ദേശീയപാത 66-ലെ അപകടങ്ങൾ: ക്രൈം റെക്കോർഡ്സ് ബ്യൂറോയുടെ കണ്ടെത്തലുകളും നിർദേശങ്ങളും
മലപ്പുറം ജില്ലയിലൂടെ കടന്നുപോകുന്ന ദേശീയപാത 66-ന്റെ നിർമ്മാണം പൂർത്തിയായതോടെ യാത്രാസമയം ഗണ്യമായി കുറഞ്ഞുവെങ്കിലും, മറുവശത്ത് റോഡപകടങ്ങളുടെ എണ്ണത്തിലും മരണനിരക്കിലും ഉണ്ടായ വർധന അതീവ ആശങ്കയുണർത്തുന്നതാണ്. റോഡ് വികസനത്തോടൊപ്പം തന്നെ, അപകടങ്ങൾ കുറയ്ക്കാനുള്ള കർശന നടപടികളും അടിയന്തരമായി സ്വീകരിക്കേണ്ടതുണ്ട്. ഇതിനായുള്ള ചില നിർദ്ദേശങ്ങളും യാത്രക്കാർ പാലിക്കേണ്ട മുൻകരുതലുകളും താഴെ നൽകുന്നു.
കന്യാകുമാരി – പൻവേൽ ദേശീയപാത 66-ന്റെ മലപ്പുറം ജില്ലയിലെ ഭാഗത്ത് ഈ വർഷം ജനുവരി ഒന്നുമുതൽ ഇതുവരെ മാത്രം 29 പേർക്കാണ് ജീവൻ നഷ്ടമായത്. ജില്ലാ പോലീസ് ക്രൈം റെക്കോർഡ്സ് ബ്യൂറോ പുറത്തുവിട്ട ഞെട്ടിപ്പിക്കുന്ന കണക്കുകൾ പ്രകാരം, ഇക്കാലയളവിൽ 114 അപകടങ്ങളിലായി 153 പേർക്ക് പരിക്കേറ്റു. ആകെ 228 വാഹനങ്ങൾ അപകടത്തിൽപ്പെട്ടതായി രേഖപ്പെടുത്തിയിട്ടുണ്ട്. കുറ്റിപ്പുറത്തെ നാഷണൽ ഹൈവേ ക്യാമറ നിരീക്ഷണ കേന്ദ്രത്തിലെ സൈറ്റ് ഇൻ ചാർജ് പ്രമോദ് റെഡ്ഡി വ്യക്തമാക്കുന്നത് പ്രകാരം, അപകടങ്ങളിൽപ്പെടുന്നതിൽ ഭൂരിഭാഗവും കാറുകളാണ്; തൊട്ടുപിന്നാലെ ഇരുചക്രവാഹനങ്ങളുമുണ്ട്. മഴയുള്ള സമയങ്ങളിലാണ് അപകടസാധ്യത വർധിക്കുന്നത്. ജില്ലയിലുടനീളം നിരീക്ഷണത്തിനായി 115 ക്യാമറകൾ സ്ഥാപിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
റോഡുകളിൽ വീണ്ടും ചോര വീഴാതിരിക്കാൻ അതീവ ജാഗ്രത ആവശ്യമാണ്. മനുഷ്യസഹജമായ വീഴ്ചകൾ (ഹ്യൂമൻ എറർ), റോഡ് നിർമ്മാണത്തിലെ അപാകതകൾ (റോഡ് എറർ), മഴയും മൂടൽമഞ്ഞും പോലെയുള്ള പാരിസ്ഥിതിക കാരണങ്ങൾ (എൻവയൺമെന്റൽ എറർ) തുടങ്ങി നിരവധി ഘടകങ്ങൾ അപകടങ്ങൾക്ക് കാരണമാകുന്നുണ്ട്. പാതയുടെ വീതി 60 മീറ്ററിൽ നിന്ന് 45 മീറ്ററായി കുറച്ചതിലൂടെയുണ്ടായ പരിമിതികളും ചർച്ചയാകുന്നു. റോഡ് വികസനത്തിന്റെ രണ്ടാം ഘട്ടം ഉൾപ്പെടെയുള്ള കാര്യങ്ങളിൽ അടിയന്തര ശ്രദ്ധ ആവശ്യമാണ്. അധികൃതരുടെ ആസൂത്രിതമായ ഇടപെടലുകളും ഡ്രൈവർമാരുടെ ശ്രദ്ധയും പ്രദേശവാസികളുടെ ജാഗ്രതയും ഒത്തുചേർന്നാൽ മാത്രമേ അപകടങ്ങൾ ഒരു പരിധിവരെ തടയാനാകൂ.
പ്രധാന നിർദേശങ്ങൾ:
∙ സർവീസ് റോഡുകൾ വീതികൂട്ടി നവീകരിക്കുകയും നിലവിലുള്ള അപാകതകൾ പരിഹരിക്കുകയും ചെയ്യുക.
∙ സർവീസ് റോഡുകളിൽ ബസ് ബേകൾ നിർമ്മിക്കുക.
∙ സർവീസ് റോഡുകൾക്കായി തദ്ദേശ സ്ഥാപനങ്ങളുടെ സഹകരണത്തോടെ സ്ഥലം ഏറ്റെടുക്കുന്നതിനെക്കുറിച്ച് ആലോചിക്കുക.
∙ ദേശീയപാതയോരത്ത് ലോറികൾക്ക് പുറമേ മറ്റ് വാഹനങ്ങൾക്കും സുരക്ഷിതമായ പാർക്കിങ് സൗകര്യം ഒരുക്കുക (കലക്ടറുടെ നേതൃത്വത്തിലുള്ള പരിശോധനയിൽ ഇതിനായി 28 ഇടങ്ങൾ കണ്ടെത്തിയിട്ടുണ്ട്).
∙ 20 കിലോമീറ്റർ ഇടവേളകളിൽ മോട്ടോർ വാഹന വകുപ്പിന്റെ ഹൈവേ പട്രോളിങ് സ്ക്വാഡുകളെ 24 മണിക്കൂറും വിന്യസിക്കുക.
∙ ദേശീയപാത അതോറിറ്റിയുടെ ക്യാമറ നിരീക്ഷണ സംവിധാനം മോട്ടോർ വാഹന വകുപ്പിനും പോലീസിനും തത്സമയം ഉപയോഗിക്കാൻ അനുമതി നൽകുക, ഇത് നിയമലംഘനങ്ങൾ തടയാൻ അത്യാവശ്യമാണ്.
