ആഡംബരത്തിന്റെ നെറുകയിൽ: ഇന്ത്യയിലെ ഏറ്റവും ചെലവേറിയ 5 സൂപ്പർ ലക്ഷ്വറി ക്രെഡിറ്റ് കാർഡുകൾ
ഐഡിഎഫ്‌സി ഫസ്റ്റ് പ്രൈവറ്റ് ക്രെഡിറ്റ് കാര്‍ഡ് (IDFC First Private Credit Card)
വിദേശയാത്രകളിലും എടിഎം ഇടപാടുകളിലും ഫോറെക്‌സ് ഫീസ് ഈടാക്കുന്നില്ലെന്നതാണ് ഈ കാര്‍ഡിന്റെ പ്രധാന പ്രത്യേകത. കാര്‍ഡ് ഉടമയ്ക്കും ഒപ്പമുള്ളവര്‍ക്കും രാജ്യത്തും വിദേശത്തുമുള്ള തിരഞ്ഞെടുത്ത ലോഞ്ചുകളില്‍ പരിധിയില്ലാത്ത പ്രവേശനം ലഭിക്കും. ഒരു വര്‍ഷത്തിനിടെ 91,000 രൂപയുടെ അന്താരാഷ്ട്ര ഇടപാടുകള്‍ നടത്തിയാല്‍ എയര്‍പോര്‍ട്ടുകളില്‍ സൗജന്യ ‘മീറ്റ് ആന്‍ഡ് ഗ്രീറ്റ്’ സേവനം ആസ്വദിക്കാം. ഐടിസി ഹോട്ടലുകളില്‍ തുടര്‍ച്ചയായി രണ്ടുദിവസം താമസിച്ചാല്‍ മൂന്നാമത്തെ ദിവസം സൗജന്യമാണ്. പോസ്റ്റ്കാര്‍ഡ് ഹോട്ടലുകളിലെ 25,000 രൂപയ്ക്ക് മുകളിലുള്ള ബുക്കിംഗുകള്‍ക്ക് 7,500 രൂപയുടെ കിഴിവും ലഭ്യമാണ്. ഗോള്‍ഫ് പ്രേമികള്‍ക്കായി പരിധിയില്ലാത്ത ആഭ്യന്തര പ്രവേശനവും പാദവാര്‍ഷികത്തില്‍ ഒരു സൗജന്യ അന്താരാഷ്ട്ര ഗോള്‍ഫ് റൗണ്ടും ഈ കാര്‍ഡ് വാഗ്ദാനം ചെയ്യുന്നു.
യോഗ്യതാ മാനദണ്ഡം: ബാങ്ക് ക്ഷണിക്കുന്നവര്‍ക്ക് മാത്രമായി പരിമിതപ്പെടുത്തിയിരിക്കുന്നു (Invitation-only). ചേരുന്നതിനുള്ള ഫീസ് 50,000 രൂപയും ജിഎസ്ടിയും.
അമേരിക്കന്‍ എക്‌സ്പ്രസ് പ്ലാറ്റിനം ചാര്‍ജ് കാര്‍ഡ് (American Express Platinum Charge Card)
ലോകമെമ്പാടുമുള്ള 1550-ലധികം ലോഞ്ചുകളിലേക്ക് ഇതിലൂടെ പ്രവേശനം നേടാം. തിരഞ്ഞെടുത്ത 1000-ല്‍പ്പരം പ്രോപ്പര്‍ട്ടികളിലെ താമസത്തിലൂടെ ഏകദേശം 44,300 രൂപയുടെ ആനുകൂല്യങ്ങള്‍ ഉപഭോക്താവിന് ലഭിക്കുന്നു. വെല്‍കം ഗിഫ്റ്റായി താജ്, പോസ്റ്റ്കാര്‍ഡ് ഹോട്ടലുകള്‍, ലക്‌സ് ഗിഫ്റ്റ് കാര്‍ഡ് എന്നിവയില്‍ നിന്ന് 60,000 രൂപ വരെ മൂല്യമുള്ള സേവനങ്ങള്‍ തിരഞ്ഞെടുക്കാം. കൂടാതെ വിംബിള്‍ഡണ്‍, ഗ്രാമി അവാര്‍ഡ്‌സ് പോലുള്ള ലോകോത്തര പരിപാടികളില്‍ വിഐപി പ്രവേശനം ലഭിക്കാനും ഇത് അവസരമൊരുക്കുന്നു.
യോഗ്യതാ മാനദണ്ഡം: ഉയര്‍ന്ന സാമ്പത്തിക ശേഷിയുള്ള വ്യക്തികള്‍ക്ക് മാത്രം. വാര്‍ഷിക ഫീസ് 66,000 രൂപയും ജിഎസ്ടിയും.
ആക്‌സിസ് ബര്‍ഗണ്ടി പ്രൈവറ്റ് – ദ വണ്‍ കാര്‍ഡ് (Axis BURGUNDY PRIVATE – The One Card)
ക്രെഡിറ്റ്, ഡെബിറ്റ്, ഫോറെക്‌സ് കാര്‍ഡ് സൗകര്യങ്ങള്‍ ഒന്നിച്ചു ചേര്‍ത്താണ് ഈ കാര്‍ഡ് രൂപകല്‍പ്പന ചെയ്തിരിക്കുന്നത്. ആഭ്യന്തര-അന്താരാഷ്ട്ര ലോഞ്ചുകളിലേക്ക് പരിധിയില്ലാത്ത സൗജന്യ പ്രവേശനവും സീറോ ഫോറെക്‌സ് മാര്‍ക്കപ്പും ഇതിന്റെ സവിശേഷതയാണ്. താജ് എപ്പിക്യൂര്‍, മാരിയറ്റ്, അക്കോര്‍+ എക്‌സ്‌പ്ലോറര്‍ തുടങ്ങിയവയിലെ സൗജന്യ മെമ്പര്‍ഷിപ്പും ഇതിലുണ്ട്. സിനിമ ടിക്കറ്റുകള്‍ ബുക്ക് ചെയ്യുമ്പോള്‍ 500 രൂപയും, മറ്റ് പരിപാടികള്‍ക്ക് 1000 രൂപ വരെയും കിഴിവ് ലഭിക്കും. വര്‍ഷത്തില്‍ 50 ആഭ്യന്തരവും 4 അന്താരാഷ്ട്രവുമായ ഗോള്‍ഫ് റൗണ്ടുകളും സൗജന്യമാണ്.
യോഗ്യതാ മാനദണ്ഡം: സാധാരണ വാര്‍ഷിക ഫീസ് 1,00,000 രൂപയാണ്. എങ്കിലും, ആക്‌സിസ് ബാങ്കില്‍ 5 കോടി രൂപയ്ക്ക് മുകളില്‍ മൊത്തത്തിലുള്ള സാമ്പത്തിക ഇടപാടുകള്‍ (TRV) ഉള്ള ബര്‍ഗണ്ടി പ്രൈവറ്റ് ഉപഭോക്താക്കള്‍ക്ക് ഈ കാര്‍ഡ് സൗജന്യമായി ലഭിക്കും.
എച്ച്എസ്ബിസി താജ് ക്രെഡിറ്റ് കാര്‍ഡ് (HSBC Taj Credit Card)
ഈ കാര്‍ഡ് ആക്ടിവേറ്റ് ചെയ്യുന്നതോടെ താജ് ഹോട്ടലുകളില്‍ പ്രഭാതഭക്ഷണത്തോടുകൂടിയ രണ്ടുദിവസത്തെ സൗജന്യ താമസം ലഭിക്കും (താജ് പാലസ് ആണെങ്കില്‍ ഒരു ദിവസം). ഉടമയ്ക്കും കൂടെയുള്ള ഒരാള്‍ക്കും വര്‍ഷത്തില്‍ 12 തവണ ‘ദ ചേമ്പേഴ്‌സ്’ ലോഞ്ച് സൗകര്യം ഉപയോഗിക്കാം. താജ് ഹോട്ടലുകളിലെ താമസത്തിന് 25% വിലക്കിഴിവ്, റിലയന്‍സ് ബ്രാന്‍ഡ് ഔട്ട്‌ലെറ്റുകളില്‍ 35,000 രൂപയ്ക്ക് മുകളിലുള്ള ചിലവുകള്‍ക്ക് 10,000 രൂപയുടെ ഇളവ് എന്നിവ ഇതിലുണ്ട്. കൂടാതെ, താജ് ഗ്രൂപ്പ് ഹോട്ടലുകളിലെ ചിലവുകള്‍ക്ക് റിവാര്‍ഡ് പോയിന്റുകളും ലഭിക്കുന്നു.
യോഗ്യതാ മാനദണ്ഡം: ആഡംബര യാത്രകളെ പ്രണയിക്കുന്ന താജ് ഹോട്ടലുകളുടെ സ്ഥിരം അതിഥികള്‍ക്കായി മാത്രം. ജോയിനിംഗ് ഫീസും വാര്‍ഷിക ഫീസും 1,10,000 രൂപയും ജിഎസ്ടിയും.
ആക്‌സിസ് പ്രൈമസ് ക്രെഡിറ്റ് കാര്‍ഡ് (Axis Primus Credit Card)
അള്‍ട്രാ ലക്ഷ്വറി ജീവിതശൈലി നയിക്കുന്നവര്‍ക്കായി 2024-ല്‍ പുറത്തിറക്കിയ കാര്‍ഡാണിത്. ലോകമെമ്പാടുമുള്ള 10,000-ലധികം പ്രമുഖ റെസ്റ്റോറന്റുകളില്‍ മുന്‍ഗണനാ ബുക്കിംഗ് ഇതിലൂടെ സാധ്യമാണ്. പ്രൈവറ്റ് ജെറ്റ് ആക്‌സസ്, സ്‌കീ അവധികള്‍, ഫ്‌ലൈയിംഗ് സഫാരികള്‍ എന്നിവയ്ക്കൊപ്പം പരിധിയില്ലാത്ത എയര്‍പോര്‍ട്ട് ലോഞ്ച് സൗകര്യവും ലഭ്യമാണ്. കൂടെയുള്ളവര്‍ക്ക് വര്‍ഷത്തില്‍ 12 തവണ സൗജന്യ ലോഞ്ച് ആക്‌സസ് ലഭിക്കും. താജ് എപ്പിക്യൂര്‍, ബ്ലൂംബെര്‍ഗ് അംഗത്വങ്ങളും പങ്കാളി ഹോട്ടലുകളിലെ സൗജന്യ താമസ സൗകര്യവും ഇതിന്റെ ഭാഗമാണ്.
യോഗ്യതാ മാനദണ്ഡം: ബാങ്കിന്റെ പ്രത്യേക ക്ഷണം ലഭിക്കുന്ന അതിസമ്പന്നര്‍ക്ക് മാത്രം. ജോയിനിംഗ് ഫീസും വാര്‍ഷിക ഫീസും 5,00,000 രൂപയും ജിഎസ്ടിയും.
പ്രത്യേകം ശ്രദ്ധിക്കാന്‍
ഈ കാര്‍ഡുകളില്‍ ഭൂരിഭാഗവും നേരിട്ട് അപേക്ഷിക്കാന്‍ കഴിയില്ല; ബാങ്കിന്റെ പ്രത്യേക ക്ഷണത്തിലൂടെ മാത്രമേ ഇവ ലഭ്യമാകൂ. ഉയര്‍ന്ന സാമ്പത്തിക അടിത്തറയുള്ളവര്‍ക്കും ബാങ്കുകളുമായി മികച്ച സാമ്പത്തിക ബന്ധം കാത്തുസൂക്ഷിക്കുന്നവര്‍ക്കും മാത്രമുള്ളതാണ് ഈ എലൈറ്റ് കാര്‍ഡുകള്‍. അമേരിക്കന്‍ എക്‌സ്പ്രസ് കാര്‍ഡിനായി ഇന്ത്യയിലെ പുതിയ ഉപഭോക്താക്കളില്‍ നിന്നുള്ള അപേക്ഷകള്‍ നിലവില്‍ താൽക്കാലികമായി നിര്‍ത്തിവെച്ചിരിക്കുകയാണ്. ഇത്തരം കാര്‍ഡുകള്‍ക്ക് ലക്ഷക്കണക്കിന് രൂപയുടെ വാര്‍ഷിക ഫീസ് ഉള്ളതിനാല്‍, വിദേശയാത്രകളും പഞ്ചനക്ഷത്ര ഹോട്ടൽ താമസങ്ങളും പതിവായുള്ളവര്‍ക്ക് മാത്രമേ ഇവ സാമ്പത്തികമായി ലാഭകരമാകൂ.
