മേജർ രവിയെ അധിക്ഷേപിച്ചു; സൈനികരെ അപമാനിച്ചെന്ന പരാതിയിൽ ശാന്തിവിള ദിനേശിനെതിരെ കേസ്
തിരുവനന്തപുരം ∙ ഇന്ത്യൻ സൈനികരെ അപമാനിച്ചെന്നാരോപിച്ച് സംവിധായകനും യൂട്യൂബർമാരുമായ ശാന്തിവിള ദിനേശിനെതിരെ പോലീസ് കേസെടുത്തു. അനന്തപുരി സോൾജിയേഴ്‌സ് എന്ന മുൻ സൈനികരുടെ കൂട്ടായ്മ നൽകിയ പരാതിയിലാണ് തിരുവനന്തപുരം സിറ്റി സൈബർ പോലീസ് നടപടി സ്വീകരിച്ചത്. സമൂഹത്തിൽ മനഃപൂർവം അസ്വസ്ഥതയും കലാപവും ഉണ്ടാക്കാൻ ലക്ഷ്യമിട്ടാണ് ഇദ്ദേഹം സംസാരിച്ചതെന്ന് എഫ്ഐആറിൽ വ്യക്തമാക്കുന്നു.
ഒരു യൂട്യൂബ് ചാനലിന് നൽകിയ അഭിമുഖത്തിൽ സംവിധായകനും മുൻ സൈനികനുമായ മേജർ രവിയെ അധിക്ഷേപിക്കുന്ന തരത്തിൽ ശാന്തിവിള ദിനേശ് നടത്തിയ പരാമർശങ്ങളാണ് കേസിന് ആധാരം. ദിനേശിന്റെ വാക്കുകൾ രാജ്യത്തെ സംരക്ഷിക്കുന്ന സൈനികരെ മൊത്തത്തിൽ അവഹേളിക്കുന്നതാണെന്ന് പരാതിക്കാർ ആരോപിക്കുന്നു. “വിരമിച്ച സൈനികർക്ക് പട്ടിയുടെ വില പോലുമില്ലേ” എന്ന രീതിയിൽ ഇദ്ദേഹം നടത്തിയ പരാമർശം വലിയ പ്രതിഷേധത്തിന് വഴിവെച്ചിരുന്നു. ശാന്തിവിള ദിനേശിനെ ഒന്നാം പ്രതിയാക്കിയും പ്രസ്തുത യൂട്യൂബ് ചാനലിനെ രണ്ടാം പ്രതിയാക്കിയുമാണ് കേസ് റജിസ്റ്റർ ചെയ്തിരിക്കുന്നത്. ഇദ്ദേഹത്തിന്റെ വിവാദ പ്രസ്താവനയ്ക്കെതിരെ സംസ്ഥാനത്തെ വിവിധ പോലീസ് സ്റ്റേഷനുകളിൽ പരാതി നൽകുമെന്ന് മേജർ രവി നേരത്തെ തന്നെ വ്യക്തമാക്കിയിരുന്നു.
