എംഎൽഎമാരുടെ ശമ്പള വർദ്ധനവ് വേണ്ടെന്ന് രാജീവ് ചന്ദ്രശേഖർ
രാജീവ് ചന്ദ്രശേഖർ എം.എൽ.എ
തിരുവനന്തപുരം: ജനപ്രതിനിധികളുടെ ശമ്പളവും ആനുകൂല്യങ്ങളും വർദ്ധിപ്പിക്കാനുള്ള സർക്കാർ തീരുമാനത്തിനെതിരെ രൂക്ഷ വിമർശനവുമായി ബി.ജെ.പി സംസ്ഥാന അധ്യക്ഷനും എം.എൽ.എയുമായ രാജീവ് ചന്ദ്രശേഖർ രംഗത്തെത്തി. അതിരൂക്ഷമായ സാമ്പത്തിക പ്രതിസന്ധികൾക്കിടയിലും ഇത്തരമൊരു നടപടി സ്വീകരിച്ചത് തെറ്റായ തീരുമാനമാണെന്ന് അദ്ദേഹം തുറന്നടിച്ചു. തനിക്ക് ലഭിക്കുന്ന വർദ്ധിപ്പിച്ച ശമ്പളമോ അലവൻസുകളോ കൈപ്പറ്റില്ലെന്ന് വ്യക്തമാക്കിയ അദ്ദേഹം, ഈ തുക പൂർണമായും തന്റെ മണ്ഡലത്തിന്റെ വികസന പ്രവർത്തനങ്ങൾക്കായി വിനിയോഗിക്കുമെന്നും അറിയിച്ചു.
മന്ത്രിമാരുടെയും എം.എൽ.എമാരുടെയും ശമ്പളവും അലവൻസുകളും ഗണ്യമായി വർദ്ധിപ്പിക്കുന്നതിനുള്ള ബിൽ നിയമസഭയിൽ ഭരണ-പ്രതിപക്ഷ ഭേദമന്യേ ഏകകണ്ഠമായാണ് പാസാക്കിയത്. ഇതോടെ എം.എൽ.എമാരുടെ നിലവിലെ ശമ്പളമായ 69,000 രൂപയിൽ നിന്ന് 98,000 രൂപയായി വർദ്ധിക്കും. ഇതിൽ ഒരു ചെറിയ ഭാഗം മാത്രമാണ് അടിസ്ഥാന ശമ്പളം; ബാക്കി തുക യാത്രാബത്ത ഉൾപ്പെടെയുള്ള വിവിധ ആനുകൂല്യങ്ങളായാണ് കൈപ്പറ്റുന്നത്. മന്ത്രിമാരുടെ പ്രതിമാസ വരുമാനം 99,000 രൂപയിൽ നിന്ന് 1.33 ലക്ഷമായി ഉയർന്നു. ഏകദേശം മൂന്നിലൊന്ന് വർദ്ധനവാണ് വരുമാനത്തിൽ ഉണ്ടായിരിക്കുന്നത്. 2018-ലാണ് ഇതിനു മുൻപ് ആനുകൂല്യങ്ങളിൽ മാറ്റം വരുത്തിയത്. മന്ത്രിമാരുടെ പേഴ്‌സണൽ സ്റ്റാഫിലെ പ്രൈവറ്റ് സെക്രട്ടറിമാർക്കും അഡീഷണൽ പ്രൈവറ്റ് സെക്രട്ടറിമാർക്കും 1.40 ലക്ഷം രൂപ ശമ്പളം ലഭിക്കുമ്പോൾ, മന്ത്രിമാർക്ക് ലക്ഷത്തിൽ താഴെ മാത്രമായിരുന്നു ലഭിച്ചിരുന്നത് എന്നതും വർദ്ധനവിന് കാരണമായി ചൂണ്ടിക്കാട്ടുന്നു.
ജസ്റ്റിസ് സി.എൻ. രാമചന്ദ്രൻ നായർ കമ്മീഷന്റെ ശുപാർശ പ്രകാരമാണ് 30 മുതൽ 35 ശതമാനം വരെ ശമ്പളവർദ്ധനവ് നടപ്പിലാക്കിയത്. ഇതിനായി നിലവിലുള്ള നിയമത്തിൽ ഭേദഗതികൾ വരുത്തി. എം.എൽ.എമാരുടെ ഓഫീസിലെ സ്റ്റാഫുകളുടെ ശമ്പളവും പരിഷ്കരിച്ചിട്ടുണ്ട്. നിലവിൽ 20,000 രൂപയായിരുന്ന ശമ്പളം 25,000 രൂപയായി ഉയർത്താൻ തീരുമാനിച്ചു. ഇന്ധനവില വർദ്ധനവ് കണക്കിലെടുത്ത് എം.എൽ.എമാർക്കുള്ള ഇന്ധന അലവൻസിലും വർദ്ധനവ് ഉണ്ടാകും. കൂടാതെ, മന്ത്രിമാരുടെ ശമ്പള സ്കെയിലിലും അടിസ്ഥാന ശമ്പളം, ക്ഷാമബത്ത (ഡി.എ) എന്നിവയിലുമടക്കം സമഗ്രമായ മാറ്റങ്ങളാണ് വരുത്തിയിരിക്കുന്നത്.
