18 വയസ്സിൽ താഴെയുള്ള കുറ്റാരോപിതർക്ക് പ്രത്യേക നിയമനടപടികളും ജുവനൈൽ ജസ്റ്റിസ് ഹോമുകളും
ആലപ്പുഴ കരുവാറ്റയിൽ മുത്തച്ഛനെ കൊലപ്പെടുത്തിയ സംഭവത്തിൽ പതിമൂന്നുകാരിയും സുഹൃത്തുക്കളും പിടിയിലായതും, നെടുമ്പാശേരിയിൽ കാറിടിച്ച് മൂന്ന് സ്കൂട്ടർ യാത്രക്കാരുടെ മരണത്തിന് കാരണക്കാരനായ പത്തൊൻപതുകാരൻ, ചേരാനല്ലൂരിൽ സ്കൂട്ടർ യാത്രികനെ കാറിടിച്ചു കൊലപ്പെടുത്തിയ പതിനേഴുകാരൻ തുടങ്ങി, കൗമാരക്കാർ കുറ്റകൃത്യങ്ങളിൽ പങ്കാളികളാകുന്ന സംഭവങ്ങൾ കേരളത്തിൽ ആശങ്കാജനകമാംവിധം ഉയരുകയാണ്. ഇത്തരത്തിലുള്ള കേസുകളിൽ പിന്തുടരുന്ന നിയമവ്യവസ്ഥകൾക്ക് സാധാരണ കോടതി നടപടികളിൽനിന്ന് വലിയ വ്യത്യാസങ്ങളുണ്ട്.
പ്രായപൂർത്തിയാകാത്തവർ ഉൾപ്പെടുന്ന കേസുകൾ സാധാരണ കോടതികളിലല്ല, മറിച്ച് ഒരു മജിസ്ട്രേറ്റും രണ്ട് അംഗങ്ങളും അടങ്ങുന്ന ജുവനൈൽ ജസ്റ്റിസ് ബോർഡാണ് (ജെജെബി) കൈകാര്യം ചെയ്യുന്നത്. കുറ്റകൃത്യത്തിന്റെ ഗൗരവം എത്ര വലുതാണെങ്കിലും, ജെജെബിക്ക് നൽകാവുന്ന ഏറ്റവും ഉയർന്ന ശിക്ഷാ കാലാവധി മൂന്ന് വർഷം മാത്രമാണ്. എങ്കിലും, കൊലപാതകം പോലെയുള്ള അതിഗുരുതരമായ കുറ്റകൃത്യങ്ങളിൽ ഏർപ്പെടുന്ന 16 മുതൽ 18 വയസ്സുവരെയുള്ള കൗമാരക്കാരെ, വിദഗ്ധ സമിതിയുടെ പരിശോധനാ റിപ്പോർട്ടിന്റെ പിൻബലത്തിൽ മുതിർന്ന വ്യക്തികളായി പരിഗണിച്ച് പ്രത്യേക കോടതിയിൽ വിചാരണ ചെയ്യാൻ നിയമം അനുശാസിക്കുന്നുണ്ട്. എങ്കിലും, ഇത്തരം സാഹചര്യങ്ങളിൽ പോലും ഇവർക്ക് വധശിക്ഷയോ അല്ലെങ്കിൽ ജീവപര്യന്തം തടവോ നൽകാൻ നിലവിലെ നിയമം അനുവദിക്കുന്നില്ല.
ഈ കേസുകളിൽ ഉപയോഗിക്കുന്ന നിയമപരമായ പദപ്രയോഗങ്ങളിലും വലിയ മാറ്റങ്ങളുണ്ട്. കുറ്റാരോപിതൻ എന്ന് വിളിക്കുന്നതിന് പകരം ‘നിയമവുമായി പൊരുത്തപ്പെടാത്ത കുട്ടി (child in conflict with law)’ എന്നാണ് ഔദ്യോഗികമായി വിശേഷിപ്പിക്കുന്നത്. അറസ്റ്റ് എന്നതിന് ‘അപ്രിഹെൻഷൻ’ എന്നും, റിമാൻഡ് ചെയ്യുന്നതിന് ‘പ്ലേസ്മെന്റ്’ എന്നുമാണ് പറയുക. കൂടാതെ, കുറ്റപത്രം എന്നത് ‘ഫൈനൽ റിപ്പോർട്ട്’ എന്നും, എഫ്ഐആറിന് പകരമായി ‘സോഷ്യൽ ബാക്ഗ്രൗണ്ട് റിപ്പോർട്ട് (എസ്ബിആർ)’ എന്നുമാണ് ഔദ്യോഗിക രേഖകളിൽ രേഖപ്പെടുത്തുന്നത്.
