എൻവിഡിയയിൽ വിവാദങ്ങളുടെ പെരുമഴ: ജെൻസൻ ഹുവാങ്ങിന്റെ പദവി ഭീഷണിയിൽ, പിൻഗാമിയായി ആര്?
ചാരവൃത്തി ആരോപണങ്ങളും സ്വകാര്യ ജീവിതത്തെ ചുറ്റിപ്പറ്റിയുള്ള വിവാദങ്ങളും കനത്ത വെല്ലുവിളികൾ ഉയർത്തിയ സാഹചര്യത്തിൽ, ആഗോളതലത്തിൽ ഏറ്റവും മൂല്യമുള്ള സെമികണ്ടക്ടർ കമ്പനിയായ എൻവിഡിയയുടെ സഹസ്ഥാപകനും സിഇഒയുമായ ജെൻസൻ ഹുവാങിനെ സ്ഥാനത്തുനിന്ന് നീക്കം ചെയ്യാൻ ഡയറക്ടർ ബോർഡ് ആലോചിക്കുന്നതായി റിപ്പോർട്ടുകൾ പുറത്തുവരുന്നു. ആർട്ടിഫിഷ്യൽ ഇന്റലിജൻസ് മേഖലയിലെ കുത്തകാവകാശം കൈയ്യാളുന്ന കമ്പനിയുടെ തലവൻ ഇത്തരമൊരു വിവാദത്തിൽ അകപ്പെട്ട് പടിയിറങ്ങുന്നത് സാങ്കേതിക വിപണിയിൽ വലിയൊരു വിടവ് സൃഷ്ടിക്കുമെന്നാണ് വിദഗ്ധരുടെ നിരീക്ഷണം.
ചൈനീസ് ചാരവൃത്തി സംബന്ധിച്ച ഗുരുതരമായ ആരോപണങ്ങളും വ്യക്തിപരമായ വിവാദങ്ങളും ഒരേസമയം നേരിടുന്ന ജെൻസൻ ഹുവാങിനെതിരെ കർശന നിലപാട് സ്വീകരിക്കാനാണ് കമ്പനിയുടെ ബോർഡ് ഒരുങ്ങുന്നത്. അദ്ദേഹത്തിന്റെ തുടർയാത്ര സംബന്ധിച്ച അന്തിമ തീരുമാനമെടുക്കാൻ ബുധനാഴ്ച നിർണായകമായ ബോർഡ് യോഗം വിളിച്ചുചേർത്തിട്ടുണ്ടെന്നാണ് വിവരം. കഴിഞ്ഞ മുപ്പത് വർഷത്തിലേറെയായി എൻവിഡിയയെ തോളിലേറ്റുകയും ആഗോള എഐ വിപ്ലവത്തിന് ചുക്കാൻ പിടിക്കുകയും ചെയ്ത ഹുവാങിന്റെ അപ്രതീക്ഷിത മടക്കം കമ്പനിയെ സംബന്ധിച്ച് വലിയൊരു പ്രതിസന്ധിക്ക് വഴിവെച്ചേക്കാം.
ജെൻസൻ ഹുവാങ് പദവി ഒഴിഞ്ഞാൽ പകരം ആര് കമ്പനിയുടെ അമരക്കാരനാകുമെന്ന ചർച്ചകളാണ് ഇപ്പോൾ സാങ്കേതിക ലോകത്ത് സജീവമായി നടക്കുന്നത്.
