീടുകളിലും പരിസരങ്ങളിലും പാമ്പുകളുടെ സാന്നിധ്യം വർദ്ധിക്കാൻ സാധ്യതയേറെയാണ്. പാമ്പുകളെ നമ്മുടെ വാസസ്ഥലങ്ങളിലേക്ക് ആകർഷിക്കാൻ കാരണമാകുന്ന ചില പ്രത്യേക ഗന്ധങ്ങളെക്കുറിച്ച് അറിഞ്ഞിരിക്കുന്നത് ജാഗ്രത പാലിക്കാൻ സഹായിക്കും.
പാമ്പുകളുടെ പ്രധാന ഇരകളിലൊന്നാണ് എലികൾ. മഴക്കാലത്ത് മാളങ്ങളിൽ വെള്ളം കയറുമ്പോൾ എലികൾ സുരക്ഷിത താവളം തേടി വീടുകളിലേക്ക് എത്തുന്നു. ഈ എലികളുടെ വിസർജ്യത്തിന്റെയും മൂത്രത്തിന്റെയും ഗന്ധം പാമ്പുകളെ വേഗത്തിൽ ആകർഷിക്കുന്നു.
പക്ഷികളും അവയുടെ മുട്ടകളും പാമ്പുകൾക്ക് ഏറെ പ്രിയപ്പെട്ട ഭക്ഷണമാണ്. കൂടാതെ, പക്ഷികളുടെ കാഷ്ഠത്തിൽ നിന്നുള്ള ഗന്ധവും പാമ്പുകളെ വീടിന്റെ പരിസരങ്ങളിലേക്ക് ആകർഷിക്കാൻ ഇടയാക്കാറുണ്ട്.
തവളകൾ, ചെറിയ മീനുകൾ എന്നിവയെ തേടിയും പാമ്പുകൾ വീടിന്റെ പരിസരങ്ങളിൽ എത്താറുണ്ട്. ഇവ പുറപ്പെടുവിക്കുന്ന ഗന്ധം പാമ്പുകളെ കൂടുതൽ ആകർഷിക്കുന്നു.
ഇണകളെ കണ്ടെത്താനും സ്വന്തം വർഗത്തിൽപ്പെട്ടവയെ തിരിച്ചറിയാനും പ്രജനനത്തിനുമായി പാമ്പുകൾ ഫെറോമോണുകൾ എന്ന രാസസന്ദേശങ്ങളെയാണ് പ്രധാനമായും ആശ്രയിക്കുന്നത്. ഏതെങ്കിലും ഒരു പാമ്പ് വീടിനകത്തോ പരിസരത്തോ എത്തിയാൽ, അത് പുറപ്പെടുവിക്കുന്ന ഈ ഫെറോമോൺ ഗന്ധം പിന്തുടർന്ന് മറ്റ് പാമ്പുകളും ഇണയെ തേടി അവിടേക്ക് എത്താനുള്ള സാധ്യത വളരെ കൂടുതലാണ്.
