കോൺഗ്രസിനെ അറബിക്കടലിലെറിയണം: പരിഹാസവുമായി സുരേഷ് ഗോപി
കേന്ദ്രമന്ത്രി സുരേഷ് ഗോപി
തൃശൂർ: കോൺഗ്രസിനെ ഇറ്റലിയിലേക്ക് മടക്കി അയക്കുകയല്ല, മറിച്ച് അറബിക്കടലിൽ കൊണ്ടുപോയി തള്ളുകയാണ് വേണ്ടതെന്ന് കേന്ദ്രമന്ത്രി സുരേഷ് ഗോപി തുറന്നടിച്ചു. തൃശൂരിൽ ബിജെപിയുടെ മൂന്ന് ജില്ലാ കമ്മിറ്റികൾ ചേർന്ന് സംഘടിപ്പിച്ച ‘ജനാധിപത്യ സംരക്ഷണ പദയാത്ര’യുടെ സമാപന സമ്മേളനത്തിൽ സംസാരിക്കുകയായിരുന്നു അദ്ദേഹം.
ചടങ്ങിൽ ബിജെപി ദേശീയ നേതാവ് എം.എ. വെങ്കിടേശന്റെ പ്രസംഗത്തിന് തൊട്ടുപിന്നാലെയായിരുന്നു സുരേഷ് ഗോപിയുടെ ഈ പരാമർശം. ബ്രിട്ടീഷ് ഭരണകൂടത്തിന്റെ പിൻമുറക്കാരായ കോൺഗ്രസിനെ ഇറ്റലിയിലേക്കും, ചൈനീസ് ആശയങ്ങളോട് കൂറുപുലർത്തുന്ന കമ്യൂണിസ്റ്റുകാരെ ചൈനയിലേക്കും പറഞ്ഞുവിടണമെന്നായിരുന്നു നേരത്തെ വെങ്കിടേശൻ പ്രസംഗിച്ചത്.
എഫ്.സി.ആർ.എ (FCRA) ഭേദഗതി, വനിതാ സംവരണം, മണ്ഡല പുനർനിർണയം, ഏകീകൃത സിവിൽ കോഡ് തുടങ്ങിയ സുപ്രധാന വിഷയങ്ങളിൽ നിന്ന് ജനശ്രദ്ധ തിരിച്ചുവിടാനാണ് കോൺഗ്രസ് വ്യാജ പ്രചാരണങ്ങളുമായി തെരുവിലിറങ്ങുന്നതെന്ന് സുരേഷ് ഗോപി ആരോപിച്ചു. പാർലമെന്റിന്റെ വർഷകാല സമ്മേളനത്തിൽ എഫ്.സി.ആർ.എ ബിൽ പാസാക്കേണ്ടതുണ്ടായിരുന്നു. എന്നാൽ ആ സമയത്താണ് ‘നീറ്റ്’ വിഷയമുയർത്തി യുവാക്കളെ ഇവർ തെറ്റിദ്ധരിപ്പിച്ച് പ്രക്ഷോഭത്തിന് പ്രേരിപ്പിച്ചത്. വഖഫ് നിയമഭേദഗതിക്കെതിരെ ബിജെപി ഇതര സർക്കാരുകൾ പ്രമേയം പാസാക്കിയതിനെയും അദ്ദേഹം പരിഹസിച്ചു. മുത്തലാഖ് വിരുദ്ധ നിയമം വന്നപ്പോഴും ഇവർ ശക്തമായ എതിർപ്പുമായി രംഗത്തുവന്നു. നിയമത്തിലെ ആറുവർഷത്തെ തടവ് ശിക്ഷയെച്ചൊല്ലിയുള്ള അവരുടെ പരിഭ്രമം അത്ഭുതപ്പെടുത്തുന്നു. തെറ്റുകൾ തുടരുമെന്നും മുത്തലാഖ് നിയമവിരുദ്ധമായി തുടരുമെന്നും എന്നാൽ ശിക്ഷിക്കരുത് എന്നും പറയുന്നതെന്തൊരു വിചിത്രമായ ന്യായമാണെന്നും സുരേഷ് ഗോപി വിമർശിച്ചു.
RELATED TOPICS: SURESH GOPI, CONGRESS, SURESH GOPI CONTROVERSY, BJP KERALA, SURESH GOPI SPEECH
