അനിയന്ത്രിത സൗന്ദര്യവർധക ഉൽപന്ന വിപണി: സുരക്ഷാ മാനദണ്ഡങ്ങളില്ലാതെ നിർമാണവും വിൽപനയും

ന്യൂഡൽഹി ∙ സൗന്ദര്യവർധക വസ്തുക്കളുടെ വിപണി അതിവേഗം വികസിച്ചുകൊണ്ടിരിക്കുകയാണെങ്കിലും, ഉപഭോക്താക്കളുടെ സുരക്ഷ ഉറപ്പാക്കുന്നതിനായി കേന്ദ്ര-സംസ്ഥാന തലങ്ങളിൽ പ്രവർത്തിക്കേണ്ട നിരീക്ഷണ സംവിധാനങ്ങൾ തീർത്തും അപര്യാപ്തമാണ്. 2020-ലെ കോസ്മെറ്റിക്സ് ചട്ടങ്ങൾ പ്രകാരം സൗന്ദര്യവർധക ഉൽപന്നങ്ങളുടെ നിർമാണം, വിദേശത്തുനിന്നുള്ള ഇറക്കുമതി, വിപണിയിലെ ഗുണനിലവാരം എന്നിവ പരിശോധിച്ചു ഉറപ്പുവരുത്തേണ്ട ഉത്തരവാദിത്തം സെൻട്രൽ ഡ്രഗ്സ് സ്റ്റാൻഡേർഡ് കൺട്രോൾ ഓർഗനൈസേഷനാണ് (സിഡിഎസ്സിഒ). എന്നാൽ, ഈ ഏജൻസിയുടെ ‘സുഗം ലാബ്സ്’ പോർട്ടലിലെ കണക്കുകൾ പരിശോധിച്ചാൽ നിരീക്ഷണ സംവിധാനങ്ങളുടെ കെടുകാര്യസ്ഥത വ്യക്തമാകും.
∙ സൗന്ദര്യമുള്ള കണക്ക്; വായുവിൽ എഴുതിക്കൂട്ടും
സിഡിഎസ്സിഒയുടെ പോർട്ടലിൽ 3850 സൗന്ദര്യവർധക സാംപിളുകൾ പരിശോധനയ്ക്ക് വിധേയമാക്കിയിട്ടുണ്ടെന്ന് രേഖപ്പെടുത്തിയിട്ടുണ്ട്. എന്നാൽ, ഈ സാമ്പിളുകൾ ഏത് കാലയളവിൽ എവിടെനിന്നാണ് ശേഖരിച്ചതെന്നോ, ഇതിൽ എത്രയെണ്ണം ഗുണനിലവാരമില്ലാത്തതാണെന്നോ, നിയമലംഘനം നടത്തിയ സ്ഥാപനങ്ങൾക്കെതിരെ എന്ത് നടപടി സ്വീകരിച്ചുവെന്നോ ഉള്ള കാര്യത്തിൽ കേന്ദ്ര ഭരണകൂടത്തിന് കൃത്യമായ മറുപടിയില്ല. വ്യാജമായതോ നിലവാരമില്ലാത്തതോ ആയ ഉൽപന്നങ്ങൾ വിറ്റഴിക്കുന്ന സ്ഥാപനങ്ങളെ സംബന്ധിച്ചുള്ള ഒരു കേന്ദ്രീകൃത വിവരശേഖരണ സംവിധാനം പോലുമില്ലെന്നതാണ് ഏറെ ഗൗരവകരമായ കാര്യം.
∙ നിയന്ത്രണമില്ലാത്ത ഓൺലൈൻ വിപണി
സമൂഹമാധ്യമങ്ങളിൽ സെലിബ്രിറ്റികളെയും ഇൻഫ്ലുവൻസർമാരെയും ഉപയോഗിച്ച് വിപണനം നടത്തുന്ന സൗന്ദര്യവർധക ഉൽപന്നങ്ങളെ നിയന്ത്രിക്കാൻ സർക്കാർ കാര്യമായ ഒരു ഇടപെടലും നടത്തുന്നില്ല. സാധാരണ വിപണിയിൽ ലഭ്യമല്ലാത്ത ഒട്ടേറെ ഉൽപന്നങ്ങളാണ് ഇത്തരം പരസ്യങ്ങളിലൂടെ വിറ്റഴിക്കപ്പെടുന്നത്. കൃത്യമായ ലേബലുകളോ, നിർമാതാവിനെക്കുറിച്ചുള്ള വിവരങ്ങളോ, ചേരുവകളെ സംബന്ധിച്ച വ്യക്തതയോ ഇല്ലാതെ വിദേശത്തുനിന്നും മറ്റും ഇറക്കുമതി ചെയ്യുന്ന ഇത്തരം ഉൽപന്നങ്ങൾ ഉപഭോക്താക്കളുടെ ആരോഗ്യത്തിന് വലിയ ഭീഷണിയാണ് ഉയർത്തുന്നത്.




