കോഴിക്കോട് മെഡിക്കൽ കോളേജിൽ നിപ്പ രോഗികൾക്ക് കാലാവധി കഴിഞ്ഞ മരുന്ന് നൽകിയോ; 6 മരണത്തിൽ അന്വേഷണം
തിരുവനന്തപുരം: കോഴിക്കോട് മെഡിക്കൽ കോളേജിൽ ചികിത്സയിലായിരുന്ന നിപ്പ രോഗികൾക്ക് കാലാവധി അവസാനിച്ച മരുന്ന് നൽകിയതായി സംശയിക്കുന്നതായി നിയമസഭയിൽ ആരോഗ്യമന്ത്രി കെ. മുരളീധരൻ വ്യക്തമാക്കി. മുൻ സർക്കാരിന്റെ ഭരണകാലത്ത് 2023-2025 കാലയളവിലാണ് ഈ മരുന്ന് വിതരണം ചെയ്തത്. 2021 ജൂണിൽ സംഭരിച്ച മരുന്നുകളുടെ കാലാവധി 2023 മേയ് മാസത്തോടെ അവസാനിച്ചിരുന്നു.
മെഡിക്കൽ സർവീസസ് കോർപറേഷൻ വഴി വാങ്ങിയ റെംഡിസിവർ മരുന്നിനെക്കുറിച്ചാണ് പ്രധാനമായും ആശങ്ക ഉയരുന്നത്. കോവിഡ് ബാധിതർക്കും ഈ മരുന്ന് നൽകിയിട്ടുണ്ടെന്നാണ് പുറത്തുവരുന്ന വിവരം.
മരുന്ന് ലഭിച്ച രോഗികളുടെ കൃത്യമായ കണക്കുകൾ ശേഖരിക്കാൻ ആരോഗ്യവകുപ്പ് ഡയറക്ടർക്കും മെഡിക്കൽ വിദ്യാഭ്യാസ ഡയറക്ടർക്കും മന്ത്രി നിർദേശം നൽകി. 2023-ൽ നിപ്പ ബാധിച്ച ആറുപേരിൽ രണ്ടുപേരും, 2024-ലെ രണ്ടുപേരിൽ രണ്ടുപേരും, 2025-ലെ മൂന്നുപേരിൽ രണ്ടുപേരും മരണത്തിന് കീഴടങ്ങിയിരുന്നു. കാലാവധി കഴിഞ്ഞ മരുന്നുകൾ നൽകിയതാണോ മരണകാരണമെന്നും, രോഗികളിൽ എന്തെങ്കിലും തരത്തിലുള്ള പാർശ്വഫലങ്ങൾ ഉണ്ടായിട്ടുണ്ടോ എന്നും പരിശോധിക്കും. ഇതിനായി ഇൻഫക്ഷ്യസ് ഡിസീസ് വിഭാഗം മേധാവി ഡോ. അരവിന്ദിന്റെ നേതൃത്വത്തിൽ പ്രത്യേക മെഡിക്കൽ ബോർഡ് രൂപീകരിക്കാൻ നടപടി സ്വീകരിക്കും. മാത്യു കുഴൽനാടൻ ഉന്നയിച്ച സബ്മിഷന് മറുപടിയായാണ് മന്ത്രി ഇക്കാര്യങ്ങൾ അറിയിച്ചത്.
വിവാദം 2021-ൽ സംഭരിച്ച മരുന്നുകളിൽ
മെഡിക്കൽ സർവീസസ് കോർപറേഷൻ മുഖേന മാത്രമാണ് ആശുപത്രികളിലേക്ക് റെംഡിസിവർ വിതരണം ചെയ്തിരുന്നത്. അത്യാവശ്യ മരുന്നുകളുടെ വിഭാഗത്തിൽ ഉൾപ്പെടുന്നതിനാൽ കാരുണ്യ ഫാർമസി വഴിയാണ് ഇവ വാങ്ങിയത്.
കോർപറേഷൻ അവസാനമായി റെംഡിസിവർ സംഭരിച്ചത് 2021 ജൂണിലാണ്. 3,000 വയലുകൾക്കായി 42 ലക്ഷം രൂപയാണ് ചെലവാക്കിയത്. വിതരണം ചെയ്ത ഈ മരുന്നുകളുടെ കാലാവധി 2023 മേയ് 30-ന് അവസാനിച്ചിരുന്നു.
കോഴിക്കോട് മെഡിക്കൽ കോളേജിന്റെ കണക്കുപ്രകാരം 2023-24 വർഷം 102 വയലും, 2024-25 വർഷം 34 വയലും, 2025-26 വർഷം 10 വയലും, 2026-27 വർഷത്തിൽ 50 വയലും മരുന്ന് ഉപയോഗിച്ചിട്ടുണ്ട്.
2026-27 സാമ്പത്തിക വർഷത്തിൽ ഉപയോഗിച്ച 50 വയൽ മരുന്ന് 2026 ജൂൺ 12-ന് ബഹ്‌റൈനിൽ നിന്ന് എത്തിച്ച ശേഷം നിപ്പ രോഗിക്ക് നൽകുകയായിരുന്നു.
