രാജസേനന്റെ ഹൊറർ ചിത്രത്തിൽ നായകനായി ചന്തുനാഥ്
‘മേഘസന്ദേശം’ എന്ന ചിത്രത്തിന് ശേഷം സംവിധായകൻ രാജസേനൻ വീണ്ടും ഹൊറർ വിഭാഗത്തിൽ പെടുന്ന ഒരു സിനിമയുമായി പ്രേക്ഷകരിലേക്ക് എത്താനൊരുങ്ങുകയാണ്. തിരക്കഥയും സംവിധാനവും രാജസേനൻ തന്നെ നിർവഹിക്കുന്ന ഈ പുതിയ പ്രോജക്റ്റിൽ ചന്തുനാഥാണ് മുഖ്യ കഥാപാത്രത്തെ അവതരിപ്പിക്കുന്നത്. തിരുവനന്തപുരത്ത് വെച്ച് നവംബർ 30-ന് സിനിമയുടെ ചിത്രീകരണം ആരംഭിക്കും. ഇതിന് മുന്നോടിയായുള്ള ഔദ്യോഗിക ലോഞ്ചിംഗ് ചടങ്ങ് നവംബർ 19-ന് നടക്കും. സുരേഷ് ഗോപി, സംയുക്ത വർമ്മ, രാജശ്രീ നായർ എന്നിവർ കേന്ദ്ര കഥാപാത്രങ്ങളായി വേഷമിട്ട ‘മേഘസന്ദേശം’ 2001-ലാണ് തിയേറ്ററുകളിൽ എത്തിയത്.
‘അയലത്തെ അദ്ദേഹം’, ‘സി.ഐ.ഡി ഉണ്ണിക്കൃഷ്ണൻ ബി.എ ബി.എഡ്’, ‘വാർദ്ധക്യപുരാണം’, ‘അനിയൻ ബാവ ചേട്ടൻ ബാവ’, ‘ദില്ലിവാല രാജകുമാരൻ’ തുടങ്ങി മലയാള സിനിമയിൽ എക്കാലവും ഓർമ്മിക്കപ്പെടുന്ന ഒരുപിടി മികച്ച ചിത്രങ്ങൾ ഒരുക്കിയ സംവിധായകനാണ് രാജസേനൻ. ജയറാം-രാജസേനൻ കൂട്ടുകെട്ടിന് കുടുംബ പ്രേക്ഷകർക്കിടയിൽ വലിയ സ്വീകാര്യതയായിരുന്നു ലഭിച്ചിരുന്നത്. അവസാനമായി സംവിധാനം ചെയ്ത ചിത്രം ‘ഞാനും പിന്നൊരു ഞാനും’ ആയിരുന്നു.
നീണ്ട മൂന്ന് വർഷത്തെ ഇടവേളയ്ക്ക് ശേഷം രാജസേനൻ സംവിധാനത്തിലേക്ക് മടങ്ങിയെത്തുന്ന ഈ ചിത്രത്തിന്റെ അഭിനേതാക്കളെ നിശ്ചയിക്കുന്ന പ്രക്രിയ അന്തിമഘട്ടത്തിലാണ്. മലയാളത്തിലെ യുവതാരനിരയിൽ തന്റേതായ ഇടം കണ്ടെത്തിയ ചന്തുനാഥ്, ശങ്കർ രാമകൃഷ്ണൻ സംവിധാനം ചെയ്ത ‘പതിനെട്ടാം പടി’ എന്ന സിനിമയിൽ മമ്മൂട്ടിയുടെ സഹോദരനായി വേഷമിട്ടാണ് സിനിമയിൽ ശ്രദ്ധിക്കപ്പെട്ടു തുടങ്ങിയത്. ‘മാലിക്’, ‘ട്വിന്റിവൺ ഗ്രാംസ്’, ‘ഫീനിക്സ്’, ‘സീക്രട്ട് ഹോം’, ‘ത്രയം’, ‘ശുക്രൻ’ തുടങ്ങിയ സിനിമകളിലെ പ്രകടനം ചന്തുനാഥിന്റെ അഭിനയ ജീവിതത്തിലെ നിർണ്ണായക വഴിത്തിരിവുകളായിരുന്നു.
