ചിദംബരം സ്വന്തമാക്കിയത് അപൂർവ്വ ജീപ്പ് റാംഗ്ലർ വില്ലീസ് എഡിഷൻ: വിലയും പ്രത്യേകതകളും ഇതാ
ജീപ്പ് റാംഗ്ലർ വില്ലീസ് ’41 സ്പെഷ്യൽ എഡിഷൻ സ്വന്തമാക്കിയിരിക്കുകയാണ് പ്രശസ്ത സംവിധായകൻ ചിദംബരം. ഇന്ത്യയ്ക്കായി മാത്രമായി പുറത്തിറക്കിയ 41 വാഹനങ്ങളിൽ ഒരെണ്ണമാണ് ഈ ഹിറ്റ് മേക്കർ തന്റെ ഗാരേജിലെത്തിച്ചിരിക്കുന്നത്. നേരത്തെ നടൻ സജിൻ ഗോപു റാംഗ്ലറിന്റെ മോഹിത്തോ എഡിഷൻ സ്വന്തമാക്കിയ വാർത്തയും ശ്രദ്ധനേടിയിരുന്നു. ഏകദേശം 72.30 ലക്ഷം രൂപയാണ് ഈ ആഡംബര വാഹനത്തിന്റെ എക്സ്-ഷോറൂം വില.
റാംഗ്ലറിന്റെ മുൻനിര മോഡലായ റൂബിക്കോൺ പതിപ്പിനെ അടിസ്ഥാനമാക്കിയാണ് വില്ലീസ് ’41 സ്പെഷ്യൽ എഡിഷൻ രൂപകൽപ്പന ചെയ്തിരിക്കുന്നത്. 1941-ലെ ക്ലാസിക് വില്ലീസ് ജീപ്പിന്റെ ഡിസൈൻ ശൈലികളിൽ നിന്നും പ്രചോദനം ഉൾക്കൊണ്ടാണ് ഇതിന്റെ നിർമാണം. വാഹനത്തിന്റെ ആകർഷണീയത വർധിപ്പിക്കാനായി പ്രത്യേക കോസ്മെറ്റിക് മാറ്റങ്ങളും ഫീച്ചർ അപ്‌ഡേറ്റുകളും കമ്പനി ഉൾപ്പെടുത്തിയിട്ടുണ്ട്. വളരെ ചുരുങ്ങിയ എണ്ണം യൂണിറ്റുകൾ മാത്രമാണ് ജീപ്പ് ഇന്ത്യയിൽ അവതരിപ്പിക്കുന്നത് എന്നതിനാൽ ഇതൊരു എക്സ്ക്ലൂസീവ് പതിപ്പാണ്. സാധാരണ റൂബിക്കോൺ വേരിയന്റിനെ അപേക്ഷിച്ച് ഏകദേശം 2 ലക്ഷം രൂപ അധികം നൽകിയാൽ മാത്രമേ ഈ സ്പെഷ്യൽ എഡിഷൻ സ്വന്തമാക്കാൻ സാധിക്കൂ.
ഓഫ്-റോഡിംഗ് വാഹനമായതുകൊണ്ട് തന്നെ ഉയരം കൂടുതലായതിനാൽ, യാത്രക്കാർക്ക് സുഗമമായി കയറാനും ഇറങ്ങാനും സഹായകമായ പവർഡ് സൈഡ് സ്റ്റെപ്പുകൾ വാഹനത്തിലുണ്ട്. സുരക്ഷാ ക്രമീകരണങ്ങളുടെ ഭാഗമായി മുൻവശത്തും പിൻവശത്തും ഡാഷ് ക്യാമറകളും ഘടിപ്പിച്ചിരിക്കുന്നു. കാലാവസ്ഥാ വ്യതിയാനങ്ങളെ അതിജീവിക്കാൻ ശേഷിയുള്ള ഫ്ലോർ മാറ്റുകളും ഇതിന്റെ പ്രത്യേകതയാണ്. ഇതിനുപുറമെ, സൈഡ് ലാഡറോട് കൂടിയ റൂഫ് കാരിയർ, സൺറൈഡർ റൂഫ്‌ടോപ്പ് തുടങ്ങിയ ആക്‌സസറികളും ജീപ്പ് ഇതിനായി വാഗ്ദാനം ചെയ്യുന്നുണ്ട്. ഈ അധിക ആക്‌സസറി പാക്കേജുകൾക്കായി 4.56 ലക്ഷം രൂപയാണ് മുടക്കേണ്ടത്.
