ഇസ്രയേൽ തെരഞ്ഞെടുപ്പ്: നെതന്യാഹുവിന്റെ പാർട്ടി മുന്നിൽ, നിർണായകമായി അറബ് പാർട്ടികൾ
ജറുസലം ∙ ഇസ്രയേൽ പൊതുതിരഞ്ഞെടുപ്പിൽ ബെന്യാമിൻ നെതന്യാഹു നേതൃത്വം നൽകുന്ന സഖ്യത്തിന് മുൻതൂക്കം ലഭിച്ചെങ്കിലും ഭൂരിപക്ഷം തെളിയിക്കാനാവതെ പ്രതിസന്ധി തുടരുന്നു. ലിക്കുഡ് പാർട്ടി മുന്നിൽനിൽക്കുന്ന വലതുപക്ഷ കൂട്ടുകെട്ടിന് ഇത്തവണ 53 സീറ്റുകളിൽ മാത്രമാണ് വിജയിക്കാനായത്. അധികാരം പിടിക്കാൻ ആവശ്യമായ 61 എന്ന കേവലഭൂരിപക്ഷം കടക്കാൻ സാധിക്കാത്തത് രാഷ്ട്രീയ അനിശ്ചിതത്വത്തിന് വഴിവെച്ചിരിക്കുകയാണ്.
നെതന്യാഹുവിന്റെ മുഖ്യ എതിരാളിയായ ഗാദി ഐസൻകോട്ടിന്റെ നേതൃത്വത്തിലുള്ള യാഷർ സഖ്യം 48 സീറ്റുകൾ സ്വന്തമാക്കി ഭേദപ്പെട്ട പ്രകടനം കാഴ്ചവെച്ചു. മുൻപ് 64 സീറ്റുകളുടെ കരുത്തുണ്ടായിരുന്ന നെതന്യാഹു പക്ഷത്തിന് ഇത്തവണ വലിയ തകർച്ചയാണ് നേരിടേണ്ടി വന്നത്. 19 സീറ്റുകൾ കൈപ്പിടിയിലാക്കിയ അറബ് സഖ്യമായിരിക്കും ഇസ്രയേലിന്റെ ഭാവി ഭരണകൂടത്തെ തീരുമാനിക്കുന്നതിൽ നിർണായക പങ്കുവഹിക്കുകയെന്നത് വ്യക്തമായിട്ടുണ്ട്.
തിരഞ്ഞെടുപ്പിൽ ഏറ്റവും വലിയ ഒറ്റക്കക്ഷിയായി ലിക്കുഡ് പാർട്ടി തുടരുന്നുണ്ടെങ്കിലും ലഭിച്ചത് 27 സീറ്റുകൾ മാത്രമാണ്. അവിഗ്ദോർ ലീബർമാന്റെ ഇസ്രയേൽ ഔർ ഹോം പാർട്ടിക്ക് 5.93 ശതമാനം വോട്ടുകളോടെ 7 സീറ്റുകൾ ലഭിച്ചു. നെതന്യാഹു സഖ്യത്തിലുള്ള ഇത്‌മർ ബെൻഗ്‌വിറിന്റെ പാർട്ടിക്ക് 5.58 ശതമാനം വോട്ട് വിഹിതത്തോടെ 7 സീറ്റുകൾ ലഭിച്ചപ്പോൾ, സഖ്യത്തിലെ തന്നെ ബെസലേൽ സ്മോട്രിച്ചിന്റെ പാർട്ടിക്ക് 4.78 ശതമാനം വോട്ടുകളും 6 സീറ്റുകളും കൊണ്ട് തൃപ്തിപ്പെടേണ്ടി വന്നു.
