യാത്ര ഇനി കൂടുതൽ സുരക്ഷിതം; ഇൻഷുറൻസ് എടുക്കുമ്പോൾ അറിയേണ്ട കാര്യങ്ങൾ ഇവയാണ്
വാഹന ഇൻഷുറൻസ് പോളിസികൾ പരിശോധിച്ചാൽ, വാഹനത്തിന്റെ റജിസ്ട്രേഡ് ഉടമയ്ക്ക് മാത്രമാണ് സാധാരണയായി പേഴ്സണൽ ആക്സിഡന്റ് കവറേജ് ലഭിക്കാറുള്ളത്. എന്നാൽ, കാറിൽ യാത്ര ചെയ്യുന്ന മറ്റു വ്യക്തികൾക്കും അപകട ഇൻഷുറൻസ് പരിരക്ഷ ലഭിക്കുമെന്ന കാര്യം പലർക്കും അറിവില്ലാത്ത ഒന്നാണ്. നിലവിലുള്ള ഇൻഷുറൻസ് പോളിസികൾ പുതുക്കുമ്പോൾ ഈ അധിക പരിരക്ഷ കൂടി ഉൾപ്പെടുത്താവുന്നതാണ്. സാധാരണയായി അപകടം സംഭവിക്കുമ്പോൾ വാഹനത്തിനുണ്ടാകുന്ന കേടുപാടുകൾക്ക് ക്ലെയിം ലഭിക്കാറുണ്ടെങ്കിലും, വാഹന ഉടമയുടെ മരണം അല്ലെങ്കിൽ പരുക്കുകൾക്ക് മാത്രമേ പോളിസിയിൽ പരിരക്ഷ ലഭ്യമാകൂ. അതേസമയം, കൂടെയുള്ള യാത്രക്കാർക്ക് എന്തെങ്കിലും അപകടം സംഭവിച്ചാൽ ഇൻഷുറൻസിന്റെ ആനുകൂല്യം ലഭിക്കില്ല. ഈ സാഹചര്യത്തിലാണ് പേഴ്സണൽ ആക്സിഡന്റ് കവർ അഥവാ സഹയാത്രികർക്കുള്ള അപകട പരിരക്ഷാ പോളിസി വളരെ പ്രസക്തമാകുന്നത്.
സഹയാത്രികർക്കായി പ്രധാനമായും രണ്ടു തരം പോളിസികളാണുള്ളത്. ഒന്നാമത്തേത് നെയിംഡ് പാസഞ്ചേഴ്സ് ആക്സിഡന്റ് കവർ ആണ്. ഇത് കുടുംബാംഗങ്ങൾക്കോ അല്ലെങ്കിൽ സ്ഥിരമായി ഒപ്പം സഞ്ചരിക്കുന്ന സുഹൃത്തുക്കൾക്കോ വേണ്ടി എടുക്കാവുന്നതാണ്. യാത്ര ചെയ്യുന്നവരുടെ പേരുകൾ പോളിസിയിൽ കൃത്യമായി രേഖപ്പെടുത്തേണ്ടതുണ്ട്. രണ്ടാമത്തെ രീതിയാണ് അൺനെയിംഡ് പാസഞ്ചേഴ്സ് ആക്സിഡന്റ് കവർ. വാഹനത്തിന്റെ സീറ്റിങ് കപ്പാസിറ്റി അഥവാ ഇരിപ്പിടങ്ങളുടെ എണ്ണം അടിസ്ഥാനമാക്കിയാണ് ഇത് തിരഞ്ഞെടുക്കുന്നത്. ഉദാഹരണത്തിന്, ഉടമയൊഴികെ നാല് പേർക്ക് യാത്ര ചെയ്യാവുന്ന വാഹനമാണെങ്കിൽ, പേര് വെളിപ്പെടുത്താതെ തന്നെ ആ സീറ്റുകളിൽ ഇരിക്കുന്ന ആർക്കും ഈ പരിരക്ഷ ലഭ്യമാകും. വണ്ടിയിൽ കയറുന്ന ഏതൊരാൾക്കും ഈ ഇൻഷുറൻസ് ഗുണം ചെയ്യും.
ഇത്തരം പോളിസികളുടെ ചെലവ് തിരഞ്ഞെടുക്കുന്ന പരിരക്ഷാ തുകയെ ആശ്രയിച്ചിരിക്കും. പതിനഞ്ച് ലക്ഷം രൂപ വരെ അപകട ഇൻഷുറൻസ് നൽകുന്ന പോളിസികൾ വിപണിയിലുണ്ട്. വാഹനത്തിന്റെ സീറ്റിങ് കപ്പാസിറ്റി കണക്കാക്കിയാണ് പ്രീമിയം തുക നിശ്ചയിക്കുന്നത്. ഒരു യാത്രക്കാരന് പ്രതിവർഷം ആയിരം രൂപയിൽ താഴെ മാത്രം പ്രീമിയം നൽകിയാൽ മതിയാകും. സീറ്റിങ് കപ്പാസിറ്റിക്ക് അനുസരിച്ചുള്ള ഗുണിത തുക പ്രീമിയമായി അധികം അടച്ചാൽ യാത്രക്കാർക്കെല്ലാം സുരക്ഷ ഉറപ്പാക്കാം. വരുംകാലങ്ങളിൽ ഇൻഷുറൻസ് പുതുക്കുമ്പോൾ ഈ പരിരക്ഷ കൂടി ഉൾപ്പെടുത്താൻ ശ്രദ്ധിക്കുക. ഇരുചക്ര വാഹനങ്ങളിലും ഈ സൗകര്യം ലഭ്യമാണ്.
