ഓഫിസ് കാന്റീനുകളിൽ ആരോഗ്യകരമായ ഭക്ഷണം: ആവശ്യകതയേറുന്നതായി 90 ശതമാനം ജീവനക്കാരും
ഇന്ത്യൻ ഓഫീസുകളിലെ കാന്റീനുകളിൽ സാധാരണയായി കണ്ടുവരുന്നത് സമോസ, ബ്രെഡ് പക്കോഡ തുടങ്ങിയ എണ്ണയിൽ പൊരിച്ച പലഹാരങ്ങളും കാർബോഹൈഡ്രേറ്റ് അധികമുള്ള പ്രഭാതഭക്ഷണങ്ങളുമാണ്. എന്നാൽ, ആരോഗ്യത്തിനും പ്രോട്ടീൻ സമ്പുഷ്ടമായ ഭക്ഷണത്തിനും കൂടുതൽ മുൻഗണന നൽകുന്നവരാണ് ഇന്നത്തെ തലമുറയിലെ ജീവനക്കാർ. ജോലിസ്ഥലങ്ങളിലും ഭക്ഷണകാര്യത്തിൽ വൈവിധ്യം വേണമെന്ന ആവശ്യം ഏറിവരികയാണെന്ന് പുതിയ പഠനങ്ങൾ വ്യക്തമാക്കുന്നു.
ഭക്ഷണത്തിന് ക്ഷാമമില്ലെങ്കിലും പോഷകമൂല്യമുള്ള വിഭവങ്ങളുടെ കുറവ് മിക്ക കാന്റീനുകളിലും പ്രകടമാണ്. കോംപസ് ഗ്രൂപ്പ് ഇന്ത്യ സംഘടിപ്പിച്ച ‘ഗ്ലോബൽ ഈറ്റിങ് അറ്റ് വർക്ക്’ സർവേയിൽ പങ്കെടുത്ത 2,000 പേരിൽ 90 ശതമാനം പേരും ജോലിസ്ഥലത്ത് ആരോഗ്യകരമായ ഭക്ഷണം ആഗ്രഹിക്കുന്നവരാണ്. ജീവനക്കാരുടെ ശാരീരികക്ഷമതയും ജോലിയിലെ ഉന്മേഷവും നിലനിർത്തുന്നതിൽ ഭക്ഷണത്തിന് വലിയ പങ്കുണ്ടെന്ന തിരിച്ചറിവാണ് ഇതിലൂടെ വെളിപ്പെടുന്നത്.
ദൂരയാത്രയും സമയപരിമിതിയും കാരണം വീട്ടിൽ നിന്ന് ഭക്ഷണം കരുതാത്തവർക്ക് ഓഫീസ് കാന്റീനുകളെയാണ് പൂർണ്ണമായും ആശ്രയിക്കേണ്ടി വരുന്നത്. ഉപ്പുമാവോ പറാത്തയോ എളുപ്പത്തിൽ ലഭിക്കുമെങ്കിലും, പ്രോട്ടീൻ അടങ്ങിയ ആഹാരം അവിടെ കിട്ടാക്കനിയാണ്. മുട്ട ഭുർജി, മുളപ്പിച്ച പയർവർഗ്ഗങ്ങൾ, ബേസൻ ചില്ല, പനീർ വിഭവങ്ങൾ എന്നിവ കാന്റീൻ മെനുവിൽ ഉൾപ്പെടുത്തണമെന്നാണ് ജീവനക്കാരുടെ ആവശ്യം. ഉച്ചഭക്ഷണത്തിൽ പരിപ്പുകറികൾക്കും പച്ചക്കറികൾക്കും പുറമെ പ്രോട്ടീൻ കൂടുതലായുള്ള വിഭവങ്ങൾ കൂടി വേണമെന്നും ഇവർ ചൂണ്ടിക്കാട്ടുന്നു.
ചിലയിടങ്ങളിൽ സാലഡുകളും ഗ്രിൽഡ് ചിക്കനും പനീർ റാപ്പുകളും ലഭിക്കാറുണ്ടെങ്കിലും, സാധാരണ ഭക്ഷണത്തെ അപേക്ഷിച്ച് ഇതിന് വില കൂടുതലാണ്. ഇടയ്ക്ക് ഇത്തരം വിഭവങ്ങൾ വാങ്ങാൻ പലരും തയ്യാറാണെങ്കിലും ദിവസവും ഉയർന്ന വില നൽകി ഭക്ഷണം കഴിക്കുക എന്നത് മിക്കവർക്കും പ്രായോഗികമല്ല. കാന്റീൻ സൗകര്യം പോലുമില്ലാത്ത ഓഫീസുകളിൽ ജോലി ചെയ്യുന്നവർക്ക് കുറഞ്ഞ ചെലവിൽ പോഷകഗുണമുള്ള ഭക്ഷണം കണ്ടെത്തുക എന്നത് വലിയൊരു വെല്ലുവിളിയാണ്.
ഓഫീസുകളിലെ ആഘോഷവേളകളിൽ ചായയ്ക്കും സമോസയ്ക്കും ബിസ്‌കറ്റുകൾക്കും കേക്കിനും പകരം പഴങ്ങളും സാൻഡ്‌വിച്ചുകളും മുളപ്പിച്ച ധാന്യങ്ങൾ ചേർത്ത ചാറ്റുകളും ഉൾപ്പെടുത്താമെന്ന് ജീവനക്കാർ നിർദ്ദേശിക്കുന്നു. സമോസകൾ പൂർണ്ണമായും ഒഴിവാക്കണമെന്നല്ല, മറിച്ച് തിരഞ്ഞെടുക്കാൻ കൂടുതൽ ആരോഗ്യകരമായ ഓപ്ഷനുകൾ ലഭ്യമാക്കണമെന്നാണ് ഇവർ മുന്നോട്ട് വെക്കുന്ന പ്രധാന ആവശ്യം.
ആരോഗ്യകരമായ ഭക്ഷണശീലങ്ങൾ നടപ്പിലാക്കാൻ വലിയ അടുക്കളകളോ സജ്ജീകരണങ്ങളോ ആവശ്യമില്ല; ചെറിയ മാറ്റങ്ങൾ കൊണ്ട് ഇത് സാധ്യമാണ്. പ്രഭാതഭക്ഷണത്തിൽ മുട്ടയും തൈരും മുളപ്പിച്ച ധാന്യങ്ങളും ഉൾപ്പെടുത്താം. ഉച്ചഭക്ഷണത്തിൽ എണ്ണ കുറച്ച് പാകം ചെയ്ത പനീർ, മുട്ട, ചിക്കൻ വിഭവങ്ങൾ എന്നിവയ്ക്ക് മുൻതൂക്കം നൽകാം. സ്‌നാക്‌സ് കൗണ്ടറുകളിൽ എണ്ണ പലഹാരങ്ങൾക്ക് പകരം പഴങ്ങൾ, നട്‌സ്, വറുത്ത കടല, മഖാന എന്നിവ കരുതുന്നതും ഉചിതമായിരിക്കും.
