ട്രംപിന്റെ ഇടപെടലിൽ ഫ്ലാവിയോയ്ക്ക് വീസ: അമേരിക്കയിലേക്കുള്ള മടക്കയാത്രയ്ക്ക് വഴിയൊരുങ്ങി; നിർണായക നീക്കവുമായി സ്റ്റേറ്റ് ഡിപ്പാർട്ട്മെന്റ്
സാവോ പോളോ: ബ്രസീലിയൻ പ്രസിഡന്റ് തിരഞ്ഞെടുപ്പിൽ പരാജയപ്പെട്ട ഫ്ലാവിയോ ബൊൽസൊനാരോയും കുടുംബവും ഇക്വഡോർ വഴിയാണ് അമേരിക്കയിലേക്ക് കടന്നത്. ചൊവ്വാഴ്ച രാത്രി ഭാര്യയോടും രണ്ട് പെൺമക്കളോടുമൊപ്പം കരമാർഗ്ഗം അർജന്റീനയിലെത്തിയ ഇവർ, അവിടെനിന്ന് സ്വകാര്യ ചാർട്ടേഡ് വിമാനത്തിൽ ഇക്വഡോറിലേക്ക് യാത്ര തിരിക്കുകയായിരുന്നു.
ഇന്നലെ പുലർച്ചെയോടെ ഇക്വഡോറിലെ ഗായക്വിലിൽ വിമാനമിറങ്ങിയ സംഘം തുടർന്ന് ഫ്ലോറിഡയിലെ മയാമി ലക്ഷ്യമാക്കി യാത്ര തുടർന്നു. മയാമി വിമാനത്താവളത്തിൽ എത്തിയ ഇവരെ യുഎസ് സ്റ്റേറ്റ് ഡിപ്പാർട്ട്മെന്റ് പ്രതിനിധികൾ നേരിട്ടെത്തി സ്വീകരിച്ചു. തിരഞ്ഞെടുപ്പിലെ തിരിച്ചടിക്ക് പിന്നാലെ ഫ്ലാവിയോയ്ക്കും കുടുംബത്തിനും ട്രംപ് ഭരണകൂടം യുഎസ് വീസ അനുവദിച്ചിരുന്നു.
അഴിമതിക്കേസുകളിൽ അന്വേഷണം നേരിടുന്ന സാഹചര്യത്തിൽ, പാസ്‌പോർട്ടുകൾ കോടതിയിൽ സമർപ്പിക്കണമെന്ന് തിങ്കളാഴ്ച സുപ്രീം കോടതി ഇദ്ദേഹത്തിന് നിർദ്ദേശം നൽകിയിരുന്നു. തിരഞ്ഞെടുപ്പ് ഫലം പുറത്തുവന്ന് 48 മണിക്കൂറിനുള്ളിൽ തന്നെ രാജ്യം വിട്ട ഫ്ലാവിയോയുടെ നടപടി അങ്ങേയറ്റം ലജ്ജാകരമാണെന്ന് തിരഞ്ഞെടുപ്പിൽ വിജയിച്ച ലുല ഡസിൽവ വിമർശിച്ചു. ഈ പലായനത്തിന് അർജന്റീന ഒത്താശ ചെയ്തത് ഇരുരാജ്യങ്ങളും തമ്മിലുള്ള നയതന്ത്ര ബന്ധത്തിൽ കടുത്ത വിള്ളലുണ്ടാക്കാൻ കാരണമാകും. ട്രംപിന്റെ കടുത്ത അനുയായിയും അർജന്റീനയുടെ പ്രസിഡന്റുമായ ഹവിയർ മിലേ, ഫ്ലാവിയോയുടെ തിരഞ്ഞെടുപ്പ് പ്രചാരണത്തിനായി ബ്രസീലിൽ നേരിട്ടെത്തിയിരുന്നു.
