ജീവനക്കാരുടെ മികവിന് വമ്പൻ സമ്മാനം; പുത്തൻ എസ്‌യുവി നൽകി അമ്പരപ്പിച്ച് കമ്പനി മേധാവി!
ദീപാവലി ആഘോഷവേളയിൽ പതിവ് ബോണസുകൾക്കും മധുരപലഹാരങ്ങൾക്കും അപ്പുറം തങ്ങളുടെ ജീവനക്കാരുടെ അർപ്പണബോധത്തെയും കഠിനാധ്വാനത്തെയും വിലമതിക്കുന്ന ഒരു മാതൃക സൃഷ്ടിച്ചിരിക്കുകയാണ് ഹരിയാനയിലെ പഞ്ചകുല ആസ്ഥാനമായി പ്രവർത്തിക്കുന്ന മിറ്റ്സ് ഗ്രൂപ്പ് ഓഫ് കമ്പനീസ്. കമ്പനിയിലെ മികച്ച പ്രകടനം കാഴ്ചവെച്ച നാല് ജീവനക്കാർക്ക് ദീപാവലി സമ്മാനമായി പുത്തൻ ‘കിയ സോണറ്റ്’ എസ്‌യുവികൾ നൽകിയാണ് ഇവർ കോർപറേറ്റ് ലോകത്ത് ശ്രദ്ധേയരായത്. കമ്പനി ചെയർമാനും സ്ഥാപകനുമായ എം.കെ. ഭാട്ടിയയുടെ നേതൃത്വത്തിലാണ് ജീവനക്കാരുടെ നേട്ടങ്ങളെ ആദരിച്ചുകൊണ്ട് ഈ ഉപഹാരങ്ങൾ വിതരണം ചെയ്തത്.
മികച്ച പ്രകടനം കാഴ്ചവെച്ചവർക്ക്… മിറ്റ്സ് ഹെൽത്ത്‌കെയർ തങ്ങളുടെ ജീവനക്കാർക്കായി ആവിഷ്കരിച്ച പ്രത്യേക അംഗീകാര പദ്ധതിയുടെ ഭാഗമായാണ് കാറുകൾ സമ്മാനിച്ചത്. ദീർഘകാലമായി കമ്പനിയോട് ചേർന്നുനിൽക്കുന്നവരും ഉന്നത നിലവാരത്തിലുള്ള പ്രവർത്തനം കാഴ്ചവെക്കുന്നവരുമായവരെയാണ് ഈ പുരസ്കാരത്തിനായി പരിഗണിച്ചത്. കഴിഞ്ഞ അഞ്ച് വർഷമായി കമ്പനിയിൽ സേവനമനുഷ്ഠിക്കുന്ന ഒരു ജീവനക്കാരൻ തനിക്ക് ലഭിച്ച ഈ വലിയ സമ്മാനത്തെക്കുറിച്ച് മാധ്യമങ്ങളോട് പങ്കുവെച്ചു.
ലക്കി ഡ്രോയിലൂടെ എല്ലാവർക്കും അവസരം… മികച്ച പ്രകടനം കാഴ്ചവെച്ചവരെ ആദരിക്കുന്നതിനോടൊപ്പം തന്നെ, കൂടുതൽ ജീവനക്കാരിലേക്ക് ഈ സൗഭാഗ്യം എത്തിക്കുന്നതിനായി കമ്പനി ഒരു ‘ലക്കി ഡ്രോ’ മത്സരവും സംഘടിപ്പിച്ചിട്ടുണ്ട്. 18 മാസത്തിലധികം സേവന കാലാവധിയുള്ള യോഗ്യരായ എല്ലാ ജീവനക്കാർക്കും ഇതിൽ പങ്കാളികളാകാം. സുരക്ഷാ ജീവനക്കാർ മുതൽ ഉന്നത ഉദ്യോഗസ്ഥർ വരെ നീളുന്ന ഈ നറുക്കെടുപ്പിലൂടെ, കഠിനാധ്വാനം ചെയ്യുന്ന സാധാരണക്കാരായ ജീവനക്കാർക്കും തങ്ങളുടെ വലിയ സ്വപ്നങ്ങൾ കൈപ്പിടിയിലൊതുക്കാനുള്ള അവസരമാണ് ഈ കമ്പനി ഒരുക്കി നൽകുന്നത്.
