സോനു നിഗം 44 കോടി രൂപയ്ക്ക് സ്വന്തമാക്കിയത് ആഡംബര പ്രോപ്പർട്ടി
തന്റെ മനോഹരമായ ആലാപനത്തിലൂടെ ദശലക്ഷക്കണക്കിന് ആരാധകരെ ആവേശം കൊള്ളിച്ച പ്രശസ്ത ഗായകൻ സോനു നിഗം, ഇപ്പോൾ സംഗീതത്തിന് അപ്പുറമുള്ള മറ്റൊരു വലിയ നേട്ടത്തിന്റെ പേരിലാണ് ശ്രദ്ധാകേന്ദ്രമാകുന്നത്. മുംബൈയിലെ റിയൽ എസ്റ്റേറ്റ് മേഖലയിൽ കോടികളുടെ നിക്ഷേപം നടത്തിക്കൊണ്ടാണ് അദ്ദേഹം ഏവരെയും അമ്പരപ്പിച്ചിരിക്കുന്നത്. അന്ധേരിയിലെ അത്യാഡംബര പാർപ്പിട സമുച്ചയമായ ‘വർത്തമാന’നിൽ ഒരു വമ്പൻ ഫ്ലാറ്റ് താരം സ്വന്തമാക്കിയിരിക്കുന്നു.
പ്രമുഖ പ്രോപ്പർട്ടി കൺസൾട്ടൻസി സ്ഥാപനമായ ലിയാസസ് ഫോറാസിന്റെ രേഖകൾ വ്യക്തമാക്കുന്നത് പ്രകാരം, അന്ധേരി വെസ്റ്റിൽ 3,055 ചതുരശ്ര അടി വിസ്തീർണമുള്ള ആഡംബര അപ്പാർട്ട്മെന്റിനായി സോനു നിഗം മുടക്കിയത് 44.30 കോടി രൂപയാണ്. ഒക്ടോബർ 30-നാണ് ഈ സ്വത്ത് കൈമാറ്റത്തിന്റെ റജിസ്ട്രേഷൻ നടപടികൾ പൂർത്തിയായത്. ജുഹു വെർസോവ ലിങ്ക് റോഡിൽ സ്ഥിതി ചെയ്യുന്ന ‘വർത്തമാൻ’ എന്ന കെട്ടിടത്തിന്റെ ഉയർന്ന നിലയിലാണ് ഈ പുതിയ ഭവനം ഒരുക്കിയിരിക്കുന്നത്. നാല് കാർ പാർക്കിങ് സൗകര്യങ്ങളും ഈ അപ്പാർട്ട്മെന്റിന്റെ ഭാഗമായി ലഭ്യമാണ്.
മോണിഷ് മംഗൽകുമാർ ദർദയിൽ നിന്നാണ് സോനു നിഗം ഈ പ്രോപ്പർട്ടി വാങ്ങിയത്. 44.30 കോടി രൂപ വില വരുന്ന ഈ ഇടപാടിനായി സ്റ്റാമ്പ് ഡ്യൂട്ടിയായി മാത്രം 2.65 കോടി രൂപ ഖജനാവിലേക്ക് അടച്ചു. ബ്രിഹൻമുംബൈ മുനിസിപ്പൽ കോർപറേഷന്റെ അധികാരപരിധിയിൽ വരുന്ന 1,516 ചതുരശ്ര മീറ്റർ സ്ഥലത്താണ് ഈ കെട്ടിടം നിലകൊള്ളുന്നത്.
കഴിഞ്ഞ കുറച്ചു വർഷങ്ങളായി റിയൽ എസ്റ്റേറ്റ് വിപണിയിൽ വളരെ സജീവമാണ് സോനു നിഗം. മുംബൈയുടെ വിവിധ ഇടങ്ങളിൽ വാണിജ്യ ആവശ്യങ്ങൾക്കായി അദ്ദേഹം ഭൂമിയും കെട്ടിടങ്ങളും വാങ്ങുകയും വിൽക്കുകയും ചെയ്യുന്നുണ്ട്. ഇതിന് മുൻപ് 2026 ഒക്ടോബറിൽ അന്ധേരി ലോഖണ്ഡ്വാല റോഡിലെ ‘ആസ്റ്റൺ’ കോംപ്ലക്സിൽ 17 കോടി രൂപ മുടക്കി മൂന്ന് വാണിജ്യ യൂണിറ്റുകൾ അദ്ദേഹം സ്വന്തമാക്കിയിരുന്നു. ഒന്നാം നിലയിലെ രണ്ട് ഓഫിസ് ഇടങ്ങളും താഴത്തെ നിലയിലെ ഒരു യൂണിറ്റുമാണ് അന്ന് അദ്ദേഹം വാങ്ങിയത്; ഈ ഇടപാടുകൾ ഓഗസ്റ്റ് മാസത്തിൽ ഔദ്യോഗികമായി രേഖപ്പെടുത്തി.
ഇതുകൂടാതെ, ഭൂമി കൈമാറ്റങ്ങളിലും താരം ശ്രദ്ധ കേന്ദ്രീകരിച്ചിട്ടുണ്ട്. 2026 മെയ് മാസത്തിൽ കർജറ്റിലുള്ള 1.067 ഹെക്ടർ സ്ഥലം 95 ലക്ഷം രൂപയ്ക്ക് വിറ്റ അദ്ദേഹം, ഏപ്രിലിൽ ഇതേ ജില്ലയിലെ 1.9 ഹെക്ടറിലധികം വരുന്ന ഭൂമി 1.95 കോടി രൂപയ്ക്കും കൈമാറിയിരുന്നു. കൂടാതെ, ഈ വർഷം ഫെബ്രുവരിയിൽ സോനു നിഗമിന്റെ പിതാവായ അഗം കുമാർ നിഗം മുംബൈ മധ് ഐലൻഡിൽ 10 കോടി രൂപ മുടക്കി ഒരു ഇരുനില കെട്ടിടവും 1,197 ചതുരശ്ര മീറ്റർ സ്ഥലവും വാങ്ങിയിരുന്നു.
