ഇന്ത്യൻ വസ്ത്ര വിപണിയിൽ വിപ്ലവം; വലിപ്പത്തിലെ ആശയക്കുഴപ്പം തീർക്കാൻ ‘ഇന്ത്യ സൈസ്’ മാനദണ്ഡങ്ങൾ വരുന്നു
കൊച്ചി ∙ വിപണിയിൽനിന്നു വാങ്ങുന്ന റെഡിമെയ്ഡ് വസ്ത്രങ്ങൾ പലപ്പോഴും ശരീരത്തിന് പാകമാകുന്നില്ലെന്ന ഉപഭോക്താക്കളുടെ പരാതിക്ക് അറുതി വരുന്നു. ഇന്ത്യാക്കാരുടെ ശാരീരിക ഘടന കൃത്യമായി മനസ്സിലാക്കി തയാറാക്കിയ പുതിയ അളവുസൂചിക അഥവാ ‘ഇന്ത്യ സൈസ് ചാർട്ട്’ വസ്ത്രനിർമാണ മേഖലയിൽ പ്രാബല്യത്തിൽ വരികയാണ്. കഴിഞ്ഞ ജനുവരിയിൽ പ്രകാശനം ചെയ്ത ഈ ചാർട്ട് പ്രമുഖ വസ്ത്ര ബ്രാൻഡുകൾ ഇതിനകം തന്നെ തങ്ങളുടെ ഉൽപന്നങ്ങളിൽ പരീക്ഷിച്ചു തുടങ്ങി.
കേന്ദ്ര തുണിത്തര മന്ത്രാലയത്തിന്റെ മേൽനോട്ടത്തിൽ നാഷനൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്നോളജി (നിഫ്റ്റ്) ആണ് ഈ ശാസ്ത്രീയമായ അളവുസൂചിക രൂപകല്പന ചെയ്തത്. ഈ സംരംഭത്തിന്റെ ഭാഗമായി പുറത്തിറക്കിയ ഇ–ബുക്ക് സ്വന്തമാക്കാൻ വ്യവസായ രംഗത്തെ പ്രമുഖരടക്കം രണ്ടായിരത്തി നാനൂറിലധികം പേർ ഇതിനകം റജിസ്റ്റർ ചെയ്തുകഴിഞ്ഞു. രാജ്യത്തെ വസ്ത്ര നിർമാണ രംഗത്ത് ഐഎൻ (IN) ലേബലിങ് സംവിധാനവും ഏകീകൃത അളവുമാനദണ്ഡങ്ങളും അടുത്തുതന്നെ നിർബന്ധമാക്കാനുള്ള നടപടികൾ അന്തിമഘട്ടത്തിലാണ്.
ഇത്രകാലവും വിദേശ രാജ്യങ്ങളിലെ അളവുകളെയാണ് നമ്മൾ ആശ്രയിച്ചിരുന്നത്. എന്നാൽ ഇതിന് മാറ്റം വരുത്തിക്കൊണ്ട്, പൂർണമായും ഇന്ത്യൻ ശാരീരിക സവിശേഷതകൾ മുൻനിർത്തിയുള്ള വസ്ത്രങ്ങൾ നിർമ്മിക്കാൻ ക്ലോത്തിങ് മാനുഫാക്ചറേഴ്സ് അസോസിയേഷൻ ഓഫ് ഇന്ത്യ (സിഎംഎഐ) മുൻകൈയെടുത്തു. ഇതിനായി ദില്ലി, മുംബൈ, കൊൽക്കത്ത, ചെന്നൈ, ഹൈദരാബാദ്, ഷില്ലോങ് തുടങ്ങിയ പ്രധാന നഗരങ്ങളിൽ 3ഡി ഫുൾ ബോഡി സ്കാനിങ് യന്ത്രങ്ങൾ സ്ഥാപിക്കുകയും, ഇരുപത്താറായിരത്തിലധികം ആളുകളിൽനിന്ന് കൃത്യമായ വിവരശേഖരണം നടത്തുകയും ചെയ്തു.
ഈ പഠന റിപ്പോർട്ടുകളുടെ അടിസ്ഥാനത്തിൽ പുരുഷന്മാർക്കായി പതിനാലും സ്ത്രീകൾക്കായി പതിമൂന്നും വ്യത്യസ്ത അളവുകളാണ് ഇന്ത്യ സൈസ് ചാർട്ടിൽ ഉൾപ്പെടുത്തിയിരിക്കുന്നത്. മൂന്ന് ഉയരവിഭാഗങ്ങളെയും അഞ്ച് വ്യത്യസ്ത ശരീരഘടനകളെയും മാനദണ്ഡമാക്കിയാണ് ഈ ചാർട്ട് തയ്യാറാക്കിയിട്ടുള്ളത്. വസ്ത്ര നിർമ്മാതാക്കൾക്ക് ആവശ്യമായ ഈ ഡിജിറ്റൽ ചാർട്ടുകൾ www.indiasize.in എന്ന വെബ്സൈറ്റ് വഴി ഇരുപതിനായിരം രൂപ നിരക്കിൽ ടെക്സ്റ്റൈൽ മന്ത്രാലയം ലഭ്യമാക്കുന്നുണ്ട്.
