സതീശന്റെ പഴയ ഫോൺ നമ്പർ ഉപയോഗിച്ചുള്ള തട്ടിപ്പ്: ഒരാൾ പിടിയിൽ
തിരുവനന്തപുരം∙ പ്രതിപക്ഷ നേതാവായിരിക്കെ വി.ഡി. സതീശൻ ഉപയോഗിച്ചിരുന്ന പഴയ മൊബൈൽ നമ്പർ കൈക്കലാക്കി തട്ടിപ്പ് നടത്തിവന്ന വെമ്പായം സ്വദേശി ഷംനാദിനെ കന്റോൺമെന്റ് പൊലീസ് പിടികൂടി. സതീശൻ പിന്നീട് ഉപേക്ഷിച്ച നമ്പറിലേക്ക് സിം കാർഡ് സംഘടിപ്പിച്ച പ്രതി, ഇതിന്റെ മറവിൽ പലരെയും വിളിച്ച് ഭീഷണിപ്പെടുത്തുകയായിരുന്നു.
ഈ സംഭവവുമായി ബന്ധപ്പെട്ട് ലഭിച്ച ഔദ്യോഗിക പരാതിയുടെ അടിസ്ഥാനത്തിലാണ് പൊലീസ് ഇയാളെ കസ്റ്റഡിയിലെടുത്തത്. പ്രതിക്ക് എങ്ങനെയാണ് സതീശന്റെ ഉപയോഗത്തിലില്ലാത്ത നമ്പർ ലഭിച്ചതെന്ന് പൊലീസ് വിശദമായി പരിശോധിച്ചുവരികയാണ്. ഈ നമ്പർ ദുരുപയോഗം ചെയ്ത് ഷംനാദ് സാമ്പത്തിക തട്ടിപ്പുകൾ നടത്തിയിട്ടുണ്ടോ എന്ന കാര്യത്തിലും വ്യക്തത വരുത്തേണ്ടതുണ്ട്.
അതേസമയം, ഇക്കാര്യത്തിൽ നേരത്തെ പരാതി നൽകിയിട്ടും പൊലീസ് നടപടികൾ സ്വീകരിക്കുന്നതിൽ അലംഭാവം കാട്ടിയെന്ന ഗുരുതരമായ ആരോപണവും ഉയരുന്നുണ്ട്.
