മാനസിക സമ്മർദം വായിലെ ക്യാൻസർ വ്യാപനം വേഗത്തിലാക്കുന്നു: പുതിയ പഠനം
തുടർച്ചയായ മാനസിക സംഘർഷങ്ങൾ വായ്ക്കുള്ളിലെ കാൻസർ കോശങ്ങളുടെ വ്യാപനത്തെ ത്വരിതപ്പെടുത്തുമെന്ന് പുതിയ ശാസ്ത്രീയ പഠന റിപ്പോർട്ട്. സമ്മർദം തലച്ചോറിന്റെ പ്രവർത്തനങ്ങളിൽ വരുത്തുന്ന മാറ്റങ്ങൾ അസ്ഥിമജ്ജയെയും ശരീരത്തിന്റെ പ്രതിരോധ സംവിധാനത്തെയും പ്രതികൂലമായി ബാധിക്കുന്നുണ്ടെന്നാണ് ഗവേഷകരുടെ കണ്ടെത്തൽ. അർബുദത്തിനെതിരെ പോരാടേണ്ട പ്രതിരോധ കോശങ്ങളുടെ വീര്യത്തെ ഇത് ചോർത്തിക്കളയുകയും, തൽഫലമായി കാൻസർ വളർച്ചയ്ക്ക് ആവശ്യമായ സാഹചര്യം ഒരുങ്ങുകയും ചെയ്യുന്നുവെന്ന് വെസ്റ്റ് ചൈന ആശുപത്രിയിലെ വിദഗ്ധർ നടത്തിയ പഠനം വ്യക്തമാക്കുന്നു.
നീണ്ടുനിൽക്കുന്ന മാനസിക സമ്മർദം തലച്ചോറിലെ ഹൈപ്പോതലാമസ് എന്ന ഗ്രന്ഥിയെ ഉത്തേജിപ്പിക്കുന്നതോടെയാണ് പ്രശ്നങ്ങൾ തുടങ്ങുന്നത്. ഇത് ഹൈപ്പോതലാമസ്-പിറ്റ്യൂട്ടറി-ബോൺ മാരോ അച്ചുതണ്ടിന്റെ പ്രവർത്തനരീതിയിൽ സാരമായ മാറ്റങ്ങൾ വരുത്തുന്നു. ഇതിന്റെ ഫലമായി പിറ്റ്യൂട്ടറി ഗ്രന്ഥിയിൽ ചില ഹോർമോണുകൾ അമിതമായി ഉൽപ്പാദിപ്പിക്കപ്പെടുന്നു. ഇത്തരത്തിൽ വർധിക്കുന്ന ഹോർമോണുകൾ ചില നിശ്ചിത പ്രതിരോധ കോശങ്ങളുടെ എണ്ണം വർധിപ്പിക്കാൻ കാരണമാകും. അർബുദ കോശങ്ങളെ നശിപ്പിക്കുന്ന സി.ഡി8 ടി കോശങ്ങളുടെ (CD8 T cells) പ്രവർത്തനത്തെ തടസ്സപ്പെടുത്തുന്നതാണ് ഈ പ്രക്രിയ. അങ്ങനെ കാൻസറിന് ശരീരത്തിൽ അനിയന്ത്രിതമായി പടരാൻ അവസരം ലഭിക്കുന്നു.
കാൻസർ ശസ്ത്രക്രിയയ്ക്കു ശേഷവും രോഗം തിരികെ വരാൻ ഈ മാനസിക സമ്മർദം വഴിയൊരുക്കാറുണ്ട്. തലയിലും കഴുത്തിലുമുള്ള അർബുദരോഗം ബാധിച്ചവരിൽ ഉത്കണ്ഠയും വിഷാദവും മരണനിരക്ക് ഉയർത്തുന്നതായി പഠനങ്ങൾ സൂചിപ്പിക്കുന്നു. എന്നിരുന്നാലും, ഈ പരീക്ഷണങ്ങൾ നിലവിൽ എലികളിലാണ് നടത്തിയിട്ടുള്ളത്. അതിനാൽ, മനുഷ്യരിൽ ഇത് എത്രത്തോളം ബാധകമാണെന്ന് സ്ഥിരീകരിക്കാൻ കൂടുതൽ ക്ലിനിക്കൽ പഠനങ്ങൾ അനിവാര്യമാണ്.
ആധുനിക കാലഘട്ടത്തിലെ ജോലി, കുടുംബം, സാമൂഹിക അന്തരീക്ഷം എന്നിവയുമായി ബന്ധപ്പെട്ട് മിക്കവരും വലിയ തോതിലുള്ള മാനസിക സമ്മർദം അനുഭവിക്കുന്നുണ്ട്. ഇത്തരം സമ്മർദങ്ങൾ ശരീരത്തിന്റെ പ്രതിരോധ ശേഷിയെ തകിടം മറിക്കുകയും വിവിധ രോഗങ്ങൾ പിടിപെടാനുള്ള സാധ്യത വർധിപ്പിക്കുകയും ചെയ്യുന്നുവെന്ന് സമീപകാല പഠനങ്ങൾ ആവർത്തിച്ചു വ്യക്തമാക്കുന്നു. മനസ്സിന്റെ ആരോഗ്യവും ശരീരത്തിന്റെ സുസ്ഥിതിയും തമ്മിൽ എത്രത്തോളം അനിഷേധ്യമായ ബന്ധമുണ്ടെന്നാണ് ഈ പഠനഫലങ്ങൾ അർത്ഥമാക്കുന്നത്.
