BUSINESS
മലയാളികള്ക്ക് മുന്കൂര് പെന്ഷനുമായി ഇപിഎഫ്ഒ; 4.4 ലക്ഷം പേര്ക്ക് നേട്ടം, പരിശോധിക്കാനുള്ള വഴികള്
ഓണച്ചെലവഴിക്കല് മലയാളികളെ ബാധിക്കാതിരിക്കാന് സഹായ ഹസ്തവുമായി ഇപിഎഫ്ഒ. മാസാവസാനത്തിന് കാത്തുനില്ക്കാതെ മുന്കൂറായി തന്നെ പെന്ഷന് വിതരണം ചെയ്തിരിക്കുന്നു. നിങ്ങളുടെ അക്കൗണ്ടില് തുകയെത്തിയോ എന്ന് വീട്ടിലിരുന്ന് തന്നെ ലളിതമായി പരിശോധിക്കാം. മുടങ്ങാതെ പെന്ഷന് ലഭിക്കാന് ശ്രദ്ധിക്കേണ്ട കാര്യങ്ങളും മനസിലാക്കാം.എന്തുകൊണ്ട് നേരത്തേ പെന്ഷന്ഓണം പ്രമാണിച്ചാണ് ഇപിഎഫ്ഒ പെന്ഷന് മുന്കൂറായി വിതരണം ചെയ്തത്. കേരളത്തിലെ ഓണം ആഘോഷങ്ങള് സാധാരണക്കാരായ മലയാളികളുടെ പോക്കറ്റ് ചോര്ത്തിയിട്ടുണ്ട്. സാധാരണയായി മാസാവസാനമാണ് എംപ്ലോയീസ് പെന്ഷന് സ്കീം (EPS) പ്രകാരം പെന്ഷന് വിതരണം ചെയ്യുന്നത്. പെന്ഷന്കാര്ക്കും അവരുടെ കുടുംബങ്ങള്ക്കും സാമ്പത്തിക ബുദ്ധിമുട്ടുകളില്ലാതെ കാര്യങ്ങള് നീക്കാന് നേരത്തേയുള്ള പെന്ഷന് സഹായിക്കും. കേരളത്തിലെ 4,40,901 പെന്ഷന്കാര്ക്ക് ഓഗസ്റ്റ് മാസത്തെ പെന്ഷന് ഓഗസ്റ്റ് 26 -ന് തന്നെ അക്കൗണ്ടുകളില് എത്തിച്ചെന്നാണ് റിപ്പോര്ട്ട് വ്യക്തമാക്കുന്നത്.പെന്ഷന് പരിശോധിക്കാം ഉമംഗ് (Umang) ആപ്പ് വഴി: സ്മാര്ട്ട്ഫോണില് ഉമംഗ് ആപ്പ് ഡൗണ്ലോഡ് ചെയ്ത് ലോഗിന് ചെയ്യുക. ഇതില് ‘EPFO’ ഓപ്ഷന് തെരഞ്ഞെടുത്ത്, ‘Employee Centric Services’ എന്നതിന് താഴെയുള്ള ‘View Passbook’ ഓപ്ഷന് തെരഞ്ഞെടുക്കുക. നിങ്ങളുടെ യുഎഎന് (UAN) നമ്പറും ഒടിപിയും നല്കിയാല് പാസ്ബുക്ക് വിവരങ്ങള് അറിയാം. എസ്എംഎസ് (SMS) വഴി: ഇപിഎഫ്ഒയില് രജിസ്റ്റര് ചെയ്ത മൊബൈല് നമ്പറില് നിന്ന് ‘7738299899’ എന്ന നമ്പറിലേക്ക് ഒരു മെസ്സേജ് അയക്കുക. മെസ്സേജ് അയക്കേണ്ട ഫോര്മാറ്റ്: EPFOHO <നിങ്ങളുടെ 12 അക്ക UAN നമ്പര്> മിസ്ഡ് കോള് വഴി: രജിസ്റ്റര് ചെയ്ത മൊബൈല് നമ്പറില് നിന്ന് ‘9966044425’ എന്ന നമ്പറിലേക്ക് ഒരു മിസ്ഡ് കോള് നല്കുക. കോള് കട്ടായ ശേഷം എസ്എംഎസ് ആയി ബാലന്സ് വിവരങ്ങള് ലഭിക്കും. ഇപിഎഫ്ഒ പോര്ട്ടല് വഴി: EPFO മെമ്പര് പോര്ട്ടലില് UAN നമ്പറും പാസ്വേഡും ഉപയോഗിച്ച് ലോഗിന് ചെയ്യുക. ‘View’ ഓപ്ഷനില് നിന്ന് ‘Passbook’ എടുത്തും വിവരങ്ങള് പരിശോധിക്കാം. ടോള് ഫ്രീ നമ്പര്: ഇപിഎഫ്ഒയുടെ 24×7 ടോള് ഫ്രീ നമ്പറായ ‘1800-118-005’ ലേക്ക് വിളിച്ചും വിവരങ്ങള് അന്വേഷിക്കാം.മലയാളികള് ശ്രദ്ധിക്കേണ്ട കാര്യങ്ങള്പെന്ഷന് മുടങ്ങാതെ ലഭിക്കാന് എല്ലാ വര്ഷവും ലൈഫ് സര്ട്ടിഫിക്കറ്റ് സമര്പ്പിക്കേണ്ടത് നിര്ബന്ധമാണ്. പുതുക്കുന്നതില് വീഴ്ച വന്നാല് 12 മാസത്തിന് ശേഷം പെന്ഷന് ലഭിക്കുന്നത് തടയപ്പെടും. ബാങ്കുകളില് നേരിട്ട് പോകാതെ തന്നെ ആധാര് നമ്പര് ഉപയോഗിച്ച് ഡിജിറ്റല് ലൈഫ് സര്ട്ടിഫിക്കറ്റ് സമര്പ്പിക്കാന് കഴിയും. കോമണ് സര്വീസ് സെന്ററുകള് (CSC), പോസ്റ്റ് ഓഫീസുകള്, പിഎഫ് ഓഫീസുകള് എന്നിവിടങ്ങളില് ഇതിനുള്ള സൗകര്യം ലഭ്യമാണ്.ഇപിഎഫ്ഒയില് തുടര്ച്ചയായി 10 വര്ഷമെങ്കിലും അംഗത്വമുള്ളവര്ക്കാണ് പെന്ഷന് അര്ഹതയുള്ളത്. 58 വയസ് പൂര്ത്തിയാകുമ്പോള് മുതല് പെന്ഷന് ലഭിക്കാന് തുടങ്ങും. കൂടുതല് തുക ലഭിക്കാന് പെന്ഷന് വാങ്ങുന്നത് 60 വയസ് വരെ നീട്ടിവെക്കാനുള്ള ഓപ്ഷനുമുണ്ട്. ഈ നീട്ടുന്ന കാലയളവില് ലംപ്സം തുകയ്ക്ക് 4% വാര്ഷിക പലിശയും കിട്ടും.
Read News
