ഒറ്റ ആഴ്ചയിൽ 3440 രൂപയുടെ വർദ്ധന: സ്വർണവിലയിലെ കുതിപ്പ് തുടരുമോ? വിപണി കണക്കുകൾ പരിശോധിക്കാം
പ്രതീകാത്മക ചിത്രം
ലോക വിപണിയിലെ അനിശ്ചിതത്വം നിഴലിക്കുന്നു
കൊച്ചി: കഴിഞ്ഞയാഴ്ച മികച്ച നേട്ടമുണ്ടാക്കിയ സ്വർണ്ണ വിപണിയിൽ വരും ദിവസങ്ങളിൽ തിരിച്ചടി നേരിടാനുള്ള സാധ്യതയേറെയാണ്. ആഗോളതലത്തിലെ സാമ്പത്തിക അനിശ്ചിതത്വങ്ങൾ, അമേരിക്കയിലെ നാണയപ്പെരുപ്പ നിരക്കുകൾ, ഇറാൻ-ഇസ്രായേൽ സംഘർഷം, എണ്ണവിലയിലെ മാറ്റങ്ങൾ, യുഎസ് ഫെഡറൽ റിസർവിന്റെ പലിശ നയങ്ങൾ തുടങ്ങിയ ഘടകങ്ങളാകും വരും ദിവസങ്ങളിൽ സ്വർണ്ണവിലയെ സ്വാധീനിക്കുക.
കഴിഞ്ഞ ആഴ്ച രാജ്യാന്തര വിപണിയിൽ സ്വർണ്ണവില 4.5 ശതമാനവും വെള്ളിയുടെ വില 5.4 ശതമാനവും ഉയർന്നിരുന്നു. എം.സി.എക്സിൽ ഡിസംബർ ഗോൾഡ് ഫ്യൂച്ചേഴ്സ് 3,682 രൂപ വർധിച്ച് പത്ത് ഗ്രാമിന് 1.42 ലക്ഷം രൂപയിലെത്തി. വെള്ളി കിലോയ്ക്ക് 5,655 രൂപ കൂടി 1.84 ലക്ഷം രൂപയെന്ന നിരക്കിലുമെത്തി. കേരളത്തിൽ ഒരു പവൻ സ്വർണ്ണത്തിന് 3,440 രൂപയുടെ വർധനയുണ്ടായി 1,05,280 രൂപയിലാണ് വ്യാപാരം നടക്കുന്നത്. ഒരു വേള പവന് 1,07,080 രൂപ വരെ വില ഉയർന്നിരുന്നു.
അതേസമയം, വെള്ളിയാഴ്ച പുറത്തുവന്ന ശക്തമായ അമേരിക്കൻ തൊഴിൽ റിപ്പോർട്ടുകൾ ഡോളറിന്റെയും ബോണ്ട് വരുമാനത്തിന്റെയും കരുത്ത് വർധിപ്പിച്ചത് സ്വർണ്ണത്തിനും വെള്ളിക്കും തിരിച്ചടിയായി. പലിശനിരക്ക് ഉയർന്ന നിലയിൽ തുടരുന്നത് പലിശ നൽകുന്ന ആസ്തിയല്ലാത്ത സ്വർണ്ണത്തോടുള്ള നിക്ഷേപകരുടെ താല്പര്യം കുറയ്ക്കുന്നു. റഷ്യ-യുക്രെയിൻ പ്രതിസന്ധി, ഇറാനിലെ പുതിയ സാഹചര്യങ്ങൾ, ക്രൂഡ് ഓയിൽ വിലയിലെ വ്യതിയാനങ്ങൾ എന്നിവയും വിപണിയെ ബാധിക്കും. അതിനാൽ, കഴിഞ്ഞ ആഴ്ച കണ്ട കുതിപ്പ് തുടരുമോയെന്ന കാര്യത്തിൽ വിപണി വിദഗ്ധർ ആശങ്ക പ്രകടിപ്പിക്കുന്നു.
വിപണിയെ സ്വാധീനിക്കുന്ന പ്രധാന ഘടകങ്ങൾ
അമേരിക്കൻ ഉപഭോക്തൃ നാണയപ്പെരുപ്പ റിപ്പോർട്ട്
ഇന്ത്യയുടെ ഒക്ടോബർ മാസത്തെ റീട്ടെയിൽ പണപ്പെരുപ്പ കണക്കുകൾ
ചൈന, ജർമ്മനി, ജപ്പാൻ തുടങ്ങിയ രാജ്യങ്ങളുടെ സാമ്പത്തിക വളർച്ചാ നിരക്ക്
യുഎസ് ഫെഡറൽ റിസർവ് യോഗത്തിന്റെ മിനിട്സ് വിശദാംശങ്ങൾ
കഴിഞ്ഞ വാരം പവൻ വിലയിലുണ്ടായ വർദ്ധന
3,440 രൂപ
ഈ വർഷം ചൈന സമാഹരിച്ച സ്വർണം
129 ടൺ
സ്വർണ്ണശേഖരം വർദ്ധിപ്പിച്ച് ചൈന
രാജ്യാന്തര വിപണിയിൽ സ്വർണ്ണവിലയിൽ വലിയ ഇടിവ് നേരിട്ടപ്പോഴും ചൈനീസ് കേന്ദ്രബാങ്ക് സ്വർണ്ണം വൻതോതിൽ വാങ്ങി കൂട്ടുകയാണ്. ഒക്ടോബറിൽ മാത്രം 25.8 ടൺ സ്വർണ്ണമാണ് ചൈന സ്വന്തമാക്കിയത്. തുടർച്ചയായ 24-ാം മാസമാണ് ചൈനയുടെ സ്വർണ്ണ ശേഖരത്തിൽ വർധന രേഖപ്പെടുത്തുന്നത്. ഇതോടെ ചൈനയുടെ ആകെ സ്വർണ്ണ ശേഖരം 2,435 ടണ്ണായി ഉയർന്നു. ഒക്ടോബറിൽ സ്വർണ്ണവില ഔൺസിന് 4,000 ഡോളറിന് താഴേക്ക് വീണിരുന്നു.
