എഴുത്തച്ഛൻ പുരസ്കാരം: അവാർഡുകൾ തേടിയിട്ടില്ലെന്ന് മേതിൽ രാധാകൃഷ്ണൻ
മേതിൽ രാധാകൃഷ്ണൻ
കോഴിക്കോട്: മലയാള സാഹിത്യത്തിലെ പരമോന്നത ബഹുമതിയായ എഴുത്തച്ഛൻ പുരസ്കാരം ലഭിച്ചതിൽ അതിയായ സന്തോഷമുണ്ടെന്ന് പ്രശസ്ത എഴുത്തുകാരൻ മേതിൽ രാധാകൃഷ്ണൻ പ്രതികരിച്ചു. അവാർഡുകളെ ലക്ഷ്യം വെച്ചല്ല താൻ എഴുതുന്നതെന്നും, പുരസ്കാരം ലഭിച്ച വിവരം മന്ത്രി നേരിട്ട് ഫോണിലൂടെയാണ് തന്നെ അറിയിച്ചതെന്നും അദ്ദേഹം വ്യക്തമാക്കി. രാമനാട്ടുകരയിൽ എഴുത്തുകാരി ഇന്ദുമേനോന്റെ വസതിയിൽ വെച്ചാണ് അദ്ദേഹം മാധ്യമങ്ങളോട് മനസ്സ് തുറന്നത്.
പ്രായവും ആരോഗ്യപ്രശ്നങ്ങളും കണക്കിലെടുത്ത് ദൂരയാത്രകൾ ബുദ്ധിമുട്ടായതിനാൽ, അവാർഡ് ദാനച്ചടങ്ങ് കോഴിക്കോട്ട് വെച്ച് നടത്തുന്നത് വലിയൊരാശ്വാസമായിരിക്കുമെന്ന് അദ്ദേഹം അഭിപ്രായപ്പെട്ടു. തന്റെ ഹൃദയത്തോട് ചേർന്നുനിൽക്കുന്ന കോഴിക്കോട് വെച്ച് ഇങ്ങനെയൊരു അംഗീകാരം ഏറ്റുവാങ്ങാൻ സാധിക്കുന്നത് ഇരട്ടി മധുരമാണെന്നും അദ്ദേഹം കൂട്ടിച്ചേർത്തു.
കഴിഞ്ഞ വർഷം മകൾ ജൂൺ അർബുദത്തെ തുടർന്ന് മരണപ്പെട്ടതിന് ശേഷമാണ് മേതിൽ ഇന്ദുമേനോന്റെയും കുടുംബത്തിന്റെയും കൂടെ താമസിക്കാൻ തുടങ്ങിയത്. മകളുടെ ഓർമ്മയ്ക്കായി കൈയിൽ അണിഞ്ഞിരിക്കുന്ന ഹെയർബാൻഡിനെക്കുറിച്ചുള്ള ചോദ്യത്തിന്, മകൾ നൽകിയ കരുത്താണ് തന്നെ ഇപ്പോഴും നിലനിർത്തുന്നത് എന്നായിരുന്നു അദ്ദേഹത്തിന്റെ മറുപടി. ഇന്നത്തെ കാലഘട്ടത്തിലെ എഴുത്തുകാർക്ക് താൻ നിർദ്ദേശങ്ങളൊന്നും നൽകാനില്ലെന്നും, അവർ സഞ്ചരിക്കുന്നതും ജീവിക്കുന്നതുമായ വഴികൾ തന്റേതിൽ നിന്നും തികച്ചും വ്യത്യസ്തമാണെന്നും അദ്ദേഹം അഭിപ്രായപ്പെട്ടു.
സംസ്ഥാന സർക്കാരിന്റെ സാഹിത്യരംഗത്തെ ഏറ്റവും ഉയർന്ന പുരസ്‌കാരമാണ് എഴുത്തച്ഛൻ പുരസ്കാരം. സാഹിത്യലോകത്തിന് നൽകിയ അമൂല്യമായ സംഭാവനകൾ പരിഗണിച്ചാണ് മേതിൽ രാധാകൃഷ്ണനെ ഈ ബഹുമതിക്കായി തിരഞ്ഞെടുത്തത്. അഞ്ച് ലക്ഷം രൂപയും ഫലകവും പ്രശസ്തിപത്രവും അടങ്ങുന്നതാണ് ഈ പുരസ്കാരം. കേരളപ്പിറവി ദിനത്തിൽ സാംസ്‌കാരിക വകുപ്പ് മന്ത്രി വിഷ്‌ണുനാഥാണ് പുരസ്‌കാര പ്രഖ്യാപനം നടത്തിയത്. കെ.ജി. ശങ്കരപിള്ള അധ്യക്ഷനായ ജൂറിയാണ് ജേതാവിനെ നിശ്ചയിച്ചത്.
