ദുബായിൽ മലയാളി യുവതിക്ക് നേരെ അതിക്രമം: ഉറക്കത്തിനിടയിൽ കാൽ എലി കടിച്ച സംഭവം ദുരൂഹതയിൽ
ഷാർജ∙ അടിയുറച്ച സൗഹൃദമെന്ന് കരുതി വിശ്വസിച്ച ഒരാൾ ചതിച്ചപ്പോൾ ആ യുവതിയുടെ ജീവിതം വഴിയാധാരമായി. പഴയ സഹപാഠി നൽകിയ തൊഴിൽ വിസയുടെ വാഗ്ദാനത്തിൽ വിശ്വസിച്ച് പണം നൽകിയെങ്കിലും, അത് വഞ്ചനയായിരുന്നുവെന്ന് തിരിച്ചറിയാൻ അധികം വൈകിയില്ല. വാഗ്ദാനം ചെയ്ത ജോലി ലഭിച്ചില്ലെന്ന് മാത്രമല്ല, നൽകിയ പണവുമായി ആ സുഹൃത്ത് അപ്രത്യക്ഷനായതോടെ യുവതി വലിയൊരു സാമ്പത്തിക പ്രതിസന്ധിയിലായി.
കടബാധ്യതകളും ചതിയും നൽകിയ ആഘാതത്തിൽ നിന്ന് കരകയറാൻ പെടാപ്പാടുപെടുന്നതിനിടെയാണ് ദുബായ് കരാമ കേന്ദ്രീകരിച്ച് പ്രവർത്തിക്കുന്ന മലയാളികളായ പലിശ സംഘത്തിന്റെ കെണിയിൽ അവൾ അകപ്പെട്ടത്. നിവൃത്തികേടിന്റെ അങ്ങേയറ്റത്ത് നിൽക്കുമ്പോൾ പരിചയക്കാരിയായ ഒരു സ്ത്രീ വഴിയാണ് പലിശ മാഫിയയെ സമീപിച്ചത്. അടിയന്തര ആവശ്യത്തിനായി വാങ്ങിയ രണ്ടായിരം ദിർഹത്തിന് മാസം തോറും ഇരുനൂറ് ദിർഹം പലിശ നൽകണമെന്ന കർശന വ്യവസ്ഥ അവരുടെ ജീവിതത്തെ കൂടുതൽ ഇരുളിലാക്കി. പല വീടുകളിൽ ജോലിക്കുപോയി ലഭിക്കുന്ന തുച്ഛമായ തുക കൊണ്ട് പലിശ അടച്ചുതീർക്കാൻ ആ പാവം സ്ത്രീ കിണഞ്ഞു പരിശ്രമിച്ചു.
പാലക്കാട്ടെ ഒരു ഗ്രാമത്തിലെ ദരിദ്ര കുടുംബത്തിലാണ് ഈ യുവതി ജനിച്ചത്. നാല് മക്കളിൽ മൂത്തവളായ അവൾക്ക് ദുരിതം നിറഞ്ഞ ബാല്യകാലമാണ് ലഭിച്ചത്. യുഎഇയിൽ 23 വർഷം കഠിനാധ്വാനം ചെയ്ത പിതാവ് കുടുംബത്തിന്റെ ദാരിദ്ര്യം മാറ്റാൻ ശ്രമിച്ചെങ്കിലും കാര്യമായ മാറ്റമുണ്ടായില്ല. പത്തൊൻപത് വർഷങ്ങൾക്ക് മുൻപ് പിതാവ് മരിച്ചു. കേവലം പന്ത്രണ്ടാം വയസ്സിൽ, എട്ടാം ക്ലാസ്സിൽ പഠിക്കുമ്പോൾ ഒരു ഓട്ടോ ഡ്രൈവർ അവളെ വിവാഹം കഴിച്ചെങ്കിലും, ആ ബന്ധം മാസങ്ങൾക്കുള്ളിൽ തകർന്നു. ഇന്ന് പത്തോളം പേർ തിങ്ങിപ്പാർക്കുന്ന ഒരു ഒറ്റമുറി വീട്ടിലാണ് അവളുടെ താമസം. എലി അരിച്ച വീട്ടിൽ പാമ്പ് വീണതടക്കമുള്ള ഭീതിദമായ സാഹചര്യങ്ങളിലൂടെയാണ് ഈ യുവതിയുടെ നിത്യജീവിതം കടന്നുപോകുന്നത്.
