എഐ തൊഴിൽ തട്ടിയെടുക്കുമോ? ആശങ്ക വേണ്ട, വരാനിരിക്കുന്നത് വൻ തൊഴിൽ അവസരങ്ങൾ: സമ്പാദ്യം സമ്മിറ്റിൽ ആവേശകരമായ ചർച്ച
കൊച്ചി∙ കൃത്രിമ ബുദ്ധി അഥവാ ആർട്ടിഫിഷ്യൽ ഇന്റലിജൻസ് (എഐ) എന്നത് കാലഘട്ടത്തിന്റെ അനിവാര്യതയാണെന്നും, ഇതിനെ മാറ്റിനിർത്തുന്നതിന് പകരം ബിസിനസ് മേഖലയുൾപ്പെടെയുള്ള ഇടങ്ങളിൽ ഫലപ്രദമായി ഉപയോഗപ്പെടുത്തുകയാണ് വേണ്ടതെന്നും വിദഗ്ധർ അഭിപ്രായപ്പെടുന്നു. എഐയുടെ വ്യാപനം തൊഴിൽ മേഖലയിൽ വലിയ പ്രതിസന്ധികൾ സൃഷ്ടിക്കുമെന്ന ആശങ്ക നിലനിൽക്കുന്നുണ്ടെങ്കിലും, ഇതൊരു താൽക്കാലിക പ്രതിഭാസം മാത്രമാണെന്ന് വിഎസ്ടി ടില്ലേഴ്സ് ട്രാക്ടേഴ്സ് ലിമിറ്റഡ് സിഇഒ ആന്റണി ചെറുകര, പിവലെന്റ് എഐ സഹസ്ഥാപകനും സിഒഒയുമായ അരുൺ രാജ് എന്നിവർ ചൂണ്ടിക്കാട്ടി. കൊച്ചിയിൽ നടന്ന മലയാള മനോരമ സമ്പാദ്യം ബിസിനസ് സമ്മിറ്റിലെ ‘എഐ ആൻഡ് ബിസിനസ്: റീഇൻവെന്റിങ് ദി വേ ബിസിനസ് വർക്, കോംപീറ്റ് ആൻഡ് ഗ്രോ’ എന്ന വിഷയത്തിലുള്ള ചർച്ചയിൽ പങ്കെടുത്ത് സംസാരിക്കുകയായിരുന്നു ഇരുവരും.
അമേരിക്കയിൽ കണ്ടുവരുന്ന ഓട്ടോണമസ് ട്രാക്ടർ സാങ്കേതികവിദ്യ എങ്ങനെ ഇന്ത്യൻ കർഷകർക്ക് ഗുണകരമാംവിധം നടപ്പിലാക്കാം എന്ന് ആന്റണി ചെറുകര വിവരിച്ചു. വെറും ഒരു ലക്ഷം രൂപയുടെ നിക്ഷേപത്തിൽ എഞ്ചിനീയറിംഗ് രംഗത്ത് ചെറിയ രീതിയിൽ പ്രവർത്തനം ആരംഭിച്ച്, ഇന്ന് കോടികളുടെ ആസ്തിയുള്ള ആർ ആൻഡ് ഡി (R&D) സംവിധാനമായി വളരാൻ എഐ വലിയ പിന്തുണ നൽകിയതായി അദ്ദേഹം വ്യക്തമാക്കി.
എഐ എന്നത് കേവലം ഒരു സാങ്കേതിക തരംഗമല്ലെന്നും, ബിസിനസ് രംഗത്ത് ശാശ്വതമായി നിലനിൽക്കുന്ന ഒന്നാണെന്നും അരുൺ രാജ് ഓർമ്മിപ്പിച്ചു. അതിനാൽ സംരംഭകർ ഈ സാങ്കേതികവിദ്യയെ അവഗണിക്കാതെ ‘എഐ ഫ്ലൂവൻസി’ അഥവാ എഐയിലുള്ള അറിവ് സ്വായത്തമാക്കാൻ തയ്യാറാകണം. വിവരങ്ങളുടെ സുരക്ഷ ഉറപ്പാക്കാൻ പബ്ലിക് പ്ലാറ്റ്‌ഫോമുകൾക്ക് പകരം എന്റർപ്രൈസ് വേർഷൻ ടൂളുകൾ തിരഞ്ഞെടുക്കണം. കൂടാതെ, നിലവിലുള്ള സിആർഎം (CRM), ഇആർപി (ERP) സംവിധാനങ്ങളുമായി എഐ സാങ്കേതികവിദ്യയെ കോർത്തിണക്കുന്നത് ബിസിനസ് പ്രവർത്തനങ്ങൾ കൂടുതൽ ലഘൂകരിക്കാൻ സഹായിക്കുമെന്നും അദ്ദേഹം കൂട്ടിച്ചേർത്തു.
സാധാരണ കർഷകരിലേക്കും ചെറിയ ഉപഭോക്താക്കളിലേക്കും എത്തുമ്പോൾ കുറഞ്ഞ ചെലവിൽ മികച്ച സേവനം നൽകാൻ എഐ തങ്ങളെ സഹായിക്കുന്നുണ്ടെന്ന് ആന്റണി ചെറുകര പറഞ്ഞു. കർഷകരുടെ ആവശ്യങ്ങൾ തിരിച്ചറിഞ്ഞ് അതിനനുസരിച്ചുള്ള ‘കോൺടെക്സ്ച്വൽ വർക്ക്ബെഞ്ചുകൾ’ സജ്ജമാക്കുമ്പോഴാണ് എഐയുടെ പ്രയോജനം പൂർണമാകുന്നത്. ചെറുകിട-ഇടത്തരം സ്ഥാപനങ്ങൾ പോലും ദൈനംദിന പ്രവർത്തനങ്ങളിൽ എഐയെ ഉൾപ്പെടുത്താൻ മടിക്കരുതെന്ന് അദ്ദേഹം ആഹ്വാനം ചെയ്തു.
എഐ വരുമ്പോൾ ജോലി നഷ്ടപ്പെടുമെന്ന ഭയം അനാവശ്യമാണെന്നും, ഇത് സമ്പദ്‌വ്യവസ്ഥയുടെ വളർച്ചയെ ത്വരിതപ്പെടുത്തുമെന്നും ഇരുവരും അഭിപ്രായപ്പെട്ടു. വരും പതിറ്റാണ്ടിൽ ആഗോള സമ്പദ്‌വ്യവസ്ഥ ഇരട്ടിയാകാൻ പോലും എഐ കാരണമാകുമെന്ന് ആന്റണി ചെറുകര വിലയിരുത്തി. മാറ്റങ്ങളുടെ തുടക്കത്തിൽ ചെറിയ ബുദ്ധിമുട്ടുകൾ ഉണ്ടാകുമെങ്കിലും, ദീർഘകാലാടിസ്ഥാനത്തിൽ പുതിയ തൊഴിലവസരങ്ങൾ സൃഷ്ടിക്കാൻ ഇത് വഴിയൊരുക്കും.
ഈ മാറ്റങ്ങളോട് പൊരുത്തപ്പെടാൻ പുതുതലമുറ നിരന്തരം പുതിയ കഴിവുകൾ ആർജ്ജിക്കണമെന്ന് അരുൺ രാജ് ഉപദേശിച്ചു. ട്രില്യൺ കണക്കിന് ഡോളർ നിക്ഷേപം വരുന്ന എഐ ഇൻഫ്രാസ്ട്രക്ചർ പദ്ധതികൾ യാഥാർഥ്യമാക്കാൻ സിവിൽ, മെക്കാനിക്കൽ എൻജിനീയർമാർ മുതൽ സ്റ്റീൽ, സിമന്റ് നിർമാണ മേഖലയിലുള്ളവർ വരെ അത്യന്താപേക്ഷിതമാണ്. അതിനാൽ കോർ എൻജിനീയറിങ് ജോലികൾ കൂടുതൽ സജീവമാകും. പ്രാരംഭ ഘട്ടത്തിൽ ചില തൊഴിൽ മേഖലകളിൽ തടസങ്ങൾ നേരിട്ടാലും, വരും പത്തു വർഷത്തിനുള്ളിൽ എഐ ഇല്ലാതാക്കുന്നതിനേക്കാൾ എത്രയോ മടങ്ങ് തൊഴിലവസരങ്ങൾ സൃഷ്ടിക്കപ്പെടും എന്ന് അദ്ദേഹം ഉറപ്പിച്ചു പറഞ്ഞു.
