സൗദി അരാംകോ ആസ്ഥാനത്തിന് നേരെ ഹൂതി ആക്രമണം: വൻ ദുരന്തം ഒഴിവായി
റിയാദ്: സൗദി അറേബ്യയുടെ ഔദ്യോഗിക എണ്ണക്കമ്പനിയായ അരാംകോയുടെ തലസ്ഥാനത്തെ ഭരണനിർവഹണ കേന്ദ്രത്തിനു നേരെ ഹൂതി വിമതർ ആക്രമണത്തിന് മുതിർന്നതായി സൗദി ഊർജ മന്ത്രാലയം സ്ഥിരീകരിച്ചു. ആക്രമണത്തെത്തുടർന്ന് കെട്ടിടത്തിന് മുകളിലേക്ക് പതിച്ച അവശിഷ്ടങ്ങൾ കാരണം കെട്ടിടത്തിന് നേരിയ കേടുപാടുകൾ സംഭവിച്ചെങ്കിലും, ആർക്കും പരിക്കുകളോ ജീവഹാനിയോ റിപ്പോർട്ട് ചെയ്തിട്ടില്ലെന്ന് സൗദി പ്രസ് ഏജൻസി വഴി മന്ത്രാലയ വക്താവ് വ്യക്തമാക്കി. അടിയന്തര സാഹചര്യത്തിൽ അധികൃതർ ഉടൻ തന്നെ ഇടപെടുകയും ആവശ്യമായ സുരക്ഷാ സംവിധാനങ്ങൾ ഒരുക്കുകയും ചെയ്തു.
രാജ്യതലസ്ഥാനമായ റിയാദ്, കിഴക്കൻ പ്രവിശ്യ, സൗദിയുടെ തെക്കൻ ഭാഗങ്ങൾ എന്നിവ ലക്ഷ്യമിട്ട് നിരവധി ആക്രമണ ശ്രമങ്ങൾ നടന്നതായി സഖ്യസേനയുടെ വക്താവ് മേജർ ജനറൽ തുർക്കി അൽ മാലിക്കി അറിയിച്ചു. വ്യോമപ്രതിരോധ സേനയുടെ സജീവമായ ഇടപെടലിലൂടെ വൻ ദുരന്തം ഒഴിവാക്കാനായി. കിഴക്കൻ മേഖലയിലേക്ക് തൊടുത്ത ഒരു ബാലിസ്റ്റിക് മിസൈലും റിയാദിനെ ലക്ഷ്യമിട്ട രണ്ട് ബാലിസ്റ്റിക് മിസൈലുകളും വ്യോമസേന ആകാശത്തുവെച്ചു തന്നെ തകർത്തു. കൂടാതെ, റിയാദിലേക്കും രാജ്യത്തിന്റെ തെക്കൻ മേഖലയിലേക്കും അയച്ച രണ്ട് ക്രൂയിസ് മിസൈലുകളെയും തങ്ങളുടെ സേന വിജയകരമായി നിർവീര്യമാക്കിയതായി മേജർ ജനറൽ തുർക്കി അൽ മാലിക്കി കൂട്ടിച്ചേർത്തു.
