രൂപയുടെ തളർച്ചയിൽ അവസരം ഒളിഞ്ഞിരിപ്പുണ്ട്; ഡോളർ 130 കടന്നേക്കാം, ചൈനയ്ക്ക് പകരം ഇന്ത്യ കുതിക്കുമെന്ന് സൗരഭ് മുഖർജി
രാജ്യത്തിന്റെ സാമ്പത്തിക ഘടനയിലുണ്ടായിക്കൊണ്ടിരിക്കുന്ന വലിയ മാറ്റങ്ങൾ പുതിയ ബിസിനസ് സാധ്യതകൾക്ക് വഴിതുറക്കുകയാണെന്ന് മാർസലസ് ഇൻവെസ്റ്റ്‌മെന്റ് മാനേജേഴ്‌സിന്റെ സ്ഥാപകനും ചീഫ് ഇൻവെസ്റ്റിങ് ഓഫിസറുമായ സൗരഭ് മുഖർജി ചൂണ്ടിക്കാട്ടുന്നു. ഇന്ത്യയിലെ മധ്യവർഗം കടുത്ത സാമ്പത്തിക ഞെരുക്കത്തിലൂടെയാണ് സഞ്ചരിക്കുന്നത്. കഴിഞ്ഞ മൂന്ന് വർഷമായി വൈറ്റ് കോളർ തൊഴിൽ മേഖലയിലെ വളർച്ചാനിരക്ക് ഏതാണ്ട് പൂജ്യമാണ്. ആർട്ടിഫിഷ്യൽ ഇന്റലിജൻസും ഓട്ടമേഷനും വ്യാപകമായതോടെ, പരിചയസമ്പന്നരായ ജീവനക്കാരെ പിരിച്ചുവിടാനും പുതിയ നിയമനങ്ങൾ മരവിപ്പിക്കാനും കമ്പനികൾ നിർബന്ധിതരാകുന്നു. ശമ്പള വർധന പ്രതിവർഷം കേവലം ഒരു ശതമാനമായി ഒതുങ്ങിയപ്പോൾ, ജീവിതച്ചെലവ് ഏഴ് മുതൽ ഒൻപത് ശതമാനം വരെയാണ് കുതിച്ചുയർന്നത്. ഇത് മധ്യവർഗത്തിന്റെ ക്രയശേഷിയിൽ മുപ്പത് മുതൽ നാൽപ്പത് ശതമാനം വരെ ഇടിവ് വരുത്തിയിട്ടുണ്ട്. സോഷ്യൽ മീഡിയയുടെയും ഉയർന്ന ജീവിതശൈലിയോടുള്ള ഭ്രമത്തിന്റെയും ഫലമായി ഇന്ത്യൻ കുടുംബങ്ങളുടെ കടബാധ്യതകൾ സർവകാല റെക്കോർഡിലെത്തി. ഭവന വായ്പകൾ ഒഴിവാക്കിയാലും, വരുമാനവും കടവും തമ്മിലുള്ള അനുപാതം 32 ശതമാനത്തിലേക്ക് എത്തിനിൽക്കുന്നു.
∙ അതിസമ്പന്നരുടെ വളർച്ചയും ലക്ഷ്വറി വിപണിയുടെ കുതിപ്പും
രാജ്യത്ത് അതീവ സമ്പന്നരായ ഒരു വിഭാഗം അതിവേഗം ഉയർന്നു വരുന്നുണ്ട്. ഫെറാരി, ഹെർമെസ്, ലൂയി വിറ്റൺ തുടങ്ങിയ ആഗോള ആഡംബര ബ്രാൻഡുകൾക്ക് ലോകത്തിലെ തന്നെ ഏറ്റവും പ്രധാനപ്പെട്ട വിപണികളിലൊന്നായി ഇന്ത്യ മാറിക്കഴിഞ്ഞു. ലക്ഷക്കണക്കിന് അതിസമ്പന്ന കുടുംബങ്ങളുള്ള നമ്മുടെ രാജ്യത്ത് വിലകൂടിയ ഉൽപന്നങ്ങൾക്കും സേവനങ്ങൾക്കും വൻ ഡിമാൻഡാണുള്ളത്. സാധാരണ വാഹനങ്ങളെ അപേക്ഷിച്ച് ആഡംബര കാറുകളുടെ വിൽപ്പനയിൽ വലിയ വർധനവാണ് കാണുന്നത്. റിയൽ എസ്റ്റേറ്റ് മേഖലയിലാകട്ടെ, കോടികൾ വിലമതിക്കുന്ന പ്രോപ്പർട്ടികൾ സ്വന്തമാക്കാൻ വലിയ തിരക്കാണ്.
∙ സർക്കാർ സേവനങ്ങളിൽ നിന്നുള്ള പിന്മാറ്റവും സ്വകാര്യവൽക്കരണവും
പൊതു സേവനങ്ങൾ നൽകുന്നതിൽ നിന്ന് സർക്കാർ ഘട്ടംഘട്ടമായി പിന്മാറുകയാണ്. മധ്യവർഗത്തിന് ആവശ്യമായ അടിസ്ഥാന സൗകര്യങ്ങൾ ഒരുക്കുന്നതിന് പകരം, പാവപ്പെട്ടവർക്ക് നേരിട്ട് ധനസഹായം നൽകുന്ന രീതിക്കാണ് സർക്കാർ മുൻഗണന നൽകുന്നത്. വരും വർഷങ്ങളിൽ ഈ തുക ലക്ഷം കോടികളിലേക്ക് ഉയരുമെന്നാണ് കണക്കുകൂട്ടൽ. വിദ്യാഭ്യാസം, ആരോഗ്യം തുടങ്ങിയ മേഖലകളിൽ സർക്കാർ പങ്കാളിത്തം കുറയുമ്പോൾ, ആ വിടവ് നികത്തുന്നത് സ്വകാര്യ സംരംഭകരാണ്.
∙ ഉൽപാദന മേഖലയിലെ കയറ്റുമതി സാധ്യതകൾ
പരമ്പരാഗത ഐടി സേവന മേഖല വരും വർഷങ്ങളിൽ വലിയ വെല്ലുവിളികൾ നേരിട്ടേക്കാം. രൂപയുടെ മൂല്യം വർഷം തോറും പത്തു ശതമാനം എന്ന കണക്കിൽ ഇടിയുന്നത് (ഒരു ഡോളറിന് 120-130 രൂപ വരെ എത്തിയേക്കാം) ഉൽപാദന മേഖലയുടെ കയറ്റുമതിക്ക് വലിയ അനുകൂല സാഹചര്യമൊരുക്കും. സൂറത്ത്, ലുധിയാന, കച്ച് തുടങ്ങിയ നഗരങ്ങൾ ഇതിനകം തന്നെ ഉൽപാദന കയറ്റുമതിയിൽ മികച്ച നേട്ടം കൈവരിച്ചു കഴിഞ്ഞു. ചൈനയ്ക്കും വിയറ്റ്‌നാമിനും പകരമായി ആഗോള ഉൽപാദന ഭൂപടത്തിൽ ഇന്ത്യ നിർണായക ശക്തിയായി ഉയരുകയാണ്.
∙ മൂന്ന് പ്രധാന ബിസിനസ് അവസരങ്ങൾ
1. അതിസമ്പന്നരെ ലക്ഷ്യമിട്ടുള്ള സംരംഭങ്ങൾ: വിലയേക്കാൾ ഉപരിയായി ഗുണനിലവാരത്തിനും അത്യാധുനിക സേവനങ്ങൾക്കും മുൻഗണന നൽകുന്ന അതിസമ്പന്ന കുടുംബങ്ങൾക്കായി പ്രീമിയം ഉൽപന്നങ്ങളും സേവനങ്ങളും വിപണിയിലെത്തിക്കുക.
2. സ്വകാര്യവൽക്കരണം: സർക്കാർ പിന്മാറ്റം തുടരുന്ന വിദ്യാഭ്യാസം, ആരോഗ്യം, സുരക്ഷ തുടങ്ങിയ മേഖലകളിൽ ഉയർന്ന നിലവാരമുള്ള സ്വകാര്യ സേവനങ്ങൾ ലഭ്യമാക്കുക.
3. കയറ്റുമതി അധിഷ്ഠിത ഉൽപാദനം: ആഗോള വിപണിയെ കേന്ദ്രീകരിച്ച് ഉൽപാദന മേഖലയിലും കയറ്റുമതിയിലും കൂടുതൽ മുതൽമുടക്കുകയും പുതിയ സംരംഭങ്ങൾ തുടങ്ങുകയും ചെയ്യുക.
