നെതന്യാഹുവിന് ലീഡ്, പക്ഷെ ഭൂരിപക്ഷം ബാലികേറാമല; ഇസ്രായേൽ രാഷ്ട്രീയത്തിൽ അപ്രതീക്ഷിത ട്വിസ്റ്റ്
ജറുസലം ∙ ഇസ്രയേൽ പൊതുതിരഞ്ഞെടുപ്പിലെ വോട്ടെണ്ണൽ 86 ശതമാനം പിന്നിടുമ്പോൾ, പ്രധാനമന്ത്രി ബെന്യാമിൻ നെതന്യാഹുവിന് ആശ്വാസം പകരുന്ന മുന്നേറ്റമാണ് പ്രകടമാകുന്നത്. വോട്ടെടുപ്പിന് പിന്നാലെ പുറത്തുവന്ന എക്സിറ്റ് പോൾ ഫലങ്ങൾ പ്രതിപക്ഷത്തിന് അനുകൂലമായിരുന്നുവെങ്കിൽ, നിലവിലെ കണക്കുകൾ ആ ചിത്രം തിരുത്തിക്കുറിക്കുകയാണ്. ആകെ 120 സീറ്റുകളുള്ള പാർലമെന്റിൽ നെതന്യാഹുവിന്റെ തീവ്രവലതുപക്ഷ സഖ്യം ഇതിനോടകം 53 സീറ്റുകളിൽ വിജയിച്ചു കഴിഞ്ഞു. മുഖ്യപ്രതിപക്ഷമായ ഗാദി ഐസൻകോട്ടിന്റെ നേതൃത്വത്തിലുള്ള സഖ്യം 48 സീറ്റിലും, അറബ് പാർട്ടികൾ 19 സീറ്റിലും മുന്നിട്ടുനിൽക്കുന്നു.
ഭൂരിപക്ഷം നേടാൻ ആവശ്യമായ സീറ്റുകൾ ലഭിക്കാത്തതിനാൽ സർക്കാർ രൂപീകരണത്തിന്റെ കാര്യത്തിൽ അനിശ്ചിതത്വം തുടരുകയാണ്. നെതന്യാഹുവിന്റെ ലിക്കുഡ് പാർട്ടി ഇത്തവണയും ഏറ്റവും വലിയ ഒറ്റക്കക്ഷിയായി മാറുമെന്നാണ് കണക്കുകൂട്ടലുകൾ. അതേസമയം, പ്രതിപക്ഷ പാർട്ടികൾ കൈകോർത്ത് 61 സീറ്റെന്ന മാന്ത്രിക സംഖ്യ തികയ്ക്കാൻ സാധിച്ചാൽ നെതന്യാഹുവിന് അധികാരം നഷ്ടപ്പെടാൻ സാധ്യതയുണ്ട്.
ഇതിനിടെ, വോട്ടെടുപ്പിൽ അറബ് പാർട്ടികൾ വ്യാപകമായ ക്രമക്കേടുകൾ നടത്തിയെന്ന ഗുരുതര ആരോപണവുമായി ലിക്കുഡ് പാർട്ടി രംഗത്തെത്തിയിട്ടുണ്ട്. ഇത്തരത്തിലുള്ള പ്രവണതകൾ രാജ്യത്തിന്റെ ജനാധിപത്യ അടിത്തറയെയും തിരഞ്ഞെടുപ്പ് സംവിധാനത്തിന്റെ വിശ്വാസ്യതയെയും പ്രതികൂലമായി ബാധിക്കുമെന്ന് പാർട്ടി മുന്നറിയിപ്പ് നൽകുന്നു. വിഷയത്തിൽ സമഗ്രമായ അന്വേഷണം നടത്തി കുറ്റക്കാർക്കെതിരെ കർശന നടപടി സ്വീകരിക്കണമെന്നും ലിക്കുഡ് പാർട്ടി ആവശ്യപ്പെട്ടു. അറബ് മേഖലകളിലെ പോളിങ് സ്റ്റേഷനുകളിൽ അക്രമം, ഭീഷണിപ്പെടുത്തൽ, വ്യാജരേഖകൾ നിർമിക്കൽ, കള്ളവോട്ട്, കൈക്കൂലി നൽകൽ തുടങ്ങിയ നിയമവിരുദ്ധ പ്രവർത്തനങ്ങൾ നടന്നതായും, ഇതിനെ സാധൂകരിക്കുന്ന തെളിവുകളും നൂറുകണക്കിന് മൊഴികളും ഉടൻ പുറത്തുവിടുമെന്നും നെതന്യാഹു തന്റെ ഔദ്യോഗിക സോഷ്യൽ മീഡിയ അക്കൗണ്ടിലൂടെ വ്യക്തമാക്കി.
