വാർത്താസമ്മേളനത്തിനിടെ യുവാവിനെ ചുംബിച്ച സംഭവം: ബിജെപി എംഎൽഎക്കെതിരെ വിമർശനം, മറുപടിയുമായി ഭാര്യ
ഭുവനേശ്വർ: മാധ്യമപ്രവർത്തകരുമായി സംസാരിക്കുകയായിരുന്ന മന്ത്രിയുടെ പിന്നിൽ വെച്ച് യുവാവിനെ കെട്ടിപ്പിടിക്കാനും ചുംബിക്കാനും ശ്രമിച്ച ഒഡീഷയിലെ ബിജെപി എംഎൽഎയ്ക്കെതിരെ രൂക്ഷ വിമർശനം. ഗഞ്ചം ജില്ലയിലെ ചിക്കിറ്റി മണ്ഡലത്തിൽ നിന്നുള്ള ജനപ്രതിനിധിയായ മനോരഞ്ജൻ ധ്യാൻ സാമന്ത്രയാണ് വിവാദത്തിന്റെ കേന്ദ്രബിന്ദു. 2024-ൽ നടന്ന തിരഞ്ഞെടുപ്പിലൂടെയാണ് ഇദ്ദേഹം ആദ്യമായി നിയമസഭയിലെത്തിയത്.
മത്സ്യബന്ധന-മൃഗസംരക്ഷണ വകുപ്പ് മന്ത്രി ഗോകുലാനന്ദ മല്ലിക് വാർത്താസമ്മേളനം നടത്തുന്നതിനിടെയാണ് നാടകീയ സംഭവങ്ങൾ അരങ്ങേറിയത്. മന്ത്രി സംസാരിക്കുമ്പോഴേക്കും അദ്ദേഹത്തിന്റെ തൊട്ടുപിന്നിൽ നിന്ന സാമന്ത്ര, സമീപത്തുണ്ടായിരുന്ന വ്യക്തിയെ ആലിംഗനം ചെയ്യാനും ചുംബിക്കാനും ശ്രമിക്കുന്ന ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. എങ്കിലും, പ്രചരിക്കുന്ന ഈ വിഡിയോയുടെ ആധികാരികത ഇതുവരെ സ്ഥിരീകരിച്ചിട്ടില്ലെന്ന് വാർത്താ ഏജൻസിയായ പിടിഐ വ്യക്തമാക്കി.
സംഭവത്തിന് പിന്നാലെ ബിജെഡിക്കാർ രൂക്ഷമായ പരിഹാസവുമായി രംഗത്തെത്തിയിട്ടുണ്ട്. ഗഞ്ചം ജില്ല പ്രളയക്കെടുതിയിൽ നട്ടംതിരിയുമ്പോൾ ബിജെപി നേതാക്കൾ ആഘോഷത്തിമിർപ്പിലാണെന്ന് കുറ്റപ്പെടുത്തിയ പ്രതിപക്ഷം, വിവാദ വിഡിയോ എക്സ് (ട്വിറ്റർ) പ്ലാറ്റ്‌ഫോമിലൂടെ പങ്കുവെക്കുകയും ചെയ്തു.
