കാമുകനും പിതാവിനും നേരെ തോക്കുചൂണ്ടി നഗ്നരാക്കി മർദ്ദനം; ബംഗാളിൽ പ്രതികളെ വസ്ത്രം മാറ്റി നടത്തിച്ച് പൊലീസ്, വിഡിയോ വിവാദത്തിൽ
കൊൽക്കത്തയിലെ സർസുനയിൽ പതിനെട്ടുകാരനെയും അച്ഛനെയും സുഹൃത്തിനെയും തോക്ക് കാണിച്ച് ഭീഷണിപ്പെടുത്തിയ ശേഷം വസ്ത്രങ്ങൾ അഴിപ്പിച്ച് പൊതുനിരത്തിലൂടെ നടത്തിച്ച കേസിലെ മൂന്ന് പ്രതികളെ ചൊവ്വാഴ്ച സംഭവസ്ഥലത്തെത്തിച്ച് പൊലീസ് തെളിവെടുപ്പ് നടത്തി. എന്നാൽ, പ്രതികളുടെ വസ്ത്രങ്ങൾ അഴിപ്പിച്ച് അവരെ പൊതുജനമധ്യത്തിലൂടെ നടത്തിച്ച പൊലീസ് നടപടി വലിയ രാഷ്ട്രീയ വിവാദത്തിന് വഴിവെച്ചിരിക്കുകയാണ്. ഭരണ-പ്രതിപക്ഷ കക്ഷികൾ ഈ സംഭവത്തെ രൂക്ഷമായ ഭാഷയിലാണ് വിമർശിച്ചത്.
തൃണമൂൽ കോൺഗ്രസ് നേതാവ് കുനാൽ ഘോഷ് പൊലീസ് നടപടിയെ ശക്തമായി എതിർത്തു. കുറ്റവാളികളെ വേഗത്തിൽ പിടികൂടിയ പൊലീസിന്റെ പ്രവർത്തനത്തെ അദ്ദേഹം അഭിനന്ദിച്ചെങ്കിലും, വസ്ത്രം ധരിപ്പിക്കാതെ അവരെ തെരുവിലൂടെ പരേഡ് ചെയ്യിച്ചത് തികച്ചും പരിഷ്കൃതമല്ലാത്ത നടപടിയാണെന്ന് അദ്ദേഹം തുറന്നടിച്ചു. നിയമം ഒട്ടും അനുവദിക്കാത്ത രീതിയിലുള്ള പ്രവൃത്തിയാണിതെന്ന് അദ്ദേഹം കൂട്ടിച്ചേർത്തു.
പൊലീസിന്റെ ഇത്തരം നടപടികൾ പ്രാകൃതമാണെന്ന് സിപിഎം സംസ്ഥാന സെക്രട്ടറി മുഹമ്മദ് സലീമും വിമർശിച്ചു. കുറ്റകൃത്യങ്ങൾ ശാസ്ത്രീയമായി അന്വേഷിച്ച് കണ്ടെത്തുന്നതിലാണ് സംസ്ഥാന പൊലീസിന് എക്കാലത്തും പ്രശസ്തിയുള്ളത് അല്ലാതെ ഇത്തരം ഫ്യൂഡൽ മാതൃകയിലുള്ള ശിക്ഷാ നടപടികൾ നടപ്പിലാക്കുന്നതിലല്ലെന്ന് അദ്ദേഹം പറഞ്ഞു.
‘‘ഞങ്ങളെ ഇടുങ്ങിയ വഴികളിലൂടെ പോലും പോകാൻ അനുവദിക്കാതെ മനഃപൂർവം തിരക്കേറിയ മെയിൻ റോഡിലൂടെ വസ്ത്രങ്ങൾ അഴിപ്പിച്ച് നടത്തിക്കുകയായിരുന്നു. അവിടെയുണ്ടായിരുന്ന ആളുകൾ ഇതിന്റെ വീഡിയോകൾ എടുത്ത് സമൂഹമാധ്യമങ്ങളിൽ പ്രചരിപ്പിച്ചു’’– അക്രമത്തിനിരയായ യുവാവിന്റെ പിതാവ് മാധ്യമങ്ങൾക്ക് മുന്നിൽ വിതുമ്പിക്കൊണ്ട് പറഞ്ഞു.
തട്ടിക്കൊണ്ടുപോകൽ, അന്യായമായി തടങ്കലിൽ വെക്കൽ, വധഭീഷണി മുഴക്കൽ തുടങ്ങി ഗുരുതരമായ വകുപ്പുകൾ പ്രകാരമാണ് പ്രതികൾക്കെതിരെ പൊലീസ് കേസ് രജിസ്റ്റർ ചെയ്തിരിക്കുന്നത്.
